جاقىندا «استانا بالەت» تەاترىندا حورەوگراف مۋكارام اۆاحري قويعان «عاشىقتىڭ ءتىلى – ءتىلسىز ءتىل…» بالەتى بەس جىلدىق ۇزىلىستەن سوڭ ساحناعا قايتا ورالدى. رەنات سالاۆاتوۆ, كارل دجەنكينس جانە حاميت شاڭعاليەۆتىڭ مۋزىكاسىنا قويىلعان «عاشىقتىڭ ءتىلى – ءتىلسىز ءتىل…» ءبىر اكتىلى بالەتىنىڭ ليبرەتتو اۆتورى – قازاقستاننىڭ ەڭبەك سىڭىرگەن قايراتكەرى باقىت قايىربەكوۆ.
«عاشىقتىڭ ءتىلى – ءتىلسىز ءتىل…» – اباي پوەزياسىنا ارنالعان جارقىن ءارى مازمۇنى پالساپالىق سپەكتاكل. كوپتەگەن تەحنيكالىق تاسىلدەر, بالەتمەيستەرلىك تابىستار ارقىلى قويۋشى-حورەوگراف قازاق ادەبيەتى كلاسسيگىنىڭ پوەزياسىنا دەگەن قۇرمەتىن بىلدىرەدى. بالەت «نۇرعا بولەنۋ», «سەگiز اياق», «جىل مەزگىلدەرى», «كوزىمنىڭ قاراسى», «توي باستار», «تاتيانانىڭ حاتى», «اقىن مۇڭى», «جەلسىز تۇندە» اتالاتىن سەگىز ۆارياتسيادان تۇرادى.
«بۇل ۇلى ابايدىڭ شىعارماشىلىعىنا, ونىڭ تەرەڭ پالساپالىق وي تولعامدارىنا ارنالعان ۆارياتسيالار, بيوگرافيالىق بالەت ەمەس. مەن ءۇشىن ونىڭ ايەل كوركىن, تابيعات سۇلۋلىعىن سۋرەتتەگەن ساتتەگى كۇيىن بەينەلەۋ الدەقايدا ماڭىزدى كورىندى. بۇل قويىلىمنان سۋرەتكەردىڭ ءومىر جولىن دا اڭعارۋعا بولادى: وزىنە قۋات بەرگەن تۋعان جەرمەن بايلانىسى, ايەل زاتىنا دەگەن نازىك سەزىمى, سالتاناتتى ساۋىق-سايراننان العان اسەرى مەن جانىنا جاقىن ادامدى ىزدەۋى, جالعىزدىقتى ۇعىنۋ جانە ماحابباتتىڭ سارقىلماستىعى مەن شەكسىزدىگىن ءتۇسىنۋ» دەيدى حورەوگراف مۋكارام اۆاحري.
كەشە اتالمىش ونەر وشاعى پرەمەرا ۇسىندى. بۇل – سەرگەي پروكوفەۆتىڭ مۋزىكاسىنا رەسەي جانە تاتارستان رەسپۋبليكاسىنىڭ ەڭبەك سىڭىرگەن ءارتىسى ۆلاديمير ياكوۆلەۆ قويعان «رومەو مەن دجۋلەتتا» سپەكتاكلى. باس ديريجەر ارمان ورازعاليەۆتىڭ جەتەكشىلىگىندەگى تەاتردىڭ سيمفونيالىق وركەسترى سۇيەمەلدەيتىن پرەمەرانى بۇگىن دە تاماشالاۋعا بولادى.
