«اتامەكەن» قازاقستان كارتاسى» ەتنو-مەموريالدىق كەشەنىنىڭ «ماڭگىلىك ەلگە ساياحات» اتتى ماۋسىمدىق اشىلۋى بولدى. وسىعان وراي, كەشەن قىزمەتكەرلەرى 7 ارنامەن بىرىگىپ, «ۇلت بىرلىگى – ۇلى بايلىق» كونتسەرتتىك باعدارلاماسىن ۇسىندى.
وتاندىق ەسترادا جۇلدىزدارى ەرلان كوكەەۆ, باۋىرجان يساەۆ, مەدەت شايكەلوۆ, رۇستەم جۇگىنىسوۆ, نۇرلان توكەنوۆ, «دابىل» دۋەتى جينالعانداردىڭ كوڭىلىن كوتەردى. قوناقتار رەتىندە قازاقستان حالقى اسسامبلەياسىنىڭ وكىلدەرى, بالالار جازۋشىسى ءداريا جۇماگەلدينوۆا, مما جانە دجيۋ-دجيتسۋ فەدەراتسياسىنىڭ پرەزيدەنتى اناتولي كيم قاتىستى.
«اتامەكەن» قازاقستان كارتاسى» ءوزىنىڭ 13 ماۋسىمىن باستادى. مۇندا كەلگەندەر ەلىمىزدىڭ ون ءتورت وبلىسى مەن استانا جانە الماتى قالالارىنىڭ تاريحى, مادەنيەتى, كورىكتى عيماراتتارىمەن تانىسا الادى» دەدى كەشەن ديرەكتورى ءۇمىتحان مۇڭالباەۆا.
ديرەكتوردىڭ ورىنباسارى باتىرحان جۇماباەۆتىڭ ايتۋىنشا, كەشەندە بارلىعى 517 ماكەت جيناقتالعان. ولاردى ماۋسىم بويى «ۇزدىك گيد» بايقاۋىنىڭ جەڭىمپازدارى اتانعان جاسوسپىرىمدەر تانىستىرادى. بيىلعى بايقاۋ 1 ءساۋىر كۇنى باستالىپ, ءبىر اي بويى جۇرگەن. وعان استاناداعى 50 مەكتەپتىڭ وقۋشىلارى ءوتىنىش بەرگەن. ءبىرىنشى تۋرعا 680 بالا قاتىسىپ, ولاردىڭ 405-ءسى كەلەسى كەزەڭگە وتكەن. ناتيجەسىندە 70-تەي بالا قارا وزىپ شىققان. اشىلۋ ماۋسىمىندا ولاردى ماراپاتتاۋ ءراسىمى وتكىزىلدى. ارنايى سەرتيفيكاتتار, ءبىرىنشى, ەكىنشى, ءۇشىنشى ورىن جۇلدەلەرى تاپسىرىلدى. ال, گران-پري ءتورت بالاعا بۇيىردى. ولار – قازاق-تۇرىك ليتسەيىنىڭ وقۋشىسى بيبىگۇل سماتاەۆا, №66 جالپى ءبىلىم بەرۋ مەكتەبىنىڭ شاكىرتتەرى سابينا ماحامبەتتاجيەۆا مەن نۇراي نىعمانوۆا جانە №46 ورتا مەكتەپتىڭ تاربيەلەنۋشىسى ەكاتەرينا سەدوۆا. ايتا كەتۋ كەرەك, بايقاۋ جەڭىمپازدارى «اتامەكەندەگى» ماۋسىمدىق جۇمىسى ءۇشىن جالاقى الاتىن بولادى.
امانعالي قالجانوۆ
