ەل تاۋەلسىزدىگىنىڭ 25 جىلدىعىنا وراي استانانىڭ «جاسىل بەلدەۋى» اۋماعىنىڭ وڭتۇستىك-باتىس بولىگىندە جالپى ۇزىندىعى 23 شاقىرىمعا سوزىلاتىن جاڭا ۆەلوجول اشىلدى. سالتاناتتى راسىمگە استانا قالاسى اكىمىنىڭ ورىنباسارى ەرمەك امانشاەۆ قاتىستى.
– ەلوردا سالاۋاتتى ءومىر سالتىن ماقسات ەتكەن, سپورتتىق شارالار لەگىن ۇدەتكەن قالاعا اينالىپ كەلە جاتىر. وسىنىڭ جارقىن دالەلى رەتىندە «استانا مارافونى-2016», دۋاتلون, ترياتلون سەكىلدى بىرقاتار سپورتتىق جارىستاردىڭ ۇيىمداستىرىلعانىن اتاپ ءوتۋ كەرەك.
جاڭا ۆەلوجول – ەلوردالىقتار ءۇشىن كەرەمەت تارتۋ. الداعى ۋاقىتتا دا ونى ءتيىمدى ەتۋ جاعىن ۇمىت قالدىرمادىق. ماسەلەن, قىس مەزگىلىندە بۇل ۆەلوجول شاڭعى تەبۋشىلەر ءۇشىن تاپتىرماس الاڭعا اينالعالى وتىر, – دەدى شاھار باسشىسىنىڭ ورىنباسارى.
دەربەستىگىمىزدى ايعاقتاپ, مەرەيىمىزدى ۇستەم ەتەر تاۋەلسىزدىك وسىلايشا ەلوردالىقتارعا تاعى ءبىر اقجولتاي جاڭالىعىن تارتۋ ەتتى. بوكستان ريو وليمپياداسىنىڭ چەمپيونى دانيار ەلەۋسىنوۆ باستاعان بالالار مەن جاسوسپىرىمدەرگە ارنالعان №6 سپورت مەكتەبىنىڭ ۆەلوشاباندوزدارى مەن شاھار تۇرعىندارى سالاۋاتتى ءومىر سالتىن قالىپتاستىرۋعا باعىتتالعان شارادا جاڭا جولدا جارىسا ۆەلوسيپەد تەپتى.
بۇل باستامانى استانا قالاسىنىڭ تابيعي رەسۋرستار جانە تابيعات پايدالانۋدى رەتتەۋ باسقارماسى كوتەرسە, «استانا ورمانى» جشس قولداۋ ءبىلدىرىپ, اشىق اسپان استىندا ۇزىندىعى بىرنەشە شاقىرىمعا سوزىلاتىن تاقتايداي تەگىس ۆەلوجولدىڭ سالىنۋىنا وزىندىك ۇلەسىن قوستى. ايتا كەتۋ كەرەك, ەنى 2 مەتردى قامتيتىن جول – زاماناۋي ۇلگىدەگى بارلىق تەحنيكالىق تالاپتار مەن ستاندارتتاردى ساقتاي وتىرىپ جاسالعان ءارى ەلىمىزدە ورمان ىشىندە ورنالاسقان تۇڭعىش ۆەلوجول. راسىندا دا, اينالاسى اعاشقا تولى «جاسىل بەلدەۋ» قالادان تىسقارى ورنالاسقاندىقتان بولار, مەگاپوليستىڭ قىم-قۋىت تىرلىگىنەن ادا. سول ءۇشىن دە ۆەلوسپورتقا اۋەسى بار استانالىقتار ءۇشىن تاپتىرماس مەكەنگە اينالارى ءسوزسىز.
سونداي-اق, ۆەلوجول بويىندا دەم الۋعا مۇمكىندىك بەرەتىن 6 كۇركە ورناتىلدى. ياعني, جۇيتكىپ كەلە جاتىپ, شارشاپ-شالدىقساڭىز, كۇركەگە كىرىپ, ازداپ تىنىعىپ الاسىز, بويىڭىزعا كۇش-قايرات جيناپ, قايتا اتتاناسىز.
ال كۇللى الەم كوز تىككەن ريو وليمپياداسىندا جەڭىسكە جەتىپ, ەل مەرەيىن اسقاقتاتقان دانيار ەلەۋسىنوۆ ەل ەگەمەندىگىنىڭ 25 جىلدىعى قارساڭىندا ۇيىمداستىرىلعان سپورتتىق شارانىڭ, اسىرەسە, جاستارعا بەرەر پايداسى كوپ ەكەندىگىن ەرەكشە اتاپ ءوتتى. «وزدەرىڭىز بايقاعانداي, بۇل – جارىس ەمەس, كوپشىلىكتى ۇيىستىرعان بۇقارالىق ۆەلوشەرۋ, ماقسات – جاڭادان سالىنعان ۆەلوجولمەن ءجۇرىپ ءوتۋ جانە سپورتتىڭ ادام دەنساۋلىعىنا بەرەر مول پايداسىن تاعى ءبىر مارتە دالەلدەۋ. ءوزىم ەگەمەندىكتىڭ قۇرداسىمىن. سوندىقتان ەل ءۇشىن ورنى ەرەك مەرەكە قارساڭىندا ۇيىمداستىرىلعان ۆەلوشەرۋگە قاتىسقانىما قۋانىشتىمىن» دەدى الەم چەمپيونى.
اۋقىمدى شاراعا 80-نەن اسا ادام قاتىستى. ايتا كەتۋ كەرەك, يلينكا كەنتىنەن باستاۋ العان جول قوسشى ەلدى مەكەنىنە دەيىن جالعاسادى. ءبارى دە تازا اۋامەن تىنىستاپ, مەجەلەگەن قاشىقتىقتى باعىندىردى. وسىلايشا, ەلوردالىقتار سپورتقا دەگەن ىنتاسىن تاعى ءبىر مارتە دالەلدەي ءتۇستى.
ءامىر دوسقوجا
