قازاقستان چەمپيوناتى پرەمەر ليگاسىنىڭ 2014 جىلعى فۋتبول ماۋسىمى مارەسىنە جەتتى.
«استانا» – التىن, «اقتوبە» – كۇمىس, «قايرات» قولا جۇلدەگەر اتاندى.
چەمپيونات باستالعالى قىزۋ باسەكەگە تۇسكەن «استانا» مەن «قايرات» كوماندالارى اراسىن وسىدان ءبىر جارىم اي بۇرىن 8 ۇپاي ءبولىپ تۇرعان ەدى. بىرىنشىلىكتىڭ سوڭعى ويىنىندا دا وسى ەكى كلۋب ءبىر- بىرىنە قارسىلاس بولدى. نەسىن جاسىرامىز, سوندا جانكۇيەر قاۋىم «قايرات» ەندى چەمپيوندىق اتاقتى ەشكىمگە ۇستاتا قويماس دەگەن ويدا بولعان ەدىك. الايدا, الماتىلىقتاردىڭ سوڭعى تۋرلارداعى سۇرەڭسىز ويىندارى, ەسەسىنە استانالىقتاردىڭ جيناقى ويىندارى چەمپيوناتتىڭ سوڭىن ناعىز تارتىسقا اينالدىرىپ, ناتيجەسىندە «استانا» كومانداسى ءوز تاريحىندا ءبىرىنشى رەت ەل چەمپيونى اتاعىن جەڭىپ الدى.
ايتا كەتەلىك, وسىعان دەيىن «استانا ارەنا» ستاديونىندا قىزىلوردانىڭ «قايسارىن» قابىلداپ جەڭىسكە جەتكەن, سونىمەن قاتار ۇلتتىق بىرىنشىلىكتى دە الدىن الا ۇتىپ العان «استانا» كلۋبى ويىنشىلارى مەن باپكەرلەرىنە قازاقستان فۋتبول فەدەراتسياسىنىڭ پرەزيدەنتى ادىلبەك جاقسىبەكوۆ التىن مەدالدارىن سالتاناتتى جاعدايدا تابىس ەتتى. كوماندا كاپيتانى قايرات نۇرداۋلەتوۆ باس سىيلىقتى باسىنان بيىك كوتەرىپ تۇرىپ, ءوز جانكۇيەرلەرىنە ريزاشىلىعىن ءبىلدىردى.
ال ەندى 9 قاراشا كۇنى وتكەن سوڭعى ويىنعا اينالىپ سوقساق, «قايرات» 6000 جانكۇيەرى الدىندا نەگىزگى قارسىلاسىن تىزە بۇكتىرگىسى كەلگەنى, ارينە, تۇسىنىكتى ەدى. بىراق, ءبىر تۋر بۇرىن-اق چەمپيوندىق اتاقتى الىپ قويعان استانالىقتار بۇل ويىندا دا بار شەبەرلىگىن پاش ەتىپ, وتە تارتىستى باسەكەدە الاڭ يەلەرىن 3:2 ەسەبىمەن ۇتىپ كەتتى.
باسقا ويىنداردا مىنانداي ناتيجەلەر تىركەلدى: «قايسار» – «شاحتەر» 2:1, «ورداباسى» – «اقتوبە» 1:3, «اتىراۋ» – «توبىل» 0:3, «جەتىسۋ» – «ەرتىس» 1:0, «تاراز» – «سپارتاك» 1:0.
چەمپيوناتتىڭ ەڭ مەرگەن ويىنشىسى بولىپ «استانالىق» فوكسي كەتەۆواما تانىلدى. ول قارسىلاستار قاقپاسىنا 16 گول سوعىپ, 16 رەت ءدال پاس شىعارىپ بەردى.
بيىل عانا پرەمەر ليگاعا شىققان «سپارتاك» كومانداسى قايتادان ءبىرىنشى ليگاعا ورالاتىن بولدى. ال پرەمەر ليگادا 11-ءشى ورىنعا تابان تىرەگەن ۇجىم جوعارى توپتا قالۋ ءۇشىن ءبىرىنشى ليگادا ەكىنشى ورىننان كورىنگەن كوماندامەن سىنعا تۇسەدى. قاي جەڭگەنى پرەمەر ليگادا وينايتىن بولادى. ال, وسىعان دەيىن ءبىرىنشى ليگادا جەڭىمپاز اتانعان كوكشەتاۋدىڭ «وقجەتپەس» كلۋبى كۇشتىلەردىڭ قاتارىنا قوسىلىپ قويعان.
سونىمەن, جانكۇيەر قاۋىمدى تالاي قىزىققا باتىرعان قازاقستان چەمپيوناتى – 2014 مارەسىنە جەتتى. الداعى جىلى «استانا» ۋەفا-نىڭ چەمپيوندار ليگاسىندا, «اقتوبە», «قايرات» جانە «ورداباسى» ەۋروپا ليگاسىندا ەل نامىسىن قورعايتىن بولادى.
دايىنداعان: عالىم قوجابەكوۆ
