ارقاداعى قازاق ءباسپاسوزىنىڭ قارا شاڭىراعىنىڭ ءبىرى, ەلوردا جىلناماسىن جازعان «ASTANA AQSHAMY» گازەتى وتىز جىلدا ەلدىڭ, ۇلتتىڭ ءۇنىن ايتاتىن ۇنپاراققا اينالدى. ويلى وقىرمانعا ولجا سالعان جىلدارعا كوز جۇگىرتسەك, جەتكەن جەتىستىكتەرىمىز بەن باعىندىرعان بەلەستەرىمىز از ەمەس. مەرەيىمىز ۇستەم بولعان ايتۋلى داتادا ءسال شەگىنىس جاساپ, سولاردىڭ ءبىر پاراسىنا تاعى ءبىر ۇڭىلەيىك.
باعى مەن بابى قاتار شاپقان باسىلىم 2002 جىلى قازاقستان جۋرناليستيكا اكادەمياسىنىڭ «التىن جۇلدىز» سىيلىعىن يەلەندى. گازەت الەۋمەتتىك-ەكونوميكالىق, رۋحاني-مادەني ماسەلەلەردى كەڭىنەن قامتىعان ەڭ ۇزدىك ۇجىم دەپ تانىلدى. جۋرناليستيكا مەن بۇقارالىق اقپارات قۇرالدارىن دامىتۋعا قولداۋ كورسەتۋ, قازاقستان قوعامىندا جۋرناليست مارتەبەسiن كوتەرۋ, وتاندىق باق اراسىندا باسەكەلەستiكتi دامىتۋ ماقساتىندا تاپسىرىلىپ كەلە جاتقان بۇل سىيلىقتىڭ ءباسى مەن مارتەبەسى جوعارى.
2018 جىلى گازەتتىڭ شىعارماشىلىق ۇجىمى تۇڭعىش پرەزيدەنت – ەلباسى نۇرسۇلتان نازارباەۆتىڭ العىس حاتىمەن ماراپاتتالدى. ەلوردانىڭ الەۋمەتتىك-ەكونوميكالىق جانە مادەني-گۋمانيتارلىق دامۋىنداعى ماڭىزدى تاقىرىپتار مەن نەگىزگى ماسەلەلەردى جاريالاپ-كورسەتۋگە قوسقان ەرەكشە ۇلەسى ءۇشىن بەرىلگەن العىستى سول كەزدەگى مەملەكەتتىك حاتشى گۇلشارا ابدىقالىقوۆا «استانا اقشامى» گازەتىنىڭ باس رەداكتورى, پرەزيدەنت سىيلىعىنىڭ يەگەرى ەركىن قىدىرعا تابىس ەتتى.
سول جىلى «Astana aqshamy» گازەتى «نۇر وتان» پارتياسىنىڭ بايلانىس جانە اقپارات قىزمەتكەرلەرى كۇنىنە وراي تاعايىنداعان «نۇر سۇڭقار-2018» سىيلىعىن يەلەندى. باسىلىم «استاناعا 20 جىل» اتالىمىندا توپ جاردى. مارتەبەلى سىيلىقتى «Elorda Aqparat» جشس-ءنىڭ سول كەزدەگى ديرەكتورى قايسار
جۇمابايۇلىنا استانا اكىمىنىڭ بۇرىنعى ورىنباسارى, بەلگىلى كومپوزيتور, ەلوردا مادەنيەتىنىڭ دامۋىنا ەرەن ەڭبەك سىڭىرگەن
تولەگەن مۇحامەدجانوۆ تاپسىردى.
ءار جىلدارى گازەت جۋرناليستەرى ەلىمىزدەگى باق سالاسىندا بەرىلەتىن جۇلدەلەر مەن سىيلىقتاردى, جوعارى ماراپاتتاردى يەلەنىپ كەلەدى. 2019 جىلى ايگۇل ۋايسوۆا دەنساۋلىق ساقتاۋ سالاسى جايلى جازعان ۇزدىك ماقالالارى ءۇشىن «التىن شيپاگەر» سىيلىعىن الدى. ازامات ەسەنجول قازاق تىلىنە قاتىستى وزەكتى ماسەلەلەردى كوتەرىپ, ولاردى ەلگە تانىتۋدا ەڭبەك سىڭىرگەنى ءۇشىن «مەملەكەتتىك ءتىل جانە باق» رەسپۋبليكالىق بايقاۋىندا ءىىى ورىندى ولجالادى. وسى جولداردىڭ اۆتورى وتكەن جىلى ەل پارلامەنتى ومىرىنەن جازىلعان ماقالالارى مەن سۇحباتتارى ءۇشىن ءماجىلىستىڭ «پارلامەنت ءسوزى» سىيلىعىن ەنشىلەسە, بيىل پرەزيدەنت قاسىم-جومارت توقاەۆتىڭ العىس حاتىمەن ماراپاتتالدى. الداعى ۋاقىتتا دا اقشامدىقتاردىڭ اسىعى الشىسىنان ءتۇسىپ, ۇلتتىق جۋرناليستيكانى دامىتۋعا زور ۇلەس قوساتىنىنا سەنىمىمىز مول.
