نۇر-سۇلتان قالاسى سارىارقا اۋدانى اكىمدىگىنىڭ قولداۋىمەن بالالار جىلى اياسىندا «باقىتتى بالالىق شاق» جوباسى وتۋدە.
جوبانىڭ ۇيىمداستىرۋشىسى گۇلبارشىن باقىتجانقىزى ەلوردامىزداعى «ايالا 2» بالاباقشاسىمەن بىرلەسە 20-دان اسا بالانى «اتامەكەن: قازاقستان كارتاسى» ەتنومەموريالدىق كەشەنىنە, «Ailand» ويىن-ساۋىق ورتالىعىنا اپارىپ, كوڭىلدەرىن كوتەردى.
جوبادا ءتۇرلى تاقىرىپتىق ويىندار ويناتىلىپ, بالدىرعانداردى تازا اۋاداعى بەلسەندىلىككە شاقىرىپ, ويىن ارقىلى مادەنيەتتىلىككە تارتىپ, سالاماتتى ءومىر سالتىن ناسيحاتتادى. بالعىنداردىڭ شىعارماشىلىق الەۋەتىن دامىتۋ باعىتىندا ەتنومەموريالدىق كەشەندە ەلىمىزدىڭ تاريحى, مادەنيەتى, گەوگرافياسى تۋرالى 500-دەن استام ەل قۇندىلىقتارىن بالالارعا تانىستىرۋ جۇمىسى جۇرگىزىلدى.
«باقىتتى بالالىق شاق» جوباسى اياسىندا نۇر-سۇلتان قالاسىنداعى الەۋمەتتىك جاعدايى تومەن بالالاردى, اتا-اناسىنان ايىرىلعان, كوپبالالى وتباسىدان شىققان بالالاردى وسىنداي ەكسكۋرسيالارعا اپارۋ جانە كوڭىل كوتەرۋ شارالارىن ۇيىمداستىرۋ جوسپارلاندى. بالدىرعانداردىڭ بالالىق شاعىن باقىتتى ەستەلىكتەرمەن وسىلايشا تولتىرعىمىز كەلەدى. جوبادا تاعى دا باسقا سپورتتىق سايىستار, ءتۇرلى شارالار كەلەسى اپتادا جالعاسىن تابادى. سپورتتىق سايىستا جەڭىسكە جەتكەن بالالارعا ارنايى سىيلىقتار تابىستالادى. وسىنداي كەرەمەت جوبالار ەلىمىزدە كوپ بولسا ەكەن» دەيدى گۇلبارشىن باقىتجانقىزى.
«ايالا 2» بالاباقشاسىنىڭ مەڭگەرۋشىسى اقكەنجە قوجاتايقىزىنىڭ ايتۋىنشا, وسىنداي شارانىڭ ماقساتى – بالاباقشاداعى بالالاردى قورشاعان ورتا مەن ومىرلىك قۇبىلىستاردى سەزىنۋگە, وزىندىك قابىلەتىن اشۋعا ۇيرەتىپ, قاراپايىم شىعارماشىلىق ىسكەرلىكتەر مەن داعدىلاردى مەڭگەرگەن بالا تۇلعاسىن قالىپتاستىرۋ.
ماقسات راحىمبەردى,
ل.گۋميلەۆ اتىنداعى
ەۇۋ ستۋدەنتى
