ەرتەڭ ەلىمىزدە وسىمەن ەكىنشى مارتە «جاس وتان» جاستار قاناتىنىڭ رەسپۋبليكالىق سەزى وتپەك. قاراشانىڭ باسىنان تالقىعا تۇسكەن دەلەگاتتار ءتىزىمى جاقىندا 5-ءشى ايماقارالىق جاستار بىرلەستىگىنىڭ جيىنىندا ءمالىم بولدى. مىڭعا جۋىق قاتىسۋشىلار اراسىندا اشىق تۇردە سايلاۋ ءوتىپ, اتى وزعانداردىڭ ەسىمدەرى اتالعان بولاتىن. 14 وبلىسپەن ەكى قالادان جانە جەكەلەگەن ۇيىمداردان قاتىسۋشىلاردى باستاپ كەلەتىن وكىلدەر مەن جالپى قاتىسۋشى قىز-جىگىتتەر سانى 9 مىڭدى قۇرايدى, – دەپ توپشىلاپ وتىر ۇيىمداستىرۋشىلار. ۇمىتكەرلەر ءتۇرلى سالادا قىزمەت ەتەدى: دارىگەرلەر, پەداگوگتار, كاسىپكەرلەر مەن سپورتشىلار دا بار.
جاستار – قوعامنىڭ قوزعاۋشى كۇشى. قاي كەزدە دە ۇلكەننىڭ اقىلىن قورەك ەتىپ, جاستىق جىگەردى تۋ قىلىپ, قاجىر-قايراتىن ەلىنىڭ جارقىن بولاشاعى ءۇشىن سارپ ەتۋگە دايىن كەنجە بۋىن قاي قوعامنان بولسىن كورىنىس تاۋىپ كەلگەن. الىسقا بارماي-اق, ءوز تاريحىمىزعا ءۇڭىلىپ قارايىق: يمام اعزام اتانعاندا ءبىزدىڭ مازحابىمىزدىڭ ۇلىق يمامى ابۋ حانيفا ون جاستا بولعان; شارشى توپتان سۋىرىلىپ شىعىپ شارىشتىڭ باسىن العاندا ابىلاي ون جەتى جاستا بولاتىن; اباي ون ءۇش جاسىنان ەل ىسىنە ارالاسا باستاعان; كەشەگى الاش ارىستارى دا جيىرماعا جەتپەي ءبىرى ەل باستاپ, ءبىرى عىلىمنىڭ تۇڭعيىق تەرەڭىنە قۇلاش ۇرعانىن تاعى بىلەمىز. مۇنداي قانجىلىكتىلىكتىڭ جىبەك ءجىبى ۇزىلمەي جەتىپ, بۇگىنگى جىنتىكتى ۇرپاقتىڭ دا جىگەرىن جانىپ جاتقانىنا جاقىندا كۋا بولدىق: شىعىس قازاقستانداعى جاستاردىڭ رەسمي-بەيرەسمي ۇيىمدارى بىرىگىپ, وبلىس باسشىلارىنا ستۋدەنتتەرگە دەپۋتاتتاردىڭ كومەكشىسى رەتىندە (اقىسىز) قىزمەت اتقارۋعا مۇمكىندىك بەرۋىن سۇراپ حات جولداعان. باباسى ون ۇشىندە باسپىن دەگەن ەلدىڭ بالاسى جيىرماسىندا جاسپىن دەپ جاتسا جەگى قۇرتتاي جانىڭدى كەۋلەمەي مە بۇل تەكسىزدىك. بۇعان دا تاۋبە دەلىك! ارينە, ايتقالى وتىرعانىمىز بۇل ەمەس-ءتى. الىستى ءبىر شولىپ, ەسكى كۇندى ەسكە سالىپ, رۋحاني ساباقتاستىقتى سارالاپ باققان ءتۇرىمىز عوي.
سەزدەگى ماقسات ايقىن: وندا بۇگىنگى تاڭدا جاستارعا قاتىستى كەزەك كۇتپەي شەشىلۋى ءتيىس ماسەلەلەر ورتاعا تاستالادى, اتقارىلعان ىستەر مەن الىنعان اسۋلار جايلى ەسەپ بەرىلەدى. ەلباسى بۇل جيىننىڭ مارتەبەلى قوناعى بولادى. ءسوز سويلەپ, «جاس وتان» جاستار قاناتىنىڭ 2020 جىلعا دەيىنگى ۇزاق مەرزىمدى ستراتەگياسىنا نەگىزى بولارلىق ناقتى ۇسىنىستاردى تىڭدايدى. «جاس-تار – وتانعا!», «جاستار كادرلىق رەزەرۆى», «ەركىن ءپىكىر», «ديپلوممەن – اۋىلعا!», «قازاقشا سويلەسەيىك!» – بۇلار «جاس وتان» مۇشەلەرىنىڭ, جاس ماماندارىنىڭ جاساعان ارنايى جوبالارىنىڭ اتاۋلارى. كوبى قازىردىڭ وزىندە قولدانىستا. سەزدىڭ باس-تى جاڭالىعى دا سول ستراتەگيانىڭ تالقىلانۋى بولماق.
الدىڭعى سەزد وسىدان 4 جىل بۇرىن بولىپ وتكەنىن ەستەرىڭىزگە سالا كەتەيىك.
بۇل ستراتەگيا جاستار ساياساتىنا تىڭ جاڭالىقتار اكەلەدى دەپ كۇتىلۋدە. جاستاردىڭ جايى تۇزەلسە, ەلدىڭ بولاشاعىن بۇلدىراتقان بۇلت سەيىلەتىنى انىق.
بۇل جيىنعا «ارمان! ەڭبەك! سەنىم!» دەگەن ۇران بەرىلىپتى. دۇرىس الىنعان ۇران. اۋىلدان جاستاردىڭ ءبىر توبى ارمان قۋىپ قالاعا كەلەتىنى راس قوي. راس. ارمانعا جەتۋ ءۇشىن ءبىلىم كەرەك, ديپلوم قاجەت. ديپلوم قولعا تيىسىمەن باقىتتى ءومىر باستالارداي, اش قارىنعا قاراماي ارماندارىن زاڭعار بيىگىنەن ءبىر ءسات تۇسىرمەيتىنىن قايتەرسىڭ. ءسويتىپ, مەجەلى كۇنگە جەتكەندە جۇمىس تاپپاي ساندالادى جاستار. قىزىل ديپلومىنىڭ كوك تيىن قۇنى بولماي قالعانىنا قاتتى قاپالانعانداردى دا كوزىمىز كوردى. «مۇنداي بولارىن بىلسەم ەكىنشى كۋرس-تان سوڭ-اق جۇمىسقا شىعىپ كەتەتىن ەدىم» دەگەندەردى دە ەستىگەنبىز. ەكى كۋرستىق ءبىلىم جاس مامان ەلىمىزدىڭ كەتىلگەن بۇرىشىنا كىرپىش بولىپ قالانۋعا جاراي ما؟ جاراعانمەن سول مامان «قالانعان» ىرگەڭنەن جەل اڭىراپ تۇرسا نە بەتىڭدى ايتاسىڭ؟ ەرتەڭىنە ەكى شوقىپ, ءبىر قاراپ ەلەڭ دە الاڭ كۇي كەشىپ وتىرعان ستۋدەنتتىڭ باسىنا ءبىلىم قونا ما؟ سول ءۇشىن ستراتەگيا دەپ وتىرعانىمىز جاستاردىڭ جۇمىسپەن قامتىلۋىن قامتاماسىز ەتسە دەگەن ارمان-تىلەك ميلليونداعان جۇرەكتەردىڭ لۇپىلىمەن بىرگە سوعىپ تۇر. «ءلۇپىلىڭنىڭ» تاعدىرى تاياۋدا شەشىلەدى. ءسال سابىر.
ارمانىڭىز – جەتەككۇشىڭىز. ارمانعا جەگىلە ءبىلۋ دە – ونەر. ارمانسىزدار – قاتەرلى. ەندى كەلىپ ەڭبەك جولىن باستادىق دەلىك. ەرەسەك ءومىر عوي ول دەگەنىڭ. ەڭبەك جولىن باستاعان جاس-تار ءۇي ماسەلەسىمەن جەكپە-جەك كەلىپ, وڭباي جەڭىلىس تابادى (اۋىل جاستارى عوي كوبى). استاناداعى پاتەراقىنىڭ قۇنىنا «دجيپ» ءمىنىپ قۋساڭ دا, جەتە الار ەمەسسىڭ (قاي قالانى الىپ قاراساڭ دا جىرعاپ تۇرعانى شامالى). وسى تۇستا جاستاردىڭ تۇرعىن ءۇي ماسەلەسىنە دە اتالمىش ستراتەگيادا ورىن تابىلسا دەگەن قۋتىقاي تىلەك ساناڭدى قىتىقتايدى.
سەنىم دەيدى ءۇشىنشى ۇران. ءبىلىمدى ستۋدەنت بىلىكتى مامانعا اينالىپ, تۇرمىس تيتىققا الماي (مەملەكەت ماسەلەلەردى رەتتەپ بەرگەن جاعدايدا), تىرلىگى وڭعا باسسا, ول دا ويلانادى عوي. «وسى ەلىم ماعان بار مۇمكىندىكتى بەردى, باسىمدا باسپانام, ىستەرگە جۇمىسىم بار. قارىن توق, كويلەك كوك! ەندى ەل سەنىمىنە سەلكەۋ تۇسىرمەيىن, مەنىڭ دە سەبىم ءتيسىن» دەمەي مە؟! ۇرانعا الىنعان «ارمان! ەڭبەك! سەنىم!» سوزدەرى وسىلاي ساباقتاسىپ جاتسا, كىنارات تاقپاق تۇگىلى اينالىپ قانا كەتپەيسىڭ بە. ارمانعا جەتىپ, ەڭبەك ەتىپ, ءۇمىت كۇتىپ جۇرگەن جاستاردىڭ سەنىمى سەل كوشىرمەسىن, سەنەيىك!
ەربول جانات
