ەلىمىزدە سايلاۋ دوداسىنىڭ كورىگى قىزا تۇسۋدە. 6 مامىردا ورتالىق سايلاۋ كوميسسياسى (وسك) مەملەكەتتىك ءتىل سىناعىنان سۇرىنبەي وتكەن 7 ۇمىتكەردى رەسمي تۇردە تىركەدى. جەتى ادام پرەزيدەنتتىككە ۇمىتكەر كۋالىگىن الدى. ولار: قاسىم-جومارت توقاەۆ (Nur Otan پارتياسى), سادىبەك تۇگەل («ۇلى دالا قىراندارى» قوزعالىسى), امانگەلدى تاسپيحوۆ (قازاقستاننىڭ كاسىپوداقتار قاۋىمداستىعى), دانيا ەسپاەۆا (Aq Jol پارتياسى), تولەۋتاي راحىمبەكوۆ («اۋىل» پارتياسى), جامبىل احمەتبەكوۆ (قازاقستاننىڭ كوممۋنيستىك حالىقتىق پارتياسى), ءامىرجان قوسانوۆ («ۇلت تاعدىرى» قوزعالىسى). اۋەلدە ۇمىتكەر رەتىندە قۇجات تاپسىرعان 9-دىڭ ەكەۋى دوداعا قاتىسپايتىن بولدى. ونىڭ ءبىرى – تالعات ەرعاليەۆ ءوز ەركىمەن باس تارتسا, جۇماتاي اليەۆ ءتىل سىناعىنان وتە المادى.
ايتا كەتەلىك, مەملەكەتتىك ءتىل سىناعىنان كەيىن ۇمىتكەرلەرگە قول جيناۋ پاراقشالارى بەرىلدى. تالاپ بويىنشا ارقايسىنا ەلەكتوراتتىڭ 1 پايىزىنىڭ نەمەسە كەمىندە 118140 ادامنىڭ قولىن جيناۋعا مىندەتتەلدى. وسك راس دەپ تانىعان قولدار بويىنشا رەيتينگتىڭ كوشىن قاسىم-جومارت توقاەۆ (313653) باستادى. ودان كەيىنگى ورىندارعا: دانيا ەسپاەۆا (139541), جامبىل احمەتبەكوۆ (135506), ءامىرجان قوسانوۆ (129582), تولەۋتاي راحىمبەكوۆ (120754), سادىبەك تۇگەل (120175), امانگەلدى تاسپيحوۆ (119577) جايعاستى.
ۇمىتكەرلەردى تىركەۋ كەزەڭى 11 مامىردا ساعات 18.00-گە دەيىن جالعاسۋى ءتيىس ەدى. الايدا وسك ۇمىتكەردىڭ زاڭ تالاپتارىنا سايكەستىگىن انىقتاۋ تۋرالى مالىمەتتەردى ۇسىنۋ مەرزىمىن جانە قول قويۋ پاراقتارىن بەرۋ مەرزىمىن قىسقارتۋ, سونداي-اق قول قويۋ پاراقتارىن تەكسەرۋ مەرزىمىن 5 كۇنگە دەيىن قىسقارتۋ ۇمىتكەرلەردى تىركەۋ كەزەڭىن مەرزىمىنەن بۇرىن اياقتاۋعا مۇمكىندىك بەرگەنىن حابارلادى.
وسك بۇقارالىق اقپارات قۇرالدارىندا ءسوز سويلەۋ ءۇشىن ۇمىتكەرلەرگە قاراجات ءبولۋ ەرەجەلەرى مەن كولەمىن بەكىتتى. ۇمىتكەرلەردىڭ شىعىستارىنىڭ مولشەرى 7337200 تەڭگە كولەمىندە بەلگىلەندى. ۇمىتكەردىڭ سايلاۋ قورى مىنالاردان قۇرالادى: ءوز قاراجاتى مەن ونى ۇسىنعان بىرلەستىك بولگەن اقشا كولەمى 510 ملن تەڭگەنى, ەل ازاماتتارى مەن ۇيىمدارىنىڭ قايىرىمدىلىق قاراجاتى 637500000 تەڭگەنى قۇرايدى. وسك سايلاۋ قورىتىندىلارى جاريالانعان كەيىن 10 كۇن ىشىندە باق-تا سايلاۋ قورىنا كەلىپ تۇسكەن اقشانىڭ جالپى سوماسى ونىڭ كوزدەرى تۋرالى اقپارات جاريالايدى.
سايلاۋ الدىنداعى ۇگىتتى ۇمىتكەرلەر ءۇش ءتۇرلى تاسىلمەن: باق ارقىلى, سايلاۋ الدىنداعى كوپشىلىك ءىس-شارالارى, سەنىم بىلدىرگەن تۇلعالارىنىڭ كەزدەسۋلەرىن وتكىزۋ ارقىلى جانە باسپا, دىبىس-بەينە جانە وزگە دە ۇگىت ماتەريالدارىن شىعارۋ جانە تاراتۋ ارقىلى جۇزەگە اسىرادى. جيىنعا قاتىسقان باس پروكۋروردىڭ ورىنباسارى بولات دەمباەۆ سايلاۋعا قاتىستى ساۋالناما جۇرگىزۋگە وسك-عا الدىن الا ەسكەرتكەن, كەمىندە 5 جىلدىق تاجىريبەسى بار زاڭدى تۇلعالار عانا قۇقىلى ەكەنىن ءمالىم ەتتى. «جەكە تۇلعالاردىڭ مۇنداي قۇقىعى جوق. مىسالى, ءبىر باسىلىم وسىنداي ساۋالناما جۇرگىزگەن. ونىڭ يەسىنە زاڭ بۇزۋشىلىققا بارعانى ءۇشىن اكىمشىلىك ءىس قوزعالدى» دەدى ول.
