كەشە مەملەكەت باسشىسى ن.نازارباەۆ س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ رەكتورى اقىلبەك كۇرىشباەۆتى قابىلدادى.
كەزدەسۋ بارىسىندا وتاندىق اگرارلىق عىلىمنىڭ جاي-كۇيى, سونداي-اق ونى ودان ءارى دامىتۋدىڭ وزەكتى ماسەلەلەرى تالقىلاندى. ا.كۇرىشباەۆ ۋنيۆەرسيتەتتىڭ سوڭعى جىلدارى قول جەتكىزگەن جەتىستىكتەرى جانە جوعارى وقۋ ورنى بازاسىندا حالىقارالىق اگرارلىق زەرتتەۋ ۋنيۆەرسيتەتىن قۇرۋ جونىندەگى مەملەكەت باسشىسى تاپسىرماسىنىڭ ىسكە اسىرىلۋى تۋرالى باياندادى.
نۇرسۇلتان نازارباەۆ قازاقستاندا جەتكىلىكتى كولەمدە جەر جانە ادام رەسۋرستارى بار ەكەنىنە قاراماستان, ەلىمىزدە اۋىل شارۋاشىلىعى سالاسى ءتيىستى قارقىندا دامىماي وتىرعانىن ايتتى.
– ءبىز اۋا-رايى قولايلى, جاۋىن-شاشىن قاجەتتى مولشەردە بولعاندا عانا مول استىق جينايمىز. ارينە, اۋىل شارۋاشىلىعىندا ونىمدىلىك بۇرىنعى جىلدارمەن سالىستىرعاندا ايتارلىقتاي ارتتى, بىراق ءالى دە بۇل باعىتتا بەلسەنە جۇمىس جۇرگىزۋ مىندەتى تۇر. مەملەكەت وسى مىندەتتىڭ ورىندالۋىنا ەداۋىر رەسۋرستار بولۋدە, – دەدى قازاقستان پرەزيدەنتى.
مەملەكەت باسشىسى اگروونەركاسىپ كەشەنىندە سىننان وتكەن الەمدىك تەحنولوگيالاردى پايدالانعان ءجون ەكەنىن, ولاردى قازاقستان جاعدايىن ەسكەرە وتىرىپ ەنگىزۋ قاجەتتىگىن ايتتى.
– اگروونەركاسىپ كەشەنىن دامىتۋ سالاسىندا جۇمىستى كوپتەگەن عىلىمي-زەرتتەۋ ينستيتۋتتارىمەن بىرگە «قازاگرويننوۆاتسيا» جۇرگىزۋدە جانە مەملەكەت ونىڭ جۇمىس ىستەۋى ءۇشىن جىل سايىن ايتارلىقتاي قاراجات ءبولىپ كەلەدى. الايدا, وسىناۋ زەرتتەۋ قۇرىلىمدارى مەن فەرمەرلەر اراسىندا ءتيىستى دەڭگەيدەگى ءوزارا ءىس-قيمىل جوق, – دەدى نۇرسۇلتان نازارباەۆ.
كەزدەسۋ بارىسىندا ا.كۇرىشباەۆ اگرارلىق زەرتتەۋ ۋنيۆەرسيتەتىن قۇرۋ تۇجىرىمداماسىن ازىرلەۋ جونىندەگى جۇمىس, باسقارۋ جۇيەسى مەن ءبىلىم بەرۋ ۇدەرىسىن رەفورمالاۋدىڭ باستالعانى تۋرالى حابارلادى. بۇعان قوسا, شەت ەلدەردىڭ جەتەكشى ۋنيۆەرسيتەتتەرىمەن جانە عىلىمي ورتالىقتارىمەن ىنتىماقتاستىق ورناپ, پيلوتتىق حالىقارالىق زەرتتەۋ باعدارلامالارى دايىندالدى.
كەزدەسۋ قورىتىندىسىندا مەملەكەت باسشىسى قارالعان ماسەلەلەر بويىنشا بىرقاتار ناقتى تاپسىرمالار بەردى.
