قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي ەرجان قاجى مالعاجىۇلىنىڭ قاسيەتتى رامازان ايىنا بايلانىستى حالىققا
ۇندەۋى
اسا قامقور, ەرەكشە مەيىرىمدى اللانىڭ اتىمەن باستايمىن!
قۇرمەتتى قاۋىم! بارشاڭىزدى اسا ۇلىق قاسيەتتى رامازان ايىنىڭ كەلۋىمەن قۇتتىقتايمىن. رامازان مۇباراك بولعاي! ورازاعا امان-ەسەن جەتكىزگەن اللا تاعالاعا سانسىز شۇكىرلەر مەن ماداقتار بولسىن!
قازاقستان مۇسىلماندارى ءدىني باسقارماسى بيىل دا رامازان ايىن ۇلكەن دايىندىقپەن وتكىزبەك. ەلىمىز بويىنشا مەشىتتەر مەن مەدرەسەلەردە, ءدىني وقۋ ورىندارىندا, قوعامدىق ورتالاردا قايىرىمدىلىق اكتسيالار, يگى جوبالار ۇيىمداستىرىلادى. بارشاڭىزدى وسى ىزگى ءىس-شارالارعا اتسالىسۋعا شاقىرامىن.
رامازان – جالپىعا ورتاق ىزگى امالدار ماۋسىمى. ورازا – تاربيە ءھام تاقۋالىق ايى. اللا تاعالا قاسيەتتى قۇراندا: «ءيا, مۇمىندەر, وزدەرىڭنەن بۇرىنعىلارعا پارىز ەتىلگەندەي, سەندەرگە دە ورازا ۇستاۋ پارىز ەتىلدى. بالكىم, سەندەر تاقۋا بولارسىڭدار», – دەگەن («باقارا» سۇرەسى, 183-ايات). ورازادا وتباسى قۇندىلىعىن ارتتىرىپ, جاستارىمىزدىڭ يماندى, وتانىن, حالقىن, سۇيەتىن, سالت-ءداستۇرىن ارداق تۇتار ناعىز ازامات بولىپ قالىپتاسۋىنا ءاردايىم كوڭىل بولەيىك. يسلام عۇلامالارى: «وتاندى ءسۇيۋ – يماننان» دەپ ءتالىمدى تۇجىرىم ايتقان.
رامازان – قايىرىمدى جاندار ءۇشىن ۇلكەن مۇمكىندىك. ورازادا جاسالعان جاراتۋشى يەمىزگە ۇنامدى ءاربىر قايىرلى ءىس – ۇلكەن ساۋاپ. پايعامبارىمىز مۇحاممەد (اللانىڭ وعان سالاۋاتى مەن سالەمى بولسىن) ءبىر وسيەتىندە: «ادامداردىڭ جاقسىسى – ەلگە پايداسى تيگەندەرى» دەگەن. ادام قالاي نيەت ەتسە, سول ماقساتىنا جەتەدى.
ءار پەندە ساۋاپتى امالىمەن, تاقۋالىعىمەن اللانىڭ الدىندا دارەجەسى ارتادى. جومارت, جاناشىر ازاماتتاردى, كاسىپكەرلەردى كومەككە مۇقتاج ادامدارعا قامقورلىق كورسەتۋگە, ماسەلەن, سۋ تاسقىنىنان ءۇيسىز, شاراسىز قالعان وتانداستارىمىزعا قايىرىمدىلىق جاساۋعا, تابيعي اپات سالدارىنان بۇزىلعان كوپىر مەن جولدى جوندەۋگە ۇلەس قوسۋعا, جەتىم مەن جەسىرگە مەيىرىمدىلىك تانىتىپ, قاراۋسىز قالعان قارتتارعا كوڭىل بولۋگە شاقىرامىن.
ەلباسى ۇلىتاۋ تورىندە ۇلت تۋرالى, ءدىن, ءتىل جايلى بەرگەن ۇلاعاتتى سۇحباتىندا اسىل ءدىنىمىزدىڭ تۇرمىسى تومەن جاندارعا كومەكتەسۋ, باۋىرمال بولۋ, ۇلكەندى سىيلاپ, كىشىگە ىزەت كورسەتۋ سىندى اسىل قۇندىلىقتارىن ءسوز ەتكەنى ەسىمىزدە. وسىنداي ورتاق يگى امالدار جۇرتىمىزدى جاقسىلىققا, ىزگىلىك پەن بىرلىككە ۇيىستىرادى.
قاسيەتتى ايدىڭ قۇرمەتى ءۇشىن حالىقتىڭ تۇرمىستىق قاجەتتىلىكتەرىنە جەڭىلدىك جاسالىپ, قۇدايى استار پەن تويلار اۋىزاشار ۋاقىتىندا ۇيىمداستىرىلسا دەگەن تىلەگىمدى بىلدىرەمىن.
رامازان – بىرلىك ايى. وسى ايدا بەرىلەتىن اۋىزاشارلار اعايىن-جۇرتتىڭ اراسىن جاقىنداستىرىپ, يگى ءىس-شارالار مەن قايىرىمدىلىق اكتسيالار حالقىمىزدى سەنىمى مەن ناسىلىنە قاراماي, ورتاق ماقساتقا ۇندەيدى. بۇكىل الەمنىڭ جاراتۋشىسى بارشا ادامعا: «بولىنبەڭدەر», – دەپ باۋىرمال بولۋعا بۇيىرعان. بىرلىگى كۇشتى ەلدىڭ بەرەكەسى ارتادى.
قىمباتتى وتانداستار! رامازان ايىندا جاساعان امالدارىمىز بەن ىزگى نيەتتەرىمىزدى اللا تاعالا قابىل ەتىپ, ساۋاپتى ىستەرىمىز ءاردايىم جالعاسا بەرگەي! تاۋەلسىزدىگىمىزدىڭ تۇعىرى بيىك, مەملەكەتىمىزدىڭ مەرەيى ۇستەم, ەلىمىزدىڭ بولاشاعى باياندى بولعاي! ءاۋمين!
