ەركەعالي راحماديەۆ اتىنداعى مەملەكەتتىك اكادەميالىق فيلارمونيا اقيىق اقىن مۇقاعالي ماقاتاەۆتىڭ تۋعان كۇنىنە وراي ادەبي-سازدى كەش وتكىزۋدى داستۇرگە اينالدىردى. ءار جىل سايىن 9 اقپان كۇنى ونەر وشاعىنىڭ كونتسەرت زالىندا قازاق پوەزياسىنىڭ «ءحانتاڭىرى» اتانعان اقىننىڭ ولمەس ولەڭدەرى وقىلىپ, سوزدەرىنە جازىلعان اندەر اۋەلەيدى. بيىل دا ونەر ورداسى «ەسىڭە مەنى العايسىڭ» كەشىن ۇسىندى.
مۇزبالاق اقىننىڭ جاۋھار جىرلارى تالاي كومپوزيتوردىڭ اندەرىنە ازىق بولدى. اقىنداردىڭ ىشىندە ەڭ كوپ ءان مۇقاعاليدىڭ ولەڭدەرىنە جازىلدى دەسەك, ءسىرا, قاتەلەسە قويماسپىز. سونىڭ ىشىندە نۇرعيسا تىلەنديەۆ پەن تۇرسىنعازى راحيموۆتىڭ ەسىمدەرىن ەرەك اتاپ وتۋگە بولادى. مۇقاعاليدى ءان الەمىنە تارتقان دا نۇرعيسا ەدى. ەكەۋى 35 كۇن بىرگە ءجۇرىپ, 31 ءان جازعانى جايىندا دەرەك كەزدەسەدى. ال تۇرسىنعازىنىڭ «ءسابي بولعىم كەلەدى», «نەنى اڭسايمىن؟», «اياگوز ارۋ», «قازاعىم-اي» اندەرىن بىلمەيتىن قازاق كەمدە-كەم.
جالپى اقيىق اقىننىڭ ولەڭدەرىن ەڭبەكتەگەن بالادان ەڭكەيگەن قارتقا دەيىن ءسۇيىپ وقيدى. ماسەلەن, كومپوزيتور مۇراتحان ەگىنباەۆ مەكتەپ جاسىندا مۇقاعاليدىڭ جىرلارىنا قۇمار بولدى. سونىڭ اسەرىمەن 8-سىنىپتا وقىپ جۇرگەنىندە «قۇمعان العان» ءانىن شىعاردى. ال وسى كەشكە اتاۋ بەرگەن «ەسىڭە مەنى العايسىڭ» ولەڭى اقىن, كومپوزيتور ەلەنا ابدىحالىقوۆاعا 20 جاسىندا ادەمى ءان تۋدىردى. ءدال وسى ولەڭگە نۇرعيسا تىلەنديەۆ تە ءان جازدى. بىراق ەل اراسىنا ەلەنانىڭ ءانى كەڭ تارالىپ كەتتى. سونىمەن قاتار تولەگەن مۇحامەدجانوۆ, تۇرسىنجان شاپاي, گۇلنار داۋكەنوۆا, بولات ەسمۇحانوۆ, كەنتاۋ نازاربەك, باسقا دا تانىمال كومپوزيتورلاردىڭ مۇقاعاليدىڭ ولەڭدەرىنە جازىلعان اندەرى ەل اۋزىندا ءجۇر. اقيىق اقىننىڭ جىرلارىنا تالاي ءان ءالى دە جازىلىپ جاتىر. وسى كەشتە دە حالىققا تانىس اندەر مەن ءالى كوپشىلىككە جەتە قويماعان تۋىندىلار اۋەلەدى, جىرلارى وقىلدى.
استانالىق فيلارمونيانىڭ «ەسترادالىق ۆوكال» ءبولىمى (كوركەمدىك جەتەكشىسى – قازاقستاننىڭ ەڭبەك سىڭىرگەن قايراتكەرى ارايلىم راحىم) ۇيىمداستىرعان وسى كەشكە سۆەتلانا ايتباەۆا, گۇلنۇر ورازىمبەتوۆا, ۇلىقپان جانە فاريدا جولداسوۆتار, زارينا وماروۆا سىندى تانىمال انشىلەرمەن قاتار, حالىقارالىق جانە رەسپۋبليكالىق بايقاۋلار مەن فەستيۆالدەردىڭ لاۋرەاتتارى التىنشاش مۇقاتاەۆا, اقبوتا قۇسنادين, اكىمحان ماجەنوۆ, مۇراتبەك حايرولدا, ايدىن جۇماباي, قىمبات جامبىلبەك, پاراسات وتان, فيلارمونيانىڭ «قورقىت» ەتنو-فولكلورلىق انسامبلى, «شالقىما» حالىق بي انسامبلى, كامەرالىق حور جانە «اينالايىن» بالالار حورى قاتىسىپ, ونەر كورسەتتى.
