مەديتسينا عىلىمىنىڭ كانديداتى, بىلىكتىلىك ساناتى جوعارى وفتالموحيرۋرگ قۋاتحان ماناباەۆ تاڭداۋلىلار قاتارىنان تابىلۋعا ابدەن لايىق. ويتكەنى, ول كوپتەگەن ناۋقاستىڭ جانارىنا جارىق سىيلاعان.
كوز كورۋىن ەكسيمەرلازەرلى تۇزەتۋ ماماندىعىن رەسەي, گەرمانيا, فرانتسيادا مەڭگەرگەن دارىگەر وسى ۋاقىتقا دەيىن التى مىڭعا جۋىق وپەراتسيا جاساعان. بۇگىندە «ورتالىق جول اۋرۋحاناسى» فيليالى ديرەكتورىنىڭ ورىنباسارى قىزمەتىن اتقارادى. باسشى بولسا دا, زاماناۋي مەديتسينالىق قۇرال-جابدىقتاردىڭ كومەگىمەن كۇنىنە 5-6 ناۋقاستىڭ كوزىنە وپەراتسيا جاسايدى.
كوزى ناشار كورەتىن ادام ومىردە ءتۇرلى قيىندىققا كەزدەسەدى. بۇگىندە جاڭا تەحنولوگيالاردىڭ كومەگىمەن ەمدەۋدىڭ كلاسسيكالىق جانە كلاسسيكالىق ەمەس ءادىسى بار. «قازىرگى وفتالمولوگيادا كوزدىڭ كورۋىن لازەرمەن تۇزەتۋ قارقىندى دامىعان. مۇنداي جاعداي العاش رەت 1985 جىلى جاسالعان بولاتىن. بۇل ءادىستىڭ تيىمدىلىگى مەن قاۋىپسىزدىگى تۋرالى سەنىممەن ايتۋعا بولادى. لازەرلى وپەراتسيا بۇگىنگى كۇنى ميلليونداعان ادامدارعا ءارتۇرلى كورۋ كەمىستىگىن (جاقىننان كورمەۋ, الىستان كورمەۋ, استيگماتيزم, پرەسبيوپيا) تۇزەتۋگە مۇمكىندىك بەرۋدە» دەيدى قۋاتحان ماناباەۆ.
كاسىبي بىلىكتىلىگى جوعارى دارىگەردىڭ ايتۋىنشا, استانالىقتاردىڭ كوبى كوز اۋرۋىنا شالدىققان. ويتكەنى, كوزگە وپەراتسيا جاساۋدى قاجەت ەتەتىندەردىڭ كەزەگى 2-3 ايعا دەيىن سوزىلادى. ارالارىندا جاسى دا, جاسامىسى دا بار.
«كوز اۋرۋى جاسارىپ كەلەدى. كىشكەنتاي بالادان باستاپ, ۇلكەن كىسىلەرگە دەيىن دارىگەردىڭ قاراۋىندا كەزەكتە تۇر. بۇرىن مۇنداي وپەراتسيالار جاسى كەلگەن كىسىلەرگە جاسالسا, قازىر 30-40 جاستاعىلار كوپ جاساتادى. سەبەپ كوپ. ەڭ باستى سەبەبى – كومپيۋتەر. كۇنى بويى ۇزاق ۋاقىت كومپيۋتەردىڭ الدىنا تەلمىرگەندەر كوز اۋرۋىنا شالدىعادى. سوندىقتان, ءاربىر استانالىقتىڭ ءوز دەنساۋلىعىنا كوڭىل ءبولۋىن سۇرايمىن. كوز جانارىن ساقتاپ, ۋاقىتىلى دارىگەردىڭ قابىلداۋىندا بولىپ, اۋرۋدىڭ الدىن العانى ءجون» دەيدى ول.
استانا قالاسى ورتالىق جول اۋرۋحاناسىنىڭ كوز ميكروحيرۋرگياسى بولىمشەسىندە كوز كورۋىن تۇزەتۋگە ارنالعان ەڭ وزىق قوندىرعىلار ورناتىلعان. گەرمانيانىڭ CarlZeiss كومپانياسى وڭدىرگەن MEL80 قوندىرعىسىنىڭ ەرەكشەلىگى, تمد ەلدەرىنىڭ كلينيكالارىندا كەزدەسپەيدى. جاڭا LBV (Lazer Blended Vizion) فۋنكتسياسىمەن جابدىقتالعان قوندىرعى جاس ۇلعايۋىنا بايلانىستى الىستان كورمەۋدى (پرەسپيوبيانى) ەمدەۋگە مۇمكىندىك بەرەدى. وسى بولىمشەنىڭ اشىلۋىنا ىقپال ەتىپ, وزىنىنەن كەيىنگى بۋىنعا ۇلگى بولعان قۋاتحان ماناباەۆ جيىرما جىلدان بەرى تالاي جاننىڭ جانارىنا جارىق سىيلاپ قانا قويماي, شاكىرت تاربيلەۋدى دە ۇمىتقان ەمەس.
گۇلميرا ايماعانبەت
