عارىشتان جەتكەن وزگە پلانەتالىقپەن تانىسىپ, ەستەلىككە سۋرەتكە تۇسكىڭىز كەلە مە؟! بالكىم, نيۋ-يوركتەگى «بوستاندىق ءمۇسىنىن» ءوز قولىڭىزبەن ۇستاپ كورەرسىز؟! ال wi-fi جەلىسىن تاراتاتىن تاماشا اعاش جايلى نە بىلەرىڭىز بار؟! وسىنداي عاجاپ قۇبىلىستارعا بىلتىرعى جازدا ەلوردالىقتار «Astana Art Fest» اتى ونەر فەستيۆالى كەزىندە كۋا بولعان-دى. ايرىقشا شارا بيىل دا قالا كۇنى قارساڭىندا ۇيىمداستىرىلماقشى.
جاڭا حالىقارالىق فورماتتاعى بۇل فەستيۆال وتكەن جىلى استانادا وتە ءساتتى جۇزەگە اسقان-دى. «نۇرجول» بۋلۆارىنىڭ بويى تۇگەلدەي دەرلىك «اstana Art Fest» ەنشىسىنە بەرىلگەن ەدى. ءۇش كۇننىڭ ىشىندە 300 مىڭنان اسا ادام وتاندىق جانە شەتەلدىك سۋرەتشىلەردىڭ, ديزاينەرلەردىڭ, ساۋلەتشىلەردىڭ, مۋزىكانتتاردىڭ تۋىندىلارىمەن تانىستى. اسىرەسە, الىپ بيۋست, پلاستيكتەن تىگىلگەن كيىز ءۇي, تسەللوفاننان جاسالعان كارتينا سەكىلدى ارت-نىساندار كوپشىلىكتىڭ كوڭىلىنەن شىققان.
بيىلعى جارىس شىلدەنىڭ 4-ءى مەن 6-سى ارالىعىندا بولادى. ەرەكشەلىگى سول, زاماناۋي مادەنيەتتىڭ جاھاندىق كورمەسى 2017 جىلعى ەكسپو الدىنداعى كىشىگىرىم دايىندىق ءتارىزدى. ويتكەنى, ول دا «بولاشاق ەنەرگياسى» تاقىرىبىنا ارنالعالى وتىر.
«Astana Art Fest» ءار ادام ءۇشىن ەرەكشە مۇمكىندىكتەر ەسىگىن ايقارا اشادى. ماسەلەن, كورەرمەن قازىرگى ونەر تۇرلەرىنىڭ قىر-سىرىنا قانىعىپ, شات-شادىمان اسەرگە بولەنەدى. ال سايىسقا قاتىسۋشىلار ءوز شىعارماشىلىعىنىڭ ناتيجەسىن بۇقاراعا پاش ەتىپ, وتاندىق جانە شەتەلدىك ارىپتەستەرىمەن تاجىريبە الماسا الادى. دەمەۋشىلەر بولسا, كومپانيا ابىرويىن ەلىمىزدەگى ەڭ ەلەۋلى مادەني ءىس-شارانى قولداۋ ارقىلى ارتتىرىپ, قازاقستان ونەرىنىڭ دامۋىنا قوماقتى ۇلەس قوسپاق.
بوتاگوز ماراتقىزى
