بەيبىت الەم جارشىسى

وسلونىڭ ادەبيەت ۇيىندە ەلباسى نۇرسۇلتان نازارباەۆتىڭ «بەيبىتشىلىك ەپيتسەنترى» كىتابىنىڭ نورۆەگ تىلىندەگى نۇسقاسى تانىستىرىلدى.جيىن بارىسىندا ءسوز العان قازاقستاننىڭ نورۆەگيا­داعى ەلشىسى ەركىن احينجانوۆ:
«جەتپىس جىل بۇرىن كەڭەس وداعى العاشقى اتوم بومباسىن سەمەي وڭىرىندە سىناپ كورگەن ەدى. 1991 جىلى 29 تامىزدا ەلباسى جارلىعىمەن پوليگون جابىلدى. «بەيبىتشىلىك ەپيتسەنترى» كىتابى تەك يادرولىق سىناقتاردىڭ تاريحى مەن قازاقستاننىڭ يادرولىق الەۋەتىن بولشەكتەۋ تۋرالى عانا ەمەس, ول وقىرماندى يادرولىق قارۋدان ازات الەم قۇرۋ تۋرالى ويعا جەتەلەيدى» دەدى.
ءوز كەزەگىندە نورۆەگيانىڭ بۇرىنعى پرەمەر-ءمينيسترى كەلل ماگنە بوندەۆيك:
«يادرولىق قارۋدى جويۋ جۇمىسىن كۇشەيتەتىن ءبىلىم مەن رەسۋرستاردىڭ بولعانى ماڭىزدى. وسى كىتاپتا ايتىلعان قازاقستاننىڭ تاجىريبەسى وتە پايدالى. كەڭەس وداعى ىدىراعاننان كەيىن بارلىق يادرولىق قارۋ مەن قوندىرعىنى ءوز اۋماعىنان شىعارىپ تاستاعانى ءۇشىن بۇل ەل الەمنىڭ قۇرمەتىنە يە» دەپ اتاپ ءوتتى.
سونداي-اق ءىس-شارادا بەلگىلى سۋرەتشى جانە انتيادرولىق قوزعالىستىڭ قايراتكەرى كارىپبەك كۇيىكوۆ سەمەي اۋماعى تۇرعىندارى كورگەن قايعى-قاسىرەت تۋرالى بايانداما جاساپ, جينالعان قاۋىمدى «اتوم» جوباسىن (www.theATOMProject.org) قولداۋعا جانە يادرولىق قارۋدان ازات الەم جونىندەگى پەتيتسياعا قول قويۋعا شاقىردى.
ءماتىندى نورۆەگ تىلىنە حالىقارالىق ساياساتتانۋشى جانە كاسىبي اۋدارماشى نيكولاي گەروۆ اۋدارعان. كىتاپ «Steffen Grafisk Tilrettelegging» باسپاسىندا جارىق كوردى.