نۇر-سۇلتان قالاسىنىڭ 2022 جىلعا ارنالعان بيۋدجەتىن ناقتىلاۋ قالالىق ءماسليحاتتىڭ الەۋمەتتىك-مادەني دامۋ ماسەلەلەرى جونىندەگى تۇراقتى كوميسسيا وتىرىسىندا جالعاستى. جيىندا ەلوردانىڭ دەنە شىنىقتىرۋ جانە سپورت, قوعامدىق دەنساۋلىق ساقتاۋ, جۇمىسپەن قامتۋ جانە الەۋمەتتىك قورعاۋ, ءبىلىم, مادەنيەت, تىلدەردى دامىتۋ جانە ارحيۆ ءىسى باسقارمالارىنىڭ قاجەتتىلىكتەرىنە قوسىمشا قارجى ءبولۋ جايى قارالدى. جيىنعا قاتىسقان قالا اكىمىنىڭ ورىنباسارى ەسەت بايكەن كەيبىر ماسەلەلەردى ءتۇسىندىردى.
قالالىق دەنە شىنىقتىرۋ جانە سپورت باسقارماسىنا 17 ۆەدومستۆولىق مەكەمە قارايدى. بۇل تۋرالى بايانداعان اتالمىش باسقارما باسشىسىنىڭ ورىنباسارى الماس اباەۆ قازىر باس قالادا سپورتشىلار سانى 13041 ەكەنىن جەتكىزدى. ال باسقارمانىڭ بيىلعى 1 قاڭتارعا دەيىن بەكىتىلگەن بيۋدجەتى 11,3 ملرد تەڭگەنى قۇرادى.
– سپورتشىلاردى رەسپۋبليكالىق جانە حالىقارالىق جارىستارعا ساپالى دايىنداۋ, وقۋ-جاتتىعۋ دايىندىقتارىن وتكىزۋ, سپورتتىق قۇرال-جابدىقتاردى ساتىپ الۋ جانە جالپى ماتەريالدىق-تەحنيكالىق بازانى نىعايتۋ ءۇشىن قوسىمشا 15,9 ميلليارد تەڭگە كەرەك, – دەدى ا. اباەۆ.
قالالىق قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى سالتانات الدابەرگەنوۆا بۇل باسقارمانىڭ 2022 جىلعا ارنالعان بيۋدجەتى 16,7 ملرد تەڭگە بولىپ بەكىتىلگەنىن جەتكىزدى. سونىڭ 3 ملردى – رەسپۋبليكالىق بيۋدجەتتەن, 13,6 ملردى – جەرگىلىكتى بيۋدجەتتەن بولىنگەن. ەندى ءارتۇرلى جۇمىستارعا قوسىمشا 9,4 ملرد تەڭگە كەرەك.
جۇمىسپەن قامتۋ جانە الەۋمەتتىك قورعاۋ باسقارماسىنا قوسىمشا 3 ملرد 547 ملن 349 مىڭ تەڭگە قاجەت. بۇل تۋرالى ايتقان وسى باسقارمانىڭ باسشىسى ساۋلە نۇرعوجينا اتالعان قارجى جۇمىسپەن قامتۋ باعدارلاماسىن ىسكە اسىرۋعا, «قاتاركول» بەيىمدەۋ ورتالىعى قىزمەتكەرلەرىنىڭ جالاقىسىن وسىرۋگە, جەڭىس كۇنىنە وراي ۇلى وتان سوعىسىنا قاتىسۋشىلارعا, بارلىعى 18 ارداگەرگە الەۋمەتتىك كومەك بەرۋگە, باسقا دا ماقساتتارعا باعىتتالادى.
ءبىلىم باسقارماسى باسشىسىنىڭ ورىنباسارى ناريمان ەلامانوۆ اتالمىش باسقارمانىڭ بيىلعى بيۋدجەتى 149 ملرد تەڭگەنى قۇرايتىنىن ايتا كەلە, العاشقى ناقتىلاۋ كەزىندە بيۋدجەت 4,4 ملرد تەڭگەگە كوبەيگەنىن جەتكىزدى. ال بۇل جولعى ناقتىلاۋدا بۇل باسقارما قوسىمشا 22,2 ملرد تەڭگە سۇراپ وتىر. ونىڭ باسىم بولىگى جالاقى مەن كوممۋنالدىق قىزمەتتەرگە جۇمسالماق. كاپيتالدى شىعىندار دا بار. بالالار جىلىن وتكىزۋ دە قارجى كەرەك. قوسىمشا قارجىعا قالا اكىمىنىڭ گرانتى شىعىندارى دا كىرەدى.
مادەنيەت باسقارماسىنىڭ باسشىسى سانات شاپاشوۆ باسقارماعا بيىل قوسىمشا 7 ملرد 879 ملن تەڭگە كەرەك ەكەنىن باياندادى. بۇل قارجى مەملەكەتتىك شىعارماشىلىق تاپسىرىستى ىسكە اسىرۋعا, بالالارعا تەاترلاردىڭ قويىلىمدارىن تەگىن تاماشالاۋعا مۇمكىندىك بەرەتىن «بالالار جانە تەاتر» باعدارلاماسىنا, «شەت ايماقسىز قالا» جوباسىنا جۇمسالماق. جاڭعىرتىلۋى اياقتالعان «جاستار» سارايىنىڭ قاجەتتىلىكتەرىنە, «جاستار», «ناز», «مۋزىكالىق جاس كورەرمەن» تەاترلارىنا, ە. راحماديەۆ اتىنداعى مەملەكەتتىك اكادەميالىق فيلارمونياعا قوسىمشا قارجى كەرەك. استانالىق تسيرك «ازيا جاڭعىرىعى» فەستيۆالىن جاڭعىرتپاق. سوعان دا قاراجات ءبولىنۋى كەرەك. جالپى بايانداماشى قالالىق مادەنيەت باسقارماسىنا قاراستى ءبىراز مادەني وشاققا قوسىمشا قارجى ءبولۋدى سۇرادى.
تىلدەردى دامىتۋ جانە ارحيۆ ءىسى باسقارماسىنىڭ باسشىسى ساكەن ەسىركەپ وسى جىلعا باسقارماعا 310 ملن 859 مىڭ تەڭگە كەرەك ەكەنىن باياندادى. سونىڭ ىشىندە ءتىل ساياساتىن ىسكە اسىرۋعا, ارحيۆ ءىسىن دامىتۋعا اقشا كەرەك. بايانداماشىلاردى تىڭداعان ءماسليحات دەپۋتاتتارى ساۋالداردى قويىپ, ۇسىنىستارىن ايتتى.
