سارىارقا اۋدانىنىڭ اكىمى ەسەت بايكەن اۋدان اۋماعىنداعى ءبىلىم بەرۋ ۇيىمدارى باسشىلارىمەن كەزدەستى. قازىر اتالمىش اۋداندا 33 ورتا مەكتەپ پەن 31 بالاباقشا جۇمىس ىستەيدى.
اكىمنىڭ ايتۋىنشا, بۇگىنگى تاڭدا وزەكتى ماسەلەلەردىڭ ءبىرى – بالالاردىڭ وقۋ ورىندارىنداعى قاۋىپسىزدىگى. كەزدەسۋدە ءبىلىم بەرۋ نىساندارىنىڭ قاۋىپسىزدىگى ماسەلەلەرى تالقىلاندى.
«وقۋ ورنىنىڭ قاۋىپسىزدىك جۇيەسى بوتەن ادامداردىڭ كىرۋىنەن قورعاۋ, بەينەكامەرالارمەن, تۋرنيكەتتەرمەن, دابىل تۇيمەلەرىمەن جابدىقتالۋى ءتيىس. وزدەرىڭىز بىلەتىندەي, مەكتەپتەردەگى كۇزەت قىزمەتىن ۆاحتەرلەر اتقارادى. ولاردىڭ كوبىسى – زەينەت جاسىنداعى ادامدار. جالاقىنىڭ ازدىعىن كورىپ, جاس ءارى قابىلەتتى ەر-ازاماتتار بۇل لاۋازىمعا بارۋدان باس تارتادى» دەدى ە.بايكەن.
جيىندا اۋداننىڭ پوليتسيا باسقارماسى مەن قالالىق ءبىلىم باسقارماسىنا مەكتەپتەگى كۇزەت جۇيەسىن رەتكە كەلتىرىپ, ءتيىمدى ورتاق شەشىمدى شۇعىل تۇردە قولعا الۋ ۇسىنىلدى. سونداي-اق مەكتەپتەردىڭ اينالاسىندا جول-كولىك ينفراقۇرىلىمىنىڭ قاۋىپسىزدىگى, باعدارشامدار مەن جول بەلگىلەرىن ورناتۋ, جارىقتاندىرۋ سياقتى ماسەلەلەر قاتاڭ باقىلاۋعا الىناتىنى ايتىلدى.
جينالىس بارىسىندا كوتەرىلگەن تاعى ءبىر ماسەلە – مەكتەپتەردەگى بالا سانىنىڭ تىعىزدىلىعى.
«ەلوردادا حالىقتىڭ قارقىندى ءوسۋىن ەسكەرە وتىرىپ, وقىتۋدىڭ ءۇش اۋىسىمدىق رەجيمىنە جول بەرمەۋ ماقساتىندا جاڭا مەكتەپتەر سالۋ قاجەت. الداعى 3 جىلعا ارنالعان مەكتەپتەردىڭ قۇرىلىس جوسپارىن قابىلدادىق. جوسپاردا «BINOM SCHOOL» تاجىريبەسى بويىنشا قازىرگى زامان تالاپتارىنا ساي مەكتەپتەردىڭ دە قۇرىلىسى ەسكەرىلگەن» دەدى اۋدان اكىمى.
كەزدەسۋگە قالالىق باسقارمالار مەن ستاتيستيكا دەپارتامەنتىنىڭ وكىلدەرى قاتىستى. ولارمەن بىرقاتار پروبلەمالىق ماسەلەلەردى شەشۋ جولدارى مەن حالىق ساناعى بارىسى تالقىلاندى. ءبىر ايتا كەتەرلىگى, سارىارقا اۋدانىنداعى مەكتەپتەر مەن بالاباقشالاردىڭ بارلىق قىزمەتكەرى حالىق ساناعىنان ءوتتى.
