ادامزات تاريحىندا بولعان ەڭ سۇراپىل سوعىستىڭ اياقتالعانىنا بيىل 74 جىل تولدى. 1941-1945 جىلدار ارالىعىندا ميلليونداعان ادام قازا بولىپ, قانشاما جاۋىنگەر جارالى ورالدى. كەشە نۇر-سۇلتان اكىمدىگىنىڭ ۇيىتقى بولۋىمەن ۇلى وتان سوعىسىندا ەلىن-جەرىن قورعاعان جاۋىنگەرلەردىڭ زيراتىنا «داڭق گۇل شوقتارى» مەن گۇل سەبەتتەرى قويىلدى.
جيىنعا ۇلى وتان سوعىسىنىڭ ارداگەرلەرى, تىل ەڭبەككەرلەرى, قازا تاپقانداردىڭ تۋىستارى, نۇر-سۇلتان قالاسى اكىمدىگىنىڭ باسشىلىعى, قوعامدىق جانە جاستار ۇيىمدارىنىڭ وكىلدەرى قاتىستى.
– قانشاما قيىندىق كوردىك. كوز الدىمىزدا وق قارشا بوراپ, جاۋىنگەرلەر بىرىنەن كەيىن ءبىرى قازا بولىپ جاتتى. شىبىن جانىمىزدى شۇبەرەككە ءتۇيىپ ءجۇرىپ, قان كەشتىك. ول ۋاقىت تا ءوتتى عوي. قوي ۇستىنە بوزتورعاي جۇمىرتقالاعان دەگەن زامان وسى شىعار؟! ەلىمىز, جەرىمىز امان بولعاي! ەندىگىسى وزدەرىڭە امانات, – دەدى سالتاناتتى راسىمدە قارت ارداگەر جۇماعالي تولەگەنۇلى.
قازىرگى ۋاقىتتا باس قالامىزدا ۇلى وتان سوعىسىنا قاتىسقان 71 ارداگەر, 4000-عا جۋىق تىل ەڭبەككەرى تۇرادى. بيىل نۇر-سۇلتان قالاسى ءماسليحاتىنىڭ شەشىمىمەن ۇلى وتان سوعىسىنىڭ بارلىق ارداگەرىنە 67 اەك (169175 تەڭگە), سونداي-اق قوسىمشا 350000 تەڭگە كولەمىندە ءبىر جولعى اقشالاي كومەك كورسەتىلدى.
– ءبىز 9 مامىر قارساڭىندا ۇلى وتان سوعىسىندا العان جاراقاتىنان دۇنيەدەن وزعان جانداردىڭ رۋحىنا تاعزىم ەتىپ, گۇل شوقتارىن قويۋ ءراسىمىن وتكىزۋدى داستۇرگە اينالدىردىق. ولاردىڭ ەرلىگى ەشقاشان ۇمىت قالماۋى ءتيىس, باتىر بابالارىمىزدىڭ ەسىمىن جادىمىزدا ۇستاۋ ەرتەڭىمىز ءۇشىن وتە ماڭىزدى. ارداگەرلەرىمىزدى, بارشا قازاقستاندىقتاردى جەڭىس كۇنى مەرەكەسىمەن قۇتتىقتايمىن! – دەدى نۇر-سۇلتان قالاسى اكىمىنىڭ ورىنباسارى ەرلان قاناليموۆ.
ايتا كەتەيىك, ۇوس ارداگەرلەرىنە مەرزىمدى باسىلىمدارعا جازىلۋ, مونشاعا, شاشتارازعا بارۋ جانە ساناتوريالىق ەمدەلۋ ءۇشىن الەۋمەتتىك كومەك كورسەتىلەدى. سونداي-اق قالالىق اۆتوبۋستاردا جول جۇرۋگە ارنايى جەڭىلدىكتەر قاراستىرىلعان, ءتىس پروتەزدەۋ تەگىن جۇرگىزىلەدى.
