استانا ارەنا – حالىقارالىق ستاندارتتارعا ساي سالىنعان ەلورداداعى ايرىقشا نىسانداردىڭ بىرەگەيى. ەرەكشە ساۋلەتتى ستاديون ەلباسى نۇرسۇلتان نازارباەۆتىڭ باستاماسىمەن قۇرىلدى.
جاڭا كەشەن ەڭ الدىمەن فۋتبول ماتچتارىن وتكىزۋگە ارنالعان, بىراق باسقا ءىرى سپورت جانە مادەني شارالارعا دا ىڭعايلاستىرۋعا بولادى. جاساندى كوگالمەن كومكەرىلگەن الاڭنىڭ ۇزىندىعى 105 مەتر بولسا, ەنى – 68 مەتر. ستاديوننىڭ 20 مينۋتتا اشىلىپ-جابىلاتىن توبەسى جىلدىڭ كەز كەلگەن مەزگىلىندە ويىندى تاماشالاۋعا قولايلى جاعداي تۋعىزادى. وسىنداي قاسيەتىمەن بۇل نىسان الەمدەگى جىلجىمالى شاتىرى بار التى ستاديوننىڭ ءبىرى سانالادى. بۇنىڭ ارحيتەكتۋرالىق جوباسىن «Populous» جانە «Tabanlioglu Architects» كومپانيالارى جاسادى. جوبا جۇمىسى ەكى جارىم جىلعا سوزىلدى.
قۇشاعىنا 30 مىڭ كورەرمەندى سىيدىرا الاتىن عيمارات 2009 جىلدىڭ 3 شىلدەسىندە اتاقتى يتاليان اربيتر پەرلۋيدجي كوللينا تورەلىك ەتكەن سيمۆولدىق ماتچپەن اشىلدى. بۇل ويىن قازاقستان جاستار قۇراماسى مەن «لوكوموتيۆ» فۋتبول كلۋبى (قازىرگى «استانا» فك) اراسىندا ءوتتى. ءبىر قىزىعى, قوس كوماندانىڭ ساپىندا الەم فۋتبولىنىڭ جۇلدىزدارى دوپ تەپتى. ناقتىلاساق, جاستار قۇراماسىندا اندرەي شەۆچەنكو مەن كاحا كالادزە ويناسا, استانانىڭ نامىسىن 2002 جىلعى الەم چەمپيوناتىندا تۇركيانى ءۇشىنشى ورىنعا كوتەرگەن حاكان شۇكىر مەن حاسان شاش قورعادى. ال ويىنعا دوپتى ەلباسىنىڭ ءوزى قوستى.
وسىلايشا تۇساۋى كەسىلگەن استانا ارەنادا بۇدان كەيىن تالاي بايراقتى باسەكەنىڭ جالاۋى جەلبىرەدى. ەڭ العاشقى رەسمي ماتچ 2009 جىلدىڭ 14 قازانىندا 2010 جىلعى الەم چەمپيوناتىنا ىرىكتەۋ كەزەڭى اياسىندا قازاقستان مەن حورۆاتيا قۇرامالارى اراسىندا ءوتتى.
ەڭ كوپ كورەرمەن جينالعان ويىندار
استانا – اپوەل
ەسەپ – 1:0 30 000 18.18.2015 چەمپيوندار ليگاسىنىڭ ىرىكتەۋ كەزەڭى
شاحتەر – سەلتيك
ەسەپ – 2:0 29 950 20.08.2013 چەمپيوندار ليگاسىنىڭ ىرىكتەۋ كەزەڭى
استانا – ۆيلياررەال
ەسەپ – 1:3 29 800 23.11.2017 ەۋروپا ليگاسىنىڭ توپتىق كەزەڭى
قازاقستان – گەرمانيا
ەسەپ – 0:3 29 300 22.03.2013 الەم چەمپيوناتىنا ىرىكتەۋ كەزەڭى
ايشىقتى وقيعالار
2011 جىلى 30 قاڭتاردا VIII قىسقى ازيا ويىندارىنىڭ سالتاناتتى اشىلۋى ءوتتى.
2015 جىلى 5 ماۋسىمدا العاش رەت استانادا «گراۆيتاتسيا» اتاۋىمەن «مۋز-تۆ پرەمياسى» ءوتتى.
2015 جىلى 18 ماۋسىمدا چەمپيوندار ليگاسىنىڭ ىرىكتەۋ كەزەڭى اياسىندا «استانا» – «اپوەل» ماتچىن 30 000 جانكۇيەر تاماشالاپ, كورەرمەن تارتۋدا «استانا ارەنانىڭ» رەكوردى جاڭاردى.
2015 جىلى «استانا» فۋتبول كلۋبى قازاقستاننان العاش بولىپ چەمپيوندار ليگاسىنىڭ توپتىق كەزەڭىنە ءوتىپ, استانا ارەنادا «اتلەتيكو مادريد» (يسپانيا), «بەنفيكا» (پورتۋگاليا) جانە «گالاتاساراي» (تۇركيا) كوماندالارىن قابىلدادى.
2017 جىلى «استانا» فۋتبول كلۋبى ەۋروپا ليگاسىنىڭ توپتىق كەزەڭىندە «ۆيليارەال» (يسپانيا), «سلاۆيا» (چەحيا) جانە «ماككابي تەل-اۆيۆ» (يزرايل) كوماندالارىمەن وينادى.
2018 جىلى 15 اقپاندا «استانا» تۇڭعىش رەت ەۋروپا ليگاسىنىڭ 1/16 پلەي-وفف كەزەڭىندە «سپورتينگ» (پورتۋگاليا) كلۋبىمەن كەزدەستى.
