ەلوردانىڭ تۋعان كۇنى قارساڭىندا استانادا دۋاتلوننان ەكىنشى اشىق تۋرنير ۇيىمداستىرىلدى. جارىستىڭ اشىلۋ سالتاناتىنا قر پرەمەر-ءمينيسترى كارىم ءماسىموۆ, قر پرەزيدەنتى اكىمشىلىگىنىڭ باسشىسى ادىلبەك جاقسىبەكوۆ, قر مادەنيەت جانە سپورت ءمينيسترى ارىستانبەك مۇحامەديۇلى جانە تانىمال ۆەلوشاباندوز, وليمپيادا چەمپيونى الەكساندر ۆينوكۋروۆ قاتىستى.
– استانادا وسىنداي دۋاتلون جارىسىن وتكىزۋ تۋرالى يدەيانى ادىلبەك رىسكەلدىۇلى قالا اكىمى بولىپ وتىرعاندا كوتەرگەن ەدى. مەن دە بۇعان قولداۋ كورسەتۋگە ۋادە ەتكەنمىن. مەنىڭشە, مۇنداي اۋقىمدى شارا – باس شاھاردىڭ تۇرعىندارى ءۇشىن ۇلكەن مەرەكە, – دەدى ۇكىمەت باسشىسى ك.ءماسىموۆ.
ءوز كەزەگىندە پرەزيدەنت اكىمشىلىگىنىڭ باسشىسى ءا. جاقسىبەكوۆ بارشا وتانداستاردى سپورتپەن اينالىسۋعا شاقىردى.
– مەملەكەت باسشىسىنىڭ تاپسىرماسىنا سايكەس, ەلىمىزدە, سونىڭ ىشىندە استانادا سپورت پەن مادەنيەتتى دامىتۋعا كوپ كوڭىل بولىنۋدە. جىل سايىن سپورتتىق سايىستار قاتارى ارتىپ كەلەدى. ۇلتىمىز ءۇشىن ەڭ باستى بايلىق – دەنساۋلىق. سوندىقتان ءبارىڭىز دە سپورتپەن شۇعىلدانىڭىزدار, – دەپ اتاپ ءوتتى ءا. جاقسىبەكوۆ.
ەسكە سالا كەتەيىك, بيىلعى جارىس قاتىسۋشىلارى 25 شاقىرىمدىق قاشىقتىقتى باعىندىرادى. بۇل اراقاشىقتىق كەزدەيسوق تاڭدالماعان. جولدىڭ ۇزاقتىعى مەرەيتويلىق داتا – ەل تاۋەلسىزدىگىنىڭ 25 جىلدىعىمەن سايكەس كەلەدى.
بوتاگوز ماراتقىزى
