جارتى عاسىر عۇمىرىن ءبىر عانا سالادا ەڭبەك ەتۋگە ارناعان ادامدار بۇگىندە ساۋساقپەن سانارلىقتاي. سەكسەننىڭ سەڭگىرىنە شىققان وتەگەن اعا ابىلقاسىموۆ وسىنداي جانداردىڭ قاتارىنان.
وتەكەڭدى استانالىقتارعا تانىستىرۋدىڭ ءوزى ارتىقتاۋ. ويتكەنى, ول وسى وڭىردە تۋىپ-ءوسىپ, وسى جەردە ەسەيدى. ءومىرىنىڭ ەلۋ جىلىن كەشەگى اقمولا, قازىرگى استانا قالاسىنىڭ بايلانىس سالاسىن دامىتۋعا ارناپ, سوڭعى جيىرما جىلعا جۋىق ۋاقىتتا ونىڭ وبلىستىق مەكەمەسىن باسقارعان بەلگىلى ازامات.
بۇگىندە ەل ىشىندە ابىروي-بەدەلى بار سىيلى اقساقالدىڭ ءجۇرىپ وتكەن جولىنا قىسقاشا توقتالار بولساق, ول ءبىر مىڭ توعىز ءجۇز وتىز ءۇشىنشى جىلدىڭ ەكىنشى مامىرىندا اقمولا وبلىسى قورعالجىن اۋدانىنىڭ جۇماي, قازىرگى كوممۋنا اۋىلىندا اۋىلدىق كەڭەستىڭ توراعاسى ابىلقاسىم اقساقالدىڭ وتباسىندا دۇنيەگە كەلەدى. وسىعان دەيىن ەكى بىردەي ۇلىنان ايرىلعان اكە سولاردىڭ وتەۋى بولسىن دەپ, جاڭا تۋعان شاقالاققا وتەگەن دەپ ات قويادى.
جاسىنان زەرەك, وقۋعا ىنتالى بولسا دا, ورىسشاعا شورقاقتاۋ ەدى. سونىڭ سالدارىنان ءوزى تاڭداعان الماتىداعى تاۋ-كەن ينستيتۋتىنا تۇسە الماي, اۋىلعا قايتىپ بارعىسى كەلمەگەندىكتەن, سول جەردەگى بۇكىلوداقتىق بايلانىس تەحنيكۋمىنا قۇجات تاپسىرىپ, سوندا وقۋعا تۇسەدى. ونىڭ ءۇشىنشى كۋرسىن وتە جاقسى دەگەن باعامەن ءبىتىرىپ, ەلگە كەلگەننەن كەيىن العاشقى ەڭبەك جولىن «وركەندەۋ» كولحوزىندا بايلانىسشى بولىپ باستايدى. ول تۇستا ۇجىمشار توراعاسى جارماق وسپانوۆ دەگەن ازامات بولاتىن. سول جەرگە وسى اۋىلعا العاش رەت ءجۇز نۇكتەلىك راديو توراپ ورناتقانى ءدال كەشەگىدەي كوز الدىندا. حالىقتىڭ دا قۋانىشىندا شەك جوق. ودان كەيىن اسكەر قاتارىنا الىنىپ, وتان الدىنداعى ازاماتتىق بورىشىن ابىرويمەن اتقارىپ كەلەدى. ەل ىشىندە «مۇعالىم بول, بايلانىسشى دەگەن نە ماماندىق؟» دەپ اقىل ايتقاندار كوپ بولدى. بىراق, وتەكەڭ العان بەتىنەن قايتپادى. باستاعان ءىسىن اياعىنا دەيىن تىندىرمايىنشا تىنبايتىن ول 1957 جىلى قورعالجىن اۋداندىق بايلانىس ءبولىمى باستىعىنىڭ ورىنباسارى, 1959 جىلى ءبولىم باستىعى بولدى. وسى قىزمەتتى 1966 جىلعا دەيىن اتقارىپ, سول جىلى تسەلينوگراد وبلىستىق وندىرىستىك-بايلانىس باسقارماسى باستىعىنىڭ ورىنباسارلىعىنا تاعايىندالادى. مىنە, سول قىزمەتتى وتەكەڭ 2001 جىلعا دەيىن اتقاردى.
كەڭەستەر وداعى تاراعان تۇستا بايلانىس سالاسى ەلەكتر بايلانىس ءبولىمى جانە پوشتا بايلانىس ءبولىمى بولىپ ەكىگە ءبولىندى. سوندا الپىسقا كەلگەن جاسىنا قاراماي, جوعارىداعىلار ونى اقمولا وبلىستىق پوشتا ءبولىمىنىڭ باستىعى ەتىپ تاعايىندايدى. سول قىزمەتتى 1998 جىلعا دەيىن ابىرويمەن اتقارعان وتەكەڭ الپىس بەس جاسىندا زەينەتكەرلىك دەمالىسقا شىعادى. بىراق, بايلانىس مينيسترلىگى مەن كانىگى جورا-جولداستاردىڭ شاقىرتۋىمەن قايتادان جۇمىسقا الىنادى. ءسويتىپ, اقمولا وبلىسىنىڭ تەلەكومىنا باس ديرەكتوردىڭ كەڭەسشىسى رەتىندە جۇمىسقا قابىلدانىپ, جەتپىسكە كەلگەنشە سول مىندەتتى اتقارادى.
ەلىنە سىڭىرگەن ەڭبەگى ەسكەرۋسىز قالمادى. «قازاقستاننىڭ ەڭبەك سىڭىرگەن بايلانىسشىسى» اتاعىن الدى. بىرنەشە مەدالمەن ماراپاتتالدى.
ول كەزدە وسى اقمولانىڭ باسىندا قالالىق, رەسپۋبليكالىق 16 گازەت شىعاتىن. بايلانىس سالاسىنداعى جۇمىستىڭ جۇيەلىلىگىنىڭ ارقاسىندا شالعاي اۋىلداردىڭ وزىنە سول باسىلىمدار تاڭەرتەڭگى ساعات سەگىزدە جەتكىزىلەتىن.
– قانداي جاعدايدا بولماسىن حات-حابارسىز بولمايدى. حات جازۋ دەگەن قازىرگى كەزدە ۇمىتىلىپ بارادى. اسىرەسە, جاڭا جىلدىڭ قارساڭىندا سوتكەسىنە ءبىر جارىم توننا قۇتتىقتاۋ وتكرىتكالارى جىبەرىلەتىن. قازىر مۇلدەم ازايدى عوي. دەگەنمەن, نەگىزىندە حات-حاباردى ءوز قولىڭمەن جازىپ, حابارلاسقاننان ارتىق ەشتەڭە جوق, – دەيدى ءو.ابىلقاسىموۆ.
«قازاقستاننىڭ ەڭبەك سىڭىرگەن بايلانىسشىسى», ەڭبەك ارداگەرى, ەلىنە ەلەۋلى, حالقىنا قالاۋلى ازامات وتەگەن ابىلقاسىمۇلىن «استانا پوچتامتى» ۇجىمى ەرەكشە قۇرمەت تۇتاتىنىن بىلەمىز. وسىنداي ايتۋلى كۇن اياسىندا ۇجىم مۇشەلەرى – مەرەيتوي يەگەرىن قىزۋ قۇتتىقتاپ, قۋانىشقا ورتاقتاس. ويتكەنى, بۇل مەكەمەدە وتەگەن اعانىڭ ايرىقشا ءىزى قالعان.
ءتالىم-تاربيەنىڭ ارقاسىندا بولار, كىسىلىككە كىر شالدىرماي, ادام دەگەن ارداقتى اتقا داق تۇسىرمەي كەلەدى. ۇرپاعىنا دا ادال ەڭبەك ەتۋدى ۇيرەتۋدەن جالىقپادى. سونىڭ ارقاسى شىعار, كوپ جىل ۇستازدىق ەتكەن سوفيا جەڭگەي ەكەۋى ءوسىرىپ تاربيەلەگەن بالاپاندارى بۇگىندە ءار سالانىڭ بىلىكتى ماماندارى اتانىپ ءجۇر. ۇلكەن قىزى – كارديولوگ, رەسپۋبليكالىق اۋرۋحانادا جوعارى ساناتتى دارىگەر بولسا, ودان كەيىنگى قىزدارى دا ەل ىشىندە ادال ەڭبەك ەتۋدە.
وتەكەڭ – رۋحاني باي ادام. جەكە كىتاپحاناسىندا قازاقتىڭ عانا ەمەس, ورىستىڭ, ءتىپتى, شەتەل ادەبيەتىنىڭ شىعارمالارى دا بار. ءدىني ساۋاتتى. بايۋدى ويلاعان ادام ەمەس. بالالارىنا كولدەنەڭ كەلگەن تابىستىڭ ابىروي اپەرمەيتىنىن ءجيى ايتىپ وتىرادى. قازىرگىلەردىڭ كىتاپ وقىمايتىنىنا, گازەت قارامايتىنىنا قىنجىلادى.
«وسى جاسىما كەلگەنشە مەن باسقا ءبىر سالادا قىزمەت ىستەگەن ادام ەمەسپىن. ەلۋ ءبىر جىل ءۇزىلىسسىز ءبىر عانا سالادا قىزمەت اتقاردىم. مەن ارقاشان قىزمەتكەرلەرىمە دە حالىققا مادەنيەتتىلىكپەن, ءبىلىمدىلىكپەن, ءوز قابىلەتتەرىڭمەن, جاقسىلاپ قىزمەت ەتىڭدەر دەپ ايتىپ وتىراتىنمىن. ويتكەنى, ادامنىڭ باستى بايلىعى – حالقىنا ىستەگەن ەڭبەگى» دەيدى ءو.ابىلقاسىموۆ.
گۇلبارشىن وكەشقىزى
