1 مامىر – قازاقستان حالقىنىڭ بىرلىگى كۇنى استانالىقتار ۇشىنقۋانىشى مەن شاتتىعى مول مەرەكەگە ۇلاستى. «قازاق ەلى» مونۋمەنتى الاڭىندا وتكەن جالپىقالالىق دۋمانعا ەلباسى نۇرسۇلتان نازارباەۆتىڭ وزىقاتىسىپ, بۇقاراعا اتاۋلى مەيرامنىڭ ايرىقشا مانگە يە ەكەنىن ايتتى.
– «بىرلىك» ءسوزىنىڭ ماعىناسى تەرەڭ. بىرلىگى بولسا عانا وتباسى بەرىك بولادى. ەگەر كاسىپورىندا بىرلىك بولماسا, ول وركەندەمەيدى. ال, مەملەكەتتە بىرلىك بولماسا, ول كۇيرەيدى. سوندىقتان بىرلىك – ءبىزدىڭ مەملەكەتتىگىمىزدىڭ وزەگى. قازاقستاندا ءتۇرلى ەتنوس وكىلدەرى ءومىر سۇرەدى, ولاردىڭ بىرلىگى, باۋىرلاستىعى – تىنىشتىقتىڭ نەگىزى. ادامدار الاڭسىز, تاتۋلىق پەن كەلىسىمدە ءومىر سۇرسە – ناعىز باقىت وسى. جەكە دارا باقىتتى بولۋ مۇمكىن ەمەس, باق-بەرەكە ەلدىڭ جالپى جاعدايىنا بايلانىستى. سوندىقتان قازاقستانداعى بىرلىك پەن كەلىسىمدى باعالاي ءبىلىپ, بالالارىمىزعا مۇرا ەتۋىمىز كەرەك, – دەدى ەلباسى.
تويعا جينالعان قاراقۇرىم حالىقتىڭ قۋانىشى سەكىلدى التىن كۇن دە سول ۋاقىتتا شۋاعىن ارمانسىز توگىپ, بارشاعا ەرەكشە كوڭىل-كۇي سىيلاپ تۇردى. اسەم ءان مەن مىڭ بۇرالعان بي ەلدىڭ ەڭسەسىن كوتەرىپ جاتسا, ءتۇرلى-ءتۇرلى تەاترلانعان كورىنىستەر جەرىمىزدى مەكەندەگەن ءار ۇلتتىڭ ەرتەڭى مەن بۇگىنگىسىن ادەمىلەپ كورسەتتى.
مەملەكەت باسشىسى ىنتىماعىمىزدىڭ ارقاسىندا تويلانىپ جاتقان جالپىحالىقتىق مەرەكەنىڭ نەگىزى ەڭبەكتە ەكەنىن ايتىپ, «ەگەر ادام قولمەن جۇمىس ىستەسە, ول – ەڭبەككەر, قولمەن جانە باسپەن جۇمىس ىستەسە, وندا ول – شەبەر. ال, ەگەر قولمەن, باسپەن جانە جۇرەكپەن ىستەسە, ول – سۋرەتكەر. ەڭبەكپەن جەتكەننىڭ بارلىعى باقىت پەن بەرەكە اكەلەدى. ءبىز بىرگە ەڭبەك ەتىپ, ەلىمىزدى دامىتىپ, ءومىرىمىزدى جاقسارتۋدامىز. وسىنىڭ ارقاسىندا بالالارىمىز بولاشاققا زور سەنىممەن قارايدى» دەگەن ول ءاربىر قازاقستاندىقتى ەلى ءۇشىن ادال قىزمەت ەتۋگە شاقىردى.
نۇريسلام قۇسپانعالي
