اپاتتىڭ سەبەبى انىقتالدى
«استانا ەكسپو-2017» كورمەسى اۋماعىنداعى كوپىر قۇراستىرماسى ساپاسىز ماتەريالدار سالدارىنان وپىرىلىپ تۇسكەن. ياعني جوبالاۋ بارىسىندا تالاپقا ساي كەلەتىن مەتالل كونسترۋكتسيالار دۇرىس تاڭدالىپ الىنباعان.
حالىقارالىق مامانداندىرىلعان كورمەنىڭ قوعاممەن بايلانىس دەپارتامەنتىنىڭ ديرەكتورى سەرگەي كۋيانوۆتىڭ ايتۋىنشا, اتالعان وقيعا بويىنشا ارنايى كوميسسيا قۇرىلىپ, تاۋەلسىز ساراپتاما جاسالعان. «ساراپتاما بارىسىندا وپىرىلۋدىڭ قۇراستىرماداعى قاتەلىكتەن بولعانى انىقتالدى. ياعني قۇلاپ تۇسكەن قۇراستىرمانى جوبالاعان قوسالقى مەردىگەر مەتالدىڭ باسقا ءتۇرىن پايدالانعان» دەيدى سەرگەي كۋيانوۆ.
كورمە كەشەنىندە باس-اياعى سەگىز قۇراستىرما بولعان. جاۋاپتى مەردىگەر بۇل قۇراستىرمالاردىڭ تورتەۋىن ءوزى جوبالاپ, قالعان تورتەۋىنە قوسالقى مەردىگەر تارتقان. ناقتى وسى قۇراستىرمانى جوبالاعان قوسالقى مەردىگەر مەتالدىڭ باسقا ءتۇرىن پايدالانعان. مامانداردىڭ ايتۋىنشا, كورمە كەشەنىن تاپسىرىس بەرۋشى ءالى قابىلداعان جوق. سوندىقتان بارلىق شىعىنداردى مەردىگەر كومپانيا – BI Group وتەيدى. بۇگىندە وسى ىسپەتتى باسقا دا كونسترۋكتسيالاردى كۇشەيتۋ جۇمىستارى جۇرگىزىلىپ, ءاربىر دەكوراتيۆتى ەلەمەنتتىڭ ورتاسىنا قوسىمشا تىرەۋىشتەردى ورناتۋ تۋرالى شەشىم قابىلدانىپ وتىر.
بۇركىت نۇراسىل