ءجون-جوسىقسىز سالىنعان ايىپپۇل مەن ارەندالىق تولەمنىڭ قىمباتتاۋى ەلوردانىڭ ورتالىق بازارىندا ساۋدا جاسايتىن جەكە كاسىپكەرلەردى اشىندىرىپ وتىر. بازار اكىمشىلىگىمەن ءوزارا ىمىراعا كەلە الماعان ساۋداگەرلەر مۇڭىن وسىندا ارنايى كەلىپ, كوشپەلى قوعامدىق قابىلداۋ وتكىزگەن «نۇر وتان» پارتياسى استانا قالالىق فيليالى توراعاسىنىڭ ءبىرىنشى ورىنباسارى ساپار احمەتوۆكە جەتكىزدى.
كاسىپكەرلەرمەن كەزدەسكەن ساپار قايراتۇلى ەلباسىنىڭ تاپسىرماسىمەن شاعىن جانە ورتا بيزنەستى دامىتۋعا بايلانىستى ەلىمىزدە كوپتەگەن شارالار قولعا الىنىپ جاتقانىن, سونىڭ ءبىر ايعاعى –2 ساۋىردەن باستاپ, 2015 جىلدىڭ 1 قاڭتارىنا دەيىن شاعىن جانە ورتا بيزنەس سۋبەكتىلەرىن تەكسەرۋگە موراتوري جاريالانۋى ەكەندىگىن العا تارتتى.
– پرەزيدەنتتىڭ بۇل تاپسىرماسى – كاسىبىن جۇرگىزىپ وتىرعان ءار ازاماتقا ۇلكەن كومەك. مۇنداي ىستەن «نۇر وتان» پارتياسىنىڭ ەلوردالىق فيليالى دا سىرت قالا المادى. بۇل – جۇمىسىمىزدىڭ باسى عانا. الداعى ۋاقىتتا الدىن الا جاسالعان كەستە بويىنشا قالاداعى بارلىق ساۋدا ورىندارى مەن بازارلاردا جۇمىس ىستەيتىن كاسىپكەرلەرمەن ۇدايى كەزدەسۋ وتكىزىپ تۇراتىن بولامىز, –دەدى ساپار احمەتوۆ.
پارتيانىڭ قالالىق فيليالى جۇرگىزگەن كوشپەلى قوعامدىق قابىلداۋ جيىنىنا ەلوردانىڭ ىشكى ىستەر دەپارتامەنتى, پروكۋراتۋرا, كاسىپكەرلىك جانە ونەركاسىپ باسقارماسى, قارجى پوليتسياسى سەكىلدى مەملەكەتتىك ورگانداردىڭ وكىلدەرى قاتىستى. بيلىك وكىلدەرىنە مۇڭىن شاققان جەكە كاسىپكەرلەر ورتالىق بازاردىڭ ارەندالىق قۇنى اياق استىنان كوتەرىلىپ, ابىگەرگە سالىپ قويعانىن ايتتى. ول ول ما, ساۋداگەرلەر ەلەكتر شامىن جاققانىمىز ءۇشىن ارقايسىمىز ايىنا 10 مىڭ تەڭگەگە جۋىق اقشا تولەيمىز دەپ قىنجىلىپ وتىر. «بۇل بازار العاشىندا ادام اياعى تيمەگەن يەن دالا بولاتىن. ءبىز جوقتان بار جاساپ, اۋپىرىمدەپ اياعىمىزدان تۇردىق. سول كەزدە ساتىپ العان ورنىمىزدى بازار اكىمشىلىگى وزىمىزگە قايتادان ساتپاقشى. ولار باسىمىزعا ابدەن شىعىپ الدى. قىلت ەتسە ايىپپۇل سالادى. قارسى ءسوز ايتساڭ, بازاردان قۋىپ جىبەرەمىز دەپ قورقىتادى. ەندى كەلىپ اۋكتسيون دەگەندى شىعاردى. ونىڭ باعاسى ۋداي. ءبىزدىڭ دە قولىمىزعا قاراپ وتىرعان وتباسىمىز, بالا-شاعامىز بار. ارتىق جاتقان اقشامىز جوق» دەيدى كاسىپكەرلەر جىلارمان بولىپ.
جيىندا ءسوز سويلەگەن استانا قالالىق قارجى پوليتسياسى دەپارتامەنتى كولەڭكەلى ەكونوميكا سالاسىنداعى قىلمىستاردى اشۋ باسقارماسىنىڭ باستىعى باقىتجان بايحانوۆ ورتالىق بازار اكىمشىلىگى كاسىپكەرلەرگە ايىپپۇل سالۋعا ەشقانداي دا قۇقىعى جوقتىعىن, بۇل تەك ءتيىستى مەملەكەتتىك ورگانداردىڭ وكىلەتتىلىگىنە جاتاتىنىن جەتكىزدى. «سىزدەردەن جيناعان قوماقتى قارجى قايدا كەتىپ جاتىر؟ اقشا جيناۋ قانشالىقتى زاڭدى؟ ءبىز وسى ماسەلەلەردى بۇگىننەن باستاپ ەگجەي-تەگجەي تەكسەرىپ, ءتيىستى شەشىمدەر قابىلدايتىن بولامىز» دەدى ول.
سونداي-اق, كاسىپكەر ازاماتتاردىڭ ارىز-شاعىمىن «نۇر وتاننىڭ» قالالىق فيليالى دا ەسكەرۋسىز قالدىرماۋعا ۋادە بەردى. ساپار قايراتۇلىنىڭ ايتۋىنشا, كەز كەلگەن بيزنەستىڭ دامۋىنا مەملەكەت مۇددەلى. سوندىقتان, كاسىپكەرلەردى قولداپ, ولاردىڭ كاسىبى العا باسۋىنا پارتيا قولدان كەلگەن كومەكتى كورسەتۋگە ءازىر.
قىمبات نۇرعالي
