بالالار جىلىندا «استانا وپەرادا» وقۋشىلارعا قولونەردى ۇيرەتەتىن شىعارماشىلىق ۇيىرمەلەر اشىلىپ جاتىر. ءبىلىم باعدارلاماسى مادەنيەت جانە سپورت مينيسترلىگى مەن نۇر-سۇلتان قالاسى اكىمدىگىنىڭ قولداۋىمەن جۇزەگە اسىرىلۋدا.
تەاتردا بالالارمەن جۇمىس ىستەۋگە ەرەكشە كوڭىل بولىنەتىنىن, شىعارماشىل, زەرەك ويلى وسكەلەڭ ۇرپاقتى تاربيەلەۋگە جانە دامىتۋعا بارلىق جاعدايلار جاسالعان. تەاتر بازاسىندا ءبىر جولدا 6-دان 14 جاسقا دەيىنگى بالالارعا ارنالعان «كيىم ۇلگىلەۋ, ءپىشۋ جانە تىگۋ», «قۇراق قۇراۋ», «اعاشقا ورنەك سالۋ», «كەسكىندەمە جانە سۋرەت» سىندى بىرنەشە ۇيىرمە اشىلادى. وقۋعا وتىنىمدەردى اتا-انالار artsport.edu.kz بىرىڭعاي پورتالىندا بەرە الادى. ۇيىرمەلەردى «استانا وپەرانىڭ» كاسىبي تاجىريبەلى قىزمەتكەرلەرى جۇرگىزەدى.
– مەملەكەت باسشىسى قاسىم-جومارت توقاەۆ ءوزىنىڭ جولداۋىندا اتاپ وتكەندەي, ءبىلىم ساپاسىن ارتتىرۋدا ەرتە كاسىپتىك باعدار بەرۋدىڭ ماڭىزى زور. وسكەلەڭ ۇرپاق بولاشاق ماماندىقتى تاڭداۋعا سانالى تۇردە قاراۋى ءتيىس, – دەيدى «استانا وپەرا» ديرەكتورى, قازاقستاننىڭ ەڭبەك سىڭىرگەن قايراتكەرى عالىم احمەدياروۆ.
جاڭا ءبىلىم باعدارلاماسى تانىمدىق ءارى قىزىقتى بولادى دەپ كۇتىلۋدە. وقىتۋ بارىسىندا قولونەردىڭ سان الۋان تۇرلەرىمەن تانىستىرۋ كوزدەلگەن, بالالار تاڭدالعان سپەكتاكلگە رەكۆيزيت, بۋتافورلىق زاتتار مەن كوستيۋمدەردى دايىندايدى. وقۋشىلاردىڭ شىعارماشىلىق امبيتسياسىن قايراۋ جانە ىنتالاندىرۋ ءۇشىن اشىق ساباقتار مەن بايقاۋلار ۇيىمداستىرۋ جوسپارلانعان. وقۋ جىلىنىڭ اياعىندا بالالار جۇمىستارى كورمەدە تانىستىرىلىپ, ءار وقۋشى سەرتيفيكاتقا يە بولادى.
«كەسكىندەمە جانە سۋرەت» كۋرسىنا 6-دان 14 جاسقا دەيىنگى بالالار قابىلدانىپ, جاس ەرەكشەلىكتەرىنە ساي ەكى توپقا بولىنەدى. بالالار كومپوزيتسيا نەگىزدەرىن, بەينەلەۋ ونەرىنىڭ ءتۇرلى جانرلارى مەن تاسىلدەرىن, قولدا بار ماتەريالداردى پايدالانۋدى مەڭگەرەدى.
«اعاشقا ورنەك سالۋ» كۋرسى اعاشتى وڭدەۋ تاسىلدەرىمەن جانە ەرەكشەلىكتەرىمەن تانىستىرۋ, ويۋ-ورنەك تۇرلەرىن ۇيرەتۋ, بۋتافورلىق بۇيىمدار جاساۋ سەكىلدى باعىتتاردى كوزدەيدى.
كيىم ۇلگىلەۋدى, ءپىشۋ مەن تىگۋدى ۇيرەنۋ دە قىزىقتى بولعالى تۇر. كۋرس 10-نان 14 جاسقا دەيىنگى جاسوسپىرىمدەرگە ارنالعان, مۇندا ولارعا ماتامەن جۇمىس ىستەۋدىڭ نەگىزگى تاسىلدەرى مەن داعدىلارىن, كيىمنىڭ ءتۇرلى بولىكتەرىنىڭ, ونىڭ ىشىندە باس كيىمنىڭ تىگىسىن كەلتىرۋدى وقىتادى. البەتتە, بارلىعى تەاترلىق كوستيۋممەن بايلانىستىرىلىپ جاسالادى.
– ستۋديا تەاترعا دەگەن قىزىعۋشىلىقتى وياتۋ, بالالاردىڭ دارىنىن دامىتۋعا سەپتەسۋ جانە قول ەڭبەگىنە باۋلۋدى عانا ماقسات ەتپەيدى, سونىمەن قاتار وقۋشىلار اراسىندا تەاترلىق قولونەردى ناسيحاتتاۋدى كوزدەيدى. بالكىم, ستۋديا تاربيەلەنۋشىلەرىنىڭ اراسىنان بىرەۋ ءوزىن ونەرمەن بايلانىستى كاسىپتە تاۋىپ قالار. ستۋديا قىزمەتىندەگى ماڭىزدى جەتىستىك, مىنە, وسى بولماق, – دەدى ع.احمەدياروۆ.
ءاسيا نۇربەكقىزى
