پاتەر يەلەرى كووپەراتيۆتەرى (پيك) جانە مۇلىك يەلەرى بىرلەستىگىنىڭ (ميب) وكىلدەرىمەن كەزدەسكەن سارىارقا اۋدانىنىڭ اكىمى ەسەت بايكەن حالىق ساناعىنىڭ ءوتۋ بارىسىنا قاتىستى جيىن وتكىزدى.
كەزدەسۋگە قاتىسقان ستاتيستيكا دەپارتامەنتىنىڭ وكىلى ينتەرۆيۋەرلەر 1 قازاننان ۇيلەردى ارالاۋ باستاعانىن ايتتى. بۇل جۇمىستا تۇرعىن ۇيگە قىزمەت كورسەتۋشى ۇيىمداردىڭ (پيك, ميب) بايلانىس ۇستاۋدىڭ ماڭىزىن اتاپ ءوتتى. حالىق ساناعى جايلى تۇرعىنداردى حاباردار ەتۋ, ينتەرۆيۋەرلەردىڭ پاتەرلەرگە كەدەرگىسىز كىرۋگە جاعداي جاساۋعا جاۋاپكەرشىلىكپەن قاراۋ كەرەكتىگىن جەتكىزدى.
قازىرگى تاڭدا سارىارقا اۋدانى بويىنشا حالىق ساناعىنان 78 000-نان استام ادام وتكەن. «حالىق ساناعى ەلىمىزدىڭ الداعى دامۋ جوسپارىنا ۇلكەن اسەرىن تيگىزەدى» دەدى ە.بايكەن.
جينالىس بارىسىندا اۋدان تۇرعىندارىنان ءىkomek -109 ورتالىعىنا تۇسەتىن وتىنىشتەرىمەن جۇمىس جايى دا تالقىلاندى. «وتىنىشتەردىڭ باسىم كوپشىلىگى كوممۋنالدىق قىزمەتتەرگە بايلانىستى بولىپ وتىر. سول سەبەپتى, اۋدان اكىمدىگى مەن كوممۋنالدىق قىزمەتتەر اراسىندا جەدەل ارەكەت ەتۋ قاعيداسى جۇمىس ىستەۋ كەرەك» دەدى اۋدان اكىمى.
كوپپاتەرلى تۇرعىن ۇيلەردەگى ماسەلەلەردىڭ ءبىرى – كۇردەلى جوندەۋ جۇمىستارى بولسا, «نۇرلى جەر – 2020-2025» باعدارلاماسى ارقىلى قازىرگى تاڭدا اۋداندا 41 ءۇي جوندەلدى.
«اتالمىش باعدارلاما ارقىلى ليفتتەردى, ينجەنەرلىك جەلىلەردى, ءۇيدىڭ توبەسىن, ىشكى جانە سىرتقى جوندەۋ جۇمىستارىن جۇرگىزۋگە بولادى. بۇل ءۇشىن ەڭ الدىمەن تۇرعىنداردىڭ باسىم كوپشىلىگىنىڭ كەلىسىمى قاجەت. باعدارلاماعا جاۋاپتى – «وركەن قالا» جشس» دەدى ە.بايكەن.
سونىمەن قاتار پيك جانە ميب وكىلدەرىمەن اۋلالاردىڭ تازالىعى ماسەلەسى تالقىلاندى. مەردىگەر ۇيىمداردىڭ جاز مەزگىلىندەگى جۇمىسىنىڭ ناتيجەسى مەن قىسقا دايىندىقتارى تۋرالى ماسەلە قوزعالدى.
«الداعى ۋاقىتتا پيك پەن ميب باسشىلارى ساپاسىز جۇمىس ىستەگەن مەردىگەر ۇيىمدار تۋرالى وزىمە تىكەلەي حابارلاپ وتىراتىن بولادى. تۇرعىندار ەڭ الدىمەن وزدەرىنىڭ قىزمەت كورسەتۋشى ۇيىمىنا جۇگىنەتىنىنە سۇيەنسەك, بۇل تاجىريبە وڭ ناتيجەسىن بەرەدى. قازان ايىنىڭ سوڭىندا مەردىگەر ۇيىمداردىڭ اۋلالاردى تازالاۋ كەستەسى ءار تۇرعىن ءۇيدىڭ حابارلاما تاقتاسىنا ىلىنەتىن بولادى» دەپ تۇيىندەدى اۋدان اكىمى.
