استانا قالاسى اكىمدىگىنىڭ «استانا جاستارى» جاستار رەسۋرستىق ورتالىعىنىڭ ۇيىمداستىرۋىمەن ەلوردانىڭ بەلسەندى قىز-جىگىتتەرىنە ارنالعان «Jastar jalyny-2022» لاگەرى ۇيىمداستىرىلدى. ءۇش كۇنگە سوزىلعان بۇل ءىس-شارانى اسىعا كۇتكەن ستۋدەنت جاستار قالا ماڭىنداعى «التىن قىرعاۋىل» دەمالىس ورنىندا جينالدى.
«استانا جاستارى» كمك باسشىسى شىڭعىس تىلەۋليننىڭ ايتۋىنشا, لاگەر وسىمەن ءتورتىنشى جىل قاتارىنان ۇيىمداستىرىلىپ كەلەدى.
– جاستارعا ارنالعان لاگەر – جىل سايىن وتكىزىلەتىن ءداستۇرلى ءىس-شارانىڭ ءبىرى. لاگەرگە ورتا جانە جوعارى وقۋ ورىندارىنىڭ ۇزدىك دەگەن ەرىكتىلەرى مەن بەلسەندىلەرى جينالىپ, وسى جەردە باس قوسىپ وتىر. بۇل جوبانىڭ ماقساتى – جاستاردىڭ جان-جاقتى دامۋىنا جاعداي جاساپ, جاستار ورتالىعىنىڭ الدا بولاتىن ءىس-شارالارىنا جۇمىلدىرۋ, بەلسەندىلىگىن ارتتىرۋ, – دەدى ش.تىلەۋلين.
اتالمىش لاگەرگە بەلسەندىلىگىن كورسەتىپ, ءتۇرلى ءىس-شاراعا قاتىسىپ, قولداۋ بىلدىرگەن قالانىڭ ەڭ ۇزدىك جاستارى ارنايى ىرىكتەلدى. قالاداعى كوللەدج جانە جوعارى وقۋ ورىندارىنان ەكى ستۋدەنتتەن تاڭدالدى. بارلىعى 120 ستۋدەنت قاتىستى.
سولاردىڭ ءبىرى – مەنەدجمەنت, بيزنەس جانە ءبىلىم كوللەدجىنىڭ 3-كۋرس ستۋدەنتى جانەل ءجۇنىس. ايتۋىنشا, ول ەكىنشى رەت وسى ءىس-شاراعا شاقىرىلدى. كەلەسى جىلى دا قاتىساتىنىنا ءۇمىتتى.
– «استانا جاستارىنىڭ» ۇيىمداستىرۋىمەن قالامىزدىڭ بەلسەندى جاستارى وسى لاگەردە جينالدىق. لاگەردىڭ ەرەكشەلىگى – ۇزدىك ءبىلىم الۋشىلاردى ءبىر جەردە جيناپ, جاقسى ورتا قالىپتاستىراتىنىندا. ءۇش كۇنگە سوزىلسا دا, ءار قاتىسۋشىنىڭ جادىندا جاقسى ەستەلىكتەر, جىلى ەموتسيالار قالدىرادى دەپ ايتا الامىن, – دەدى ستۋدەنت.
جينالعان جاستارعا بىلىكتى مامانداردىڭ وراتورلىق شەبەرلىك, كاسىپ باستاۋدىڭ قىر-سىرى, سپورتپەن دۇرىس اينالىسۋدىڭ ەرەكشەلىگى جايىندا ارنايى شەبەرلىك ساباعى وتكىزىلدى. سونداي-اق ۇجىمدىق ويىندار, تيمبيلدينگ جانە Open air كەشى ۇيىمداستىرىلدى
