استانا قالاسىنىڭ اكىمى اسەت يسەكەشەۆ «استانا قالاسىنىڭ كۇندەرى» اياسىندا ىسساپارمەن قاراعاندى وبلىسىندا بولىپ, ايماقارالىق ىنتىماقتاستىقتى دامىتۋ تالقىلانعان «استانا قالاسى – قاراعاندى وبلىسى وڭىرارالىق ىنتىماقتاستىق» بيزنەس-فورۋمىنا قاتىستى.
– بۇگىنگى تاڭدا قاراعاندى – ءبىز بارعان سەگىزىنشى ايماق. باسقا وڭىرلەرمەن بىرگە ەلوردامىز جەمىستى ىنتىماقتاستىقتى جۇزەگە اسىرۋدا. ساپار بارىسىندا 52 مەموراندۋم جاسالدى. 60-تان استام مادەني جانە سپورتتىق ءىس-شارا وتكىزىلدى. 45 مىڭنان استام قوناق قاتىستى. بارلىق وڭىرلەرگە ىنتىماقتاستىق جانە قولداۋ كورسەتكەنى ءۇشىن العىسىمدى بىلدىرگىم كەلەدى, – دەدى اسەت يسەكەشەۆ.
قاراعاندى وبلىسىنىڭ اكىمى ەرلان قوشانوۆ اقپاراتتىق تەحنولوگيالار سالاسىنداعى ىنتىماقتاستىقتى دامىتۋ ءتيىمدى ءارى كەرەك دەپ سانايدى. ايماق باسشىسى «استانا حاب» IT-ستارتاپ حالىقارالىق تەحنوپارك شەڭبەرىندە جالپى كلاستەرگە بىرىگۋدى ۇسىندى. قاراعاندى وبلىسىنىڭ استاناعا جاقىندىعى وڭىرارالىق كووپەراتسيانى نىعايتۋعا مۇمكىندىك بەرەتىنىن ايتىپ ءوتتى.
قاراعاندى – ەلوردانىڭ ازىق-تۇلىك بەلدەۋىنىڭ قاتىسۋشىسى. مۇندا استانانى ونىمدەرىمەن جابدىقتايتىن 2 مىڭنان استام اۋىل شارۋاشىلىعى قۇرىلىمدارى مەن قايتا وڭدەۋ كاسىپورىندارى بار. 2018 جىلى «ورتالىق-وڭتۇستىك» كولىك ءدالىزىن قايتا جاڭعىرتۋ» اياسىنداعى «استانا-قاراعاندى» اۆتوبان قۇرىلىسىنىڭ اياقتالۋى ايماقتاردى ودان ءارى جاقىنداتا تۇسپەك.
