قالامىزداعى سارىارقا اۋداندىق ىشكى ىستەر باسقارماسى بۇرىن سوتتالعان ازاماتتاردى ەسەپكە الىپ, تۇراقتى تۇردە قاداعالاپ وتىرۋدى ادەتكە اينالدىرعان. ويتكەنى, جازا باسىپ جاڭىلعاندار قىلمىس الەمىنە قايتا ورالماۋى ءۇشىن ولارعا ۇدايى قولداۋ مەن پسيحولوگيالىق كومەك اۋاداي قاجەت.
بۇرناعى كۇنى اتالمىش مەكەمە وكىلدەرى وسىنداي جاعدايداعى 80-گە تارتا ازاماتقا ارناپ جينالىس وتكىزدى. وندا كوتەرىلگەن نەگىزگى ماسەلە – ءىستى بولعان كىسىلەردىڭ جۇمىسقا ورنالاسۋى ەدى. جاسىراتىنى جوق, تۇزەۋ كولونيالارىنان شىققان ادامداردىڭ الەۋمەتتىك ورتاعا بەيىمدەلىپ كەتۋى وڭاي ەمەس. ايتسە دە, «رەابيليتاتسيالىق تەحنولوگيا جانە كونتسەپتسيا» قوعامدىق قورىنىڭ ماماندارى بارىنشا جاردەمدەسىپ, قول ۇشىن سوزۋعا دايىن.
– استانا قالاسىنىڭ اكىمدىگى مەن جۇمىسپەن قامتۋ جانە الەۋمەتتىك باعدارلامالار باسقارماسى بۇرىن سوتتالعان نەمەسە مەرزىمىنەن ەرتە بوستاندىققا شىققان جانداردىڭ جۇمىسقا ورنالاسۋىنا جاعداي جاسايدى. ماسەلەن, بيىلعى جىلدىڭ وزىندە 800-دەن اسا ازامات ەكى قولعا ءبىر كۇرەك تاۋىپ, وتباسىن اسىراپ ءجۇر. بۇگىن 94 ۆاكانسيا ۇسىنۋدامىز. ونىڭ ىشىندە ەلەكتر تەحنيگى, اۆتومەحانيك, دانەكەرلەۋشى سەكىلدى جۇمىسشى ماماندىقتار ۇلكەن سۇرانىسقا يە, – دەدى اتالمىش ۇيىمنىڭ ديرەكتورى ورىنباسار قۇلجاباەۆا.
تەمىر توردىڭ ارعى جاعىنان كەلگەن كىسىلەردىڭ اراسىندا قازىرگى تاڭدا ءوز كاسىبىن دوڭگەلەتىپ, پايدالى تىرلىك تىندىرىپ جۇرگەندەر دە جەتەرلىك. سولاردىڭ ءبىرى تۋرالى تۇسىرىلگەن بەينەروليك جيىن بارىسىندا كورسەتىلىپ, كوپشىلىكتىڭ كوكەيىنە وي سالدى.
سارىارقا اۋداندىق ءىىب جەرگىلىكتى پوليتسيا قىزمەتىنىڭ باسشىسى, پوليتسيا مايورى ازامات سادىقوۆتىڭ ايتۋىنشا, مۇنداي باسقوسۋلار سوتتالعان ادامنىڭ ومىرگە دەگەن تالپىنىسىن ارتتىرىپ, كۇش-قۋات بەرەدى. ءتىپتى, الكوگولگە تاۋەلدىلىك پەن ناركومانيادان قۇتقارىپ, تۋرا جولعا تۇسۋىنە مۇرىندىق بولادى ەكەن.
بوتاگوز ماراتقىزى
