وسى اپتاداعى ۇكىمەت وتىرىسىندا «قولجەتىمدى باسپانا – 2020» باعدارلاماسى قابىلداندى.
مەملەكەت 2020 جىلعا دەيىن حالىقتى ميلليونداعان شارشى مەتر تۇرعىن ۇيمەن قامتاماسىز ەتپەكشى. بىراق, نە بيۋدجەت, نە مەملەكەتتىك ساناتقا جاتپايتىن, جالاقىسى ماردىمسىز جۋرناليستەر قاۋىمى ءۇشىن بۇل باعدارلامامەن باسپانالى بولۋدىڭ اۋىلى الىس ءتارىزدى.
«ءتورتىنشى بيلىك» وكىلدەرىن تۇرعىن ۇيمەن قامتۋدىڭ وزگە قانداي تەتىگى بار؟
سەرىك نوكين,
تۇرعىن ءۇي-كوممۋنالدىق شارۋاشىلىق ىستەرى اگەنتتىگىنىڭ توراعاسى:
– جەكە سالا وكىلدەرىنە ارناپ بولەك باسپانا سالا المايمىز, وعان ارنالعان قارجى دا جوق. بۇعان دەيىن جۋرناليستەر شەتتە قالدى دەگەن ماسەلە كوتەرىلىپ ەدى. ەندى ولار ەكى باعىت بويىنشا, اتاپ ايتقاندا, «جاس وتباسى» جانە «قازاقستاننىڭ تۇرعىن ءۇي قۇرىلىس جيناق بانكىندە» اقشا جيناقتاۋ ارقىلى قاتىسا الادى.
جابال ەرعاليەۆ,
پارلامەنت سەناتىنىڭ دەپۋتاتى:
– جۋرناليستەردىڭ جانىن قينايتىنى جالاقىنىڭ ازدىعى عوي. كرەديت بەرىلمەيدى, يپوتەكاعا مۇلدە ماڭايلاي المايدى. مەملەكەتتىك تۇرعىن ءۇي باعدارلاماسىنىڭ ءبىر دە ءبىر كاتەگورياسىنا ەنبەي قالدى. جۋرناليستەر ءداپ ءبىر اۋا مەن جەردىڭ ورتاسىندا قالقىپ ءومىر ءسۇرۋى كەرەك سياقتى. بۇل وزگە سالانىڭ ماماندارىندا دا كەزدەسەتىن ماسەلە شىعار. بىراق, جۋرناليستەردىڭ جايى ماعان جاقسى تانىس بولعاندىقتان ايتىپ وتىرمىن. حالىق قالاۋلىلارى ۇكىمەتتىڭ الدىنا وسى ماسەلەنى شىعارعانبىز. ءبىر شەشىمىن تاۋىپ, جاۋابىن بەرۋى ءتيىس. جۋرناليستەردى «قولجەتىمدى باسپانا – 2020» باعدارلاماسىنىڭ بيۋدجەت نەمەسە مەملەكەتتىك قىزمەتكەر ساناتىنا ەنگىزسىن. يا بولماسا, ورتاشا جالاقىسى 80-90 مىڭ بولاتىن جۋرناليستەرگە يپوتەكا بەرەتىن بولسىن. «ءتورتىنشى بيلىك» دەگەن مارتەبەسى بار ەمەس پە, بۇل ماسەلەنى تىلشىلەر قاۋىمى وزدەرى ءبىراۋىزدان كوتەرۋى كەرەك. ارينە, مەملەكەت تەك جۋرناليستەر ءۇشىن بولەك باعدارلاما جاساپ بەرمەسى انىق. ول مۇمكىن ەمەس نارسە. جۋرناليستيكادا 30 جىل جۇرگەن جاننىڭ الەۋمەتتىك جاعدايى جەكەمەنشىك مەكەمەلەر مەن ۇلتتىق كومپانيالاردا ءۇش جىل ىستەگەن جانمەن سالىستىرۋعا مۇلدە كەلمەيدى. ءبىز ايعايلاماي, بايبالام سالماي وسى ماسەلەگە بيلىكتەگىلەردىڭ كوزىن جەتكىزۋىمىز كەرەك. «ارقالاعانى التىن, جەگەنى جانتاق» جۋرناليستەر ءوز مۇددەسىن قورعاۋ كەرەك.
