ەلوردادا قالدىقتى قايتا وڭدەپ, ونى پايداعا جاراتۋ ءىسى ىلگەرى باسىپ كەلەدى. ول ءۇشىن تۇرمىستىق قالدىقتاردى سۇرىپتاپ تاستاۋعا ارنالعان سارى كونتەينەرلەر ورناتىلىپ, پوليەتيلەن, پلاستيك سياقتى قۇرعاق قالدىقتاردى اقشاعا قابىلدايتىن پۋنكتتەر دە اشىلۋدا.
بۇل تۇرعىدا وسى ءىستىڭ باسى-قاسىندا جۇرگەن كومپانيالار سانى دا از ەمەس. بىراق سولاردىڭ كەيبىرىنىڭ ءىستى باستاعانىنان اياقتاعانى جىلدام با دەرسىڭ. مىسالى, وسىدان 6-7 اي بۇرىن «Taza Zhol 01» جشس مۇراعاتتاردى جويۋ جانە ماكۋلاتۋرانى شىعارۋ ماقساتىندا كەڭسەلەرگە ءوز قىزمەتىن ۇسىنىپ, ولارمەن كەلىسىمگە كەلگەن مەكەمەگە قاعاز جاشىگىن اكەلىپ بەرىپ, تولعان كەزدە الىپ كەتۋدى داستۇرگە اينالدىرۋعا ۋاعدالاسقان بولاتىن. سول كەزدە «قانشاما قاعاز دالاعا كەتپەيتىن بولدى» دەپ, بۇل باستاماعا تايلى-تۇياعىمىزبەن قۋانعان ەدىك. وقىرماننان ءسۇيىنشى سۇراعانداي بۇل اقپاراتتى گازەت بەتىنە دە بولىستىك. بىراق وكىنىشكە قاراي, قۋانىشىمىز ۇزاققا سوزىلمادى. الگى قوقىس جاشىگى 1-2 ايدىڭ ىشىندە قاعازعا لىق تولدى. الايدا قىزمەت كورسەتۋشىلەر سۇرىپتالىپ تۇرعان زاتتارىن الىپ كەتۋگە ءالى دە اسىعار ەمەس. جاشىك سىرتىنداعى تەلەفون نومىرىنە ءبىر ەمەس, بىرنەشە رەت حابارلاستىق. بىرەر اي بۇرىن «انە, مىنە» دەپ جاۋاپ قايىرىپ جۇرگەن كومپانيا وكىلى سوڭعى رەت قوڭىراۋ سوققاندا: «قوقىستى تاستاي سالىڭىزدار. ءبىزدىڭ بۇل جوبامىز ازىرگە توقتاپ قالدى. قازىر باسقا ىسپەن اينالىسىپ جاتىرمىز. جاڭا جىلدان كەيىن قاعاز ءوندىرىسىن قايتادان قولعا الۋىمىز مۇمكىن. سول كەزدە سىزدەرگە ءوزىمىز حابارلاسامىز» دەدى تۇتقانىڭ ار جاعىنان. قازاق «جەتى رەت ولشەپ, ءبىر رەت كەس» دەپ بەكەر ايتپاسا كەرەك. وسىنداي بۇگىن بار, ەرتەڭ جوق بولاتىن جوبالاردىڭ كەرەگى قانشا؟..
