استانا قالاسى تۋريزم, دەنە تاربيەسى جانە سپورت باسقارماسىنىڭ ۇيىمداستىرۋىمەن جالپىقالالىق «استانا – سپورت قالاسى» اتتى بۇقارالىق شارا ءوتتى. بۇل مەملەكەت باسشىسى نۇرسۇلتان نازارباەۆتىڭ ەلىمىزدە بۇقارالىق سپورتتى دامىتۋ جونىندە قازاقستان حالقىنا ارناعان جولداۋىندا ايقىندالعان تاپسىرمالاردى جۇزەگە اسىرۋدىڭ اياسىندا اتقارىلىپ كەلە جاتقان تۇراقتى شارالاردىڭ ءبىرى بولدى.
اتاپ ايتقاندا, دەمالىس كۇندەرى ەلوردانىڭ كوپشىلىك دەمالاتىن ورىندارى بۇقارالىق سپورت الاڭدارىنا اينالىپ شىعا كەلدى. ۇيىمداستىرۋشىلار ءبىر مەزگىلدە قالانىڭ تۇس-تۇسىنداعى ساياباقتاردا ءتۇرلى سپورتتان سايىستار وتكىزىپ, وعان قالا تۇرعىندارى قالاۋىنشا قاتىسۋعا مۇمكىندىك الدى. «جەرۇيىق», «پرەزيدەنتتىك», «اراي», «عاشىقتار», «استانالىق», «ستۋدەنتتەر» ساياباقتارى مەن وتان قورعاۋشىلار الاڭى جانە اتا تۇرىك اتىنداعى باقتا مىڭداعان استانالىقتار مەن قالا قوناقتارى دەنە شىنىقتىرىپ قانا قويماي, كوتەرىڭكى كوڭىل-كۇيگە بولەندى. بۇقارالىق جارىستارعا قاتىسۋشىلار استانا قالاسىدا جۇرگىزىلەتىن سپورت سەكتسيالارىندا تاربيە الىپ جۇرگەن بالالار مەن جاستاردىڭ كورسەتىلىمدىك ونەرىن تاماشالادى. اتاپ ايتقاندا, بوكسشىلار, تەننيسشىلەر, فۋتبولشىلار, گيمناستشىلار, ۆەلوسيپەدشىلەر جانە باسقا دا سپورت تۇرلەرىمەن اينالىسۋشىلار شەبەرلىكتەرىن كورسەتتى.
كوپشىلىككە ارنالعان «كوڭىلدى ستارت» جارىستارىنا قاتىسۋشىلاردىڭ قاتارى كوپ بولدى. بۇل باسەكەلەردە بالالار اتا-انالارىمەن بىرگە كۇش سىناسىپ جاتتى. روليكپەن سىرعاناۋشىلار مەن دوپ ويناۋشىلاردىڭ سان-قيلى ەپتىلىكتەرىنە جۇرتشىلىق ءسۇيسىنىپ قول سوقتى. ستريتبول سايىستارى دا قىزىقتى ءوتتى. تەننيسشى باپكەرلەردىڭ وتكىزگەن شەبەرلىك ساباقتارىنا قاتىسۋشىلار دا از بولعان جوق. قازاقستاننىڭ ەڭبەك سىڭىرگەن جاتتىقتىرۋشىسى ا.كوچەتكوۆ ۆەلوسيپەد سپورتىنا قىزىعۋشىلارعا كەڭەس بەردى.
– «ستۋدەنتتەر» ساياباعىندا وتكەن سپورت مەرەكەسىنە قاتىسقانىما قۋانىشتىمىن. وسى شاراعا كەلگەنىم كوپتەن بەرى ويىمىزدا جۇرگەن ءبىر ماسەلەمىزدى شەشىپ الدىق. ءىنىم ەندى بوكس سەكتسياسىنا باراتىن بولدى. باپكەرلەرمەن جولىعىپ, قاي جەرگە, قانداي باپكەرگە باراتىنىمىزدى ءبىلىپ الدىق. كوپشىلىككە ارنالعان وسىنداي جارىستار ءجيى بولىپ تۇرسا دەگەن تىلەگىمىز بار. سوندا استانامىز شىن مانىندە سپورت قالاسىنا اينالا تۇسەدى دەپ ويلايمىن, – دەيدى ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتى ينديرا قۇربانباەۆا قۋانىشىن جاسىرماي.
ءيا, سوڭعى جىلدارى بۇقارالىق سيپات العان وسىنداي سپورتتىق شارالارعا قىزىعۋشىلىق تانىتقان استانالىقتار قاتارى كوبەيىپ كەلە جاتقانى بايقالادى. جەكسەنبى سايىن ساياباقتاردا اۋەسقوي جۇگىرۋشىلەردىڭ جينالاتىنى, ەسىل وزەنى جاعالاۋىندا فۋنك-
تسيونالدىق گيمناستيكانىڭ ۇيىمداستىرىلاتىنى قالىپتى شاراعا اينالدى. وسىنداي ىزگىلىكتى دۇنيەلەر ارقىلى استانا شىن مانىندە بۇقارالىق سپورتتىڭ قالاسىنا اينالا باستادى.
