«Bus lane» تاعى 6 كوشەگە سىزىلادى
«Bus Lane» جوباسى – قالا كوشەلەرىندەگى قوعامدىق كولىكتەردىڭ جۇرۋىنە ارنالعان ارنايى جولاق. الداعى ۋاقىتتا مۇنداي جولاق ەلوردانىڭ تاعى 6 كوشەسىندە پايدا بولادى.
ياعني كەلەر جىلى قوناەۆ, دوستىق, اقمەشىت, تۇركىستان جانە اباي, كەنەسارى كوشەلەرىندە دە قوعامدىق كولىكتەرگە ارنالعان ارنايى جولاقتى ەنگىزۋ جوسپارلانۋدا. بۇل جول قوزعالىسىن 14 پايىزعا جەڭىلدەتپەك.
جالپى, «Bus Lane» جولاعىن ەنگىزۋدىڭ ناتيجەسىندە تاڭعى جانە كەشكى ۋاقىتتاعى كولىك ءنوپىرى كەزىندەگى اۆتوبۋستاردى كۇتۋ ۋاقىتى 24 پايىزعا قىسقارعان. مىسالى, №10 اۆتوبۋس مارشرۋتىنىڭ باعىتىنداعى «Bus Lane» جولاعى 40 پايىزدى قۇرايدى. سونىڭ ىشىندە قابانباي باتىر داڭعىلى وسىنداي جولاقپەن 100 پايىز قامتىلعان. وسىنىڭ ارقاسىندا اتالمىش مارشرۋتتىڭ قوزعالىس جىلدامدىعى ارتىپ, جولاۋشىلاردىڭ ايالداماداعى كۇتۋ ۋاقىتى بۇرىنعىعا قاراعاندا 26 پايىزعا تومەندەگەن. ال كەپتەلىستى ازايتۋدىڭ تاعى ءبىر نۇسقاسى – ءبىر باعىتتى جولداردى ەنگىزۋ. ەلورداداعى مۇنداي جولدىڭ ۇزىندىعى – ازىرگە 77 شاقىرىم. الداعى ۋاقىتتا ءبىر باعىتتاعى جولداردىڭ قاتارى دا كوبەيە ءتۇسۋى مۇمكىن.