ارانداتۋشىلاردان ابايلاڭىز!
باس پروكۋراتۋرا ەلوردالىقتاردى مەرەكە كۇندەرى ارانداتۋشىلىققا بەرىلمەۋگە شاقىرىپ, ۇندەۋ جاريالادى.
«الەۋمەتتىك جەلىلەر مەن مەسسەندجەرلەردە وسى جىلدىڭ 9 مامىرىندا زاڭسىز شەرۋگە قاتىسۋعا ۇگىتتەۋدە. بيىلعى 1 مامىر كۇنى كەيبىر ازاماتتار قۇزىرلى مەملەكەتتىك ورگاندار قىزمەتكەرلەرىنىڭ ەسكەرتۋىن ەلەمەي, زاڭسىز شەرۋلەرگە شىعىپ, اكىمشىلىك جاۋاپكەرشىلىككە تارتىلدى. ولاردىڭ قۇقىقتىق تارتىپكە قايشى ءىس-ارەكەتتەرىنەن ازاماتتاردىڭ دەمالۋىنا جانە تىنىشتىعىنا قاۋىپ ءتوندى», – دەلىنگەن حابارلامادا.
ال ەلورداداعى «جاۋجۇرەك پولك – بەسسمەرتنىي پولك» شەرۋىنىڭ ۇيلەستىرۋ كەڭەسىنىڭ جەتەكشىسى ايدا بايماقوۆا اتالعان شاراعا قاتىسۋشىلارعا ءار وتباسىنىڭ جەكە ەستەلىگىنە قۇرمەتپەن قاراپ, شەرۋدى قانداي دا ءبىر ساياسي ماقساتتارعا پايدالانۋعا جول بەرمەۋگە ۇندەدى. «ءبىز شەرۋ اياسىندا جارنامالىق جانە كورپوراتيۆتىك سيمۆوليكانىڭ قولدانىلۋىن ار-نامىسىمىزدى قورلاۋ دەپ ەسەپتەيمىز» دەلىنگەن وسى ۇندەۋدىڭ ماتىنىندە. ءتورت جىلدان بەرى وتكىزىلىپ كەلە جاتقان شەرۋ فاشيزممەن كۇرەستە قازا بولعان قازاقستاندىقتاردىڭ رۋحىنا تاعزىم ەتۋدى كوزدەيدى.