قالانى تاڭعى ۋاقىتتا ارالاعان سارىارقا اۋدانىنىڭ اكىمى ەسەت بايكەن اۋدانداعى كوپپاتەرلى ۇيلەر اۋلالارىنىڭ سانيتارلىق جاعدايى مەن اباتتاندىرىلۋىن تەكسەردى.
سونىڭ ىشىندە ي.قۇتپانۇلى, ى.التىنسارين, ءى.ەسەنبەرلين كوشەلەرى مەن جەڭىس داڭعىلىنداعى بىرقاتار اۋلالاردى ارالادى. اۋدان باسشىسى مەكتەپتەر اۋلالارىنىڭ تازالىعىنا نازار اۋداردى. ەڭ الدىمەن ءبىلىم بەرۋ نىساندارىنىڭ اۋلالارىن تازالاۋ كەرەكتىگىن, قىستا دا قاردى تازالاۋدى مەكتەپتەردەن باستاۋ قاجەتتىگىن ەرەكشە اتاپ ءوتتى. كەيبىر اۋلالاردىڭ تازالىعىنا بايلانىستى اكىمدىكتىڭ ءتيىستى اۋماققا جاۋاپتى قىزمەتكەرلەرى مەن مەردىگەرلەرىنە ەسكەرتۋ جاسادى.
ءى.ەسەنبەرلين, 13 مەكەنجايىندا بىرنەشە جىل بۇرىن «بيۋدجەتكە قاتىسۋ» باعدارلاماسى اياسىندا بالالاردىڭ ويىن الاڭى ورناتىلدى. الايدا قۇم عانا توسەلگەن. جاڭبىرلى كۇندەرى وسى جەردە جەر ەزىلىپ جاتادى. اۋدان اكىمى قول استىنداعى قىزمەتكەرلەرگە الاڭعا گازون توسەۋدى قاراستىرۋدى تاپسىردى.
– ەلوردادا قازىر ساپالى گازوندار ساتىلىمدا جوق ەكەن. جاقسى گازونداردى باسقا قالالاردان ىزدەستىرۋدى تاپسىردىم. ەگەر تابىلاتىن بولسا, بيىل توسەيمىز. بولماسا, كەلەسى جىلدىڭ جوسپارىنا ەنگىزەمىز, – دەدى ە.بايكەن.
ى.التىنسارين كوشەسىندەگى مەديتسينا كوللەدجى ماڭايىنداعى ەسكى, اپاتتى ۇيلەر ءسۇرىلىپ, تۇرعىندار كوشىرىلدى. قازىر بۇل ۇيلەردىڭ ورنىنا اتالمىش كوللەدجدىڭ جاتاقحاناسى سالىنىپ جاتىر. بىراق سول ماڭاي ءالى تازالانباي, لاستانىپ جاتىر. اۋدان باسشىسى دەرەۋ ءتيىستى شارالاردى قابىلداۋدى تاپسىردى.
اۋلالاردى ارالاۋ قورىتىندىسىندا اباتتاندىرىلماعان, جوندەۋدى قاجەت ەتەتىن اۋلالار نازارعا الىنىپ, ولاردى كەلەسى جىلدىڭ جوسپارىنا ەنگىزۋ ماسەلەسى قارالاتىن بولدى. بۇل ماسەلەلەر «بيۋدجەتكە قاتىسۋ» باعدارلاماسى اياسىندا تۇرعىندارمەن تالقىلانادى.
