باس قالانىڭ 20 جىلدىعىنا وراي ەلوردانىڭ شىعارماشىلىق ۇجىمدارى ەل ايماقتارى تۇرعىندارىنا «استانادان اق تىلەك» اتتى مەرەكەلىك باعدارلاما ازىرلەدى.
استانانىڭ مادەني كۇندەرى وڭىرلەردە 12 مامىر كۇنى باستالىپ, قىركۇيەكتىڭ سوڭىندا اياقتالادى. بەيسەنبى كۇنى استانالىق ءبىر توپ ونەرپاز «نۇرلى جول» ۆوكزالىنان ايماقتارعا اتتاندى.
«مەملەكەت باسشىسىنىڭ تاپسىرماسىمەن وڭىرلەر ەلوردانىڭ 20 جىلدىعىن مەرەكەلەۋگە بەلسەندى قاتىسىپ جاتىر. ەلدىڭ بۇكىل قالالارى مەن وبلىس ورتالىقتارىندا مەرەيتويلىق داتاعا ارنالعان ءتۇرلى شارالار وتۋدە. وڭىرلەردەگى استانا كۇندەرى بۇل مەرەكەنىڭ اجىراماس بولىگى بولىپ تابىلادى.
استانالىق ونەرپازدار جازدا قازاقستاننىڭ 16 قالاسىندا بولىپ قايتادى. وندا ەڭ ۇزدىك تەاترلاندىرىلعان جانە تسيرك قويىلىمدارى, كوركەمسۋرەت كورمەلەرى كورسەتىلەدى, گالا-كونتسەرتتەر, سپورتتىق جارىستار تاعى وسى سياقتى شارالار وتكىزىلەدى» دەدى استانا قالاسى مادەنيەت جانە سپورت باسقارماسىنىڭ باسشىسى بولات ماجاعۇلوۆ.
ەلوردادان «سارىارقا» حالىق مۋزىكاسى جانە «شالقىما» حالىق ءبيى, ەسترادالىق بي انسامبلدەرى, عازيزا جۇبانوۆا اتىنداعى ىشەكتى اسپاپتار كۆارتەتى, «استانا» ەسترادالىق-سيمفونيالىق وركەسترى, كامەرالىق حور, «قورقىت» ءداستۇرلى ساز توبى, قالانىڭ مەملەكەتتىك اكادەميالىق فيلارمونياسىنىڭ ۇرمەلى جانە قازاق وركەسترلەرى وڭىرلەردە گاسترولدەردى وتكىزەدى. ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى, م.گوركي اتىنداعى مەملەكەتتىك اكادەميالىق ورىس دراما تەاترى, قۋىرشاق تەاترى, «جاستار» تەاترى جانە «ناز» بي تەاترى وزدەرىنىڭ ۇزدىك قويىلىمدارىن ۇسىنادى. ءار ۇجىم جانرى بويىنشا ءارتۇرلى تولىققاندى كونتسەرتتىك باعدارلاما دايىنداپ, كورەرمەندەردى ءتانتى ەتپەك.
تاۋەلسىزدىك سارايىنىڭ ۇجىمى ەلىمىزدىڭ وڭىرلەرىن «ەلباسى-ەلوردا» اتتى كورمەمەن ارالايدى. استانالىق تسيرك تە قىزىقتى شوۋ كورسەتەدى. سپورتسۇيەر قاۋىم دا نازاردان تىس قالعان جوق. استانانىڭ مادەني كۇندەرى اياسىندا ءتۇرلى وڭىرلەردە جاس جۇزگىشتەر, گاندبولشىلار, دزيۋدوشىلار, حوككەيشىلەر, كيكبوكسشىلار, بالالار-جاسوسپىرىمدەر سپورت مەكتەپتەرىنىڭ تاربيەلەنۋشىلەرى اراسىندا ماتچتىق جانە جولداستىق كەزدەسۋلەر وتكىزىلەدى.
ەڭ الدىمەن استانالىق شىعارماشىلىق ۇجىمدار وڭىرىنە ات باسىن تىرەيدى. ءبىرىنشى كونتسەرتتەر, سپەكتاكلدەر مەن كورمەلەر 12-28 مامىر ارالىعىندا
اقتوبە, ورال, اقتاۋ جانە اتىراۋ قالالارىندا وتەدى.
اتاپ ايتقاندا, بۇگىن اقتوبەدە
«استانا – اقتوبە وبلىسى ايماقارالىق ىنتىماقتاستىق» بيزنەس فورۋمى وتەدى. «AstanaInvest» قالالىق ينۆەستيتسيانى دامىتۋ ورتالىعىنىڭ وكىلدەرى استانانىڭ ينۆەستيتسيالىق مۇمكىندىكتەرىنە قاتىستى الەۋەتتى جوبالاردى كورسەتەدى. سونداي-اق, كەلەشەكتە اقتوبە قالاسىندا اشىلاتىن استانا ساياباعىنىڭ كاپسۋلاسى قالانادى.
كەيىن ەلوردالىق مادەنيەت قىزمەتكەرلەرى اقمولا, سولتۇستىك قازاقستان, قوستاناي جانە قاراعاندى وبلىستارىنا بارادى. وندا گاسترولدەر 2-22 ماۋسىم ارالىعىندا ۇيىمداستىرىلادى.
14 جانە 15 شىلدەدە پاۆلودار, ال 17-18 شىلدەدە سەمەي جانە وسكەمەن قالالارىنىڭ تۇرعىندارى استانانىڭ مادەني باعدارلاماسىن تاماشالايدى.
بۇدان ءارى استانالىق ارتىستەر وڭتۇستىك وڭىرلەرگە بارادى. شىلدەنىڭ 25-ىنەن تامىزدىڭ 3-ىنە دەيىن جامبىل, وڭتۇستىك قازاقستان جانە قىزىلوردا وبلىستارىندا بولادى. 18-19 قىركۇيەكتە الماتى وبلىسىنا جەتەدى. ەلوردالىق ونەر ۇجىمدارىنىڭ قازاقستان بويىنشا گاسترولدەرى الماتى قالاسىندا تۇيىندەلىپ, الاتاۋ باۋرايىندا 22-24 قىركۇيەك كۇندەرى گالا-كونتسەرت وتەدى.
