اۋماقتاردى ارالاۋ بارىسىندا ە.بەكمىرزاەۆ 10 مىڭنان استام ادام تۇراتىن «جەلەزنودوروجنىي» تۇرعىن الابى تۇرعىندارىمەن كەزدەسىپ, وزەكتى ماسەلەلەر مەن تۇرعىن الاپتى دامىتۋ جوسپارلارىن تالقىلادى.
تۇرعىندار جارىقتاندىرۋ, اباتتاندىرۋ, گازداندىرۋ سياقتى ءتۇرلى ماسەلەلەردى كوتەردى. بارلىق سۇراقتار كەزدەسۋ حاتتاماسىنا ەنگىزىلدى. اۋدان باسشىسى الەۋمەتتىك-ەكونوميكالىق دامۋعا بەلسەنە قاتىسىپ جاتقان تۇرعىندارعا العىس ايتتى.
جالپى «جەلەزنودوروجنىي» تۇرعىن الابىندا 12 كوپپاتەرلى تۇرعىن ءۇي, 654 جەر ءۇي, 4 ءبىلىم بەرۋ نىسانى (№29 مەكتەپ, تەحنيكالىق كوللەدج, 2 بالاباقشا), 3 دەنساۋلىق ساقتاۋ نىسانى (№11 ەمحانانىڭ فيليالى, كوۆيد ورتالىق, تۋبديسپانسەر) بار.
تۇرعىن الاپتا جالپى ۇزىندىعى 16 شاقىرىمدى قۇرايتىن 19 كوشەنىڭ 8-ىندە اسفالت جوق. بيىل ەكى كوشە اسفالتتالدى. سونداي-اق ءال-فارابي كوشەسىنەن ج.جاباەۆ كوشەسىنە دەيىنگى ارالىقتى كەڭەيتۋ جۇرگىزىلىپ جاتىر. كەرەگەتاس كوشەسىندە 21 جارىقتاندىرۋ باعانى, 21 اسپاشام, اقجار كوشەسىندە قوسىمشا 2 اسپاشام ورناتىلدى.
«جەلەزنودوروجنىيدى» گازداندىرۋ جوباسى تولىعىمەن 2020 جىلى اياقتالدى. 654 ابونەنتتىڭ 254-ىنە تەحنيكالىق شارتتار بەرىلىپ, 84 ابونەنت گازعا قوسىلدى. بۇل تۇرعىن الاپتا قوعامدىق كولىكتىڭ قاتىناۋى مەن جولدار قۇرىلىسى بويىنشا پروبلەمالار بار. ەكىباستۇز كوشەسىندە جول ناشار بولعاندىقتان, №15 باعدار اتالعان كوشەگە بارمايدى. ول ءۇشىن بۇل كوشەنى جوندەۋ كەرەك. اقتاستى, اقجار, اشىساي, يماناق, وربۇلاق, ەكىباستۇز, شالقار, ن.تورەقۇلۇلى كوشەلەرىن اباتتاندىرۋدىڭ كەشەندى جوباسىنا قوسۋ قاجەت.
اتالمىش ەلدى مەكەندەگى ەلەكترمەن جابدىقتاۋ جەلىلەرىنىڭ 80 پايىزى توزدى. جاعدايدى تۇزەۋ ءۇشىن «قازبەك» قوسالقى ستانساسى قۇرىلىسىن تەزدەتىپ, جاڭا جەلىلەردى «استانا-رەك» اق بالانسىنا بەرۋ كەرەك. بۇعان قوسا, ەكى تاراتۋ جەلىسى مەن ترانسفورماتور جەلىسىن سالۋ كەرەك. بۇل جوبانىڭ قۇنى – 4 ملرد تەڭگە.
