XXI عاسىر – جىلدام وزگەرىستەر عاسىرى. جاڭارۋ, وزگەرۋدى كۇندەلىكتى ومىردەن كورىپ ءجۇرمىز. ادام تاربيەسى, تۇلعانى قالىپتاستىرۋ ءىسى دە ءبىر ورىندا تۇرمايدى, ۇنەمى ىزدەنىس, جەتىلدىرۋ ۇستىندە. ەلوردانىڭ ۇستازدارى, مەكتەپتەرى قاي جاعىنان دا رەسپۋبليكا مەكتەپتەرىنە ۇلگى بولىپ وتىرعانى بەلگىلى. وسى ورايدا جاقىندا استانا قالاسى مەملەكەتتىك مەكتەپتەرى حالىقارالىق باكالاۆريات باعدارلاماسى بويىنشا ءىس-تاجىريبەسىمەن رەسپۋبليكا كولەمىندە ءبولىستى.
بەرەرى مول شەبەرلىك ساباقتارى
استانا قالاسى اكىمدىگىنىڭ «ادىستەمەلىك ورتالىعى» مكقك مەن №81 «Astana English School» حالىقارالىق مامانداندىرىلعان گيمنازياسى «حالىقارالىق باكالاۆريات MYP جانە PYP: قاعيدادان تاجىريبەگە» اتتى رەسپۋبليكالىق سەمينار وتكىزدى.
باعدارلاما اياسىندا «مەكتەپ قاۋىمداستىعى School community» اتتى كورمە ۇيىمداستىرىلىپ, «پەداگوگيكالىق جارمەڭكە» تاقىرىبىندا اشىق ساباقتار, «پەداگوگيكالىق شەبەرحانا» شەبەر-سىنىپتار, «Poster session: ىنتىماقتاستىق Collaboration» پوستەر سەسسياسى جانە «READح», TEDx AES ءسوز شەبەرى جوباسىنىڭ تانىستىرىلىمى ءوتتى.
سەمينارعا استانا قالاسى ءبىلىم باسقارماسىنىڭ باسشىسى ق.سەنعازىەۆ, ى.التىنسارين اتىنداعى ۇلتتىق ءبىلىم اكادەمياسى ادىستەمەلىك قىزمەتتى ۇيلەستىرۋ جانە پەداگوگتى كاسىبي دامىتۋ ورتالىعىنىڭ ديرەكتورى ە.جۇماشوۆ, رەسپۋبليكالىق «دارىن» عىلىمي پراكتيكالىق ورتالىعىنىڭ ديرەكتورى گ.تۇرسىنوۆ, رەسپۋبليكا كولەمىندە ءبىلىم بەرۋ ۇيىمدارىنىڭ باسشىلارى مەن قىزمەتكەرلەرى قاتىستى.
«2019 جىلدان باستاپ حالىقارالىق IB اۆتوريزاتسيالاۋ باعدارلاماسىنىڭ جۇزەگە اسىرىلۋى استانا قالاسىنىڭ 6 مەملەكەتتىك ءبىلىم بەرۋ ۇيىمىندا باستاۋ الدى. حالىقارالىق باكالاۆريات PYP – باستاۋىش (1-4 سىنىپتار), MYP – نەگىزگى ورتا ءبىلىم بەرۋ (5-9 سىنىپ) باعدارلامالارى بويىنشا №№66,73,81,85 مەكتەپتەر كانديدات رەتىندە جۇمىس جاسادى. ءاربىر ءبىلىم بەرۋ ۇيىمىنا IB باعدارلاماسىنىڭ حالىقارالىق كونسۋلتانتتارى بەكىتىلگەن» دەدى استانا قالاسى ءبىلىم باسقارماسىنىڭ باسشىسى ق.سەنعازىەۆ ءوزىنىڭ بايانداماسىندا.
ماقسات – باسەكەگە قابىلەتتى جاستار تاربيەلەۋ
بۇگىنگى تاڭدا №81 «Astana English School» گيمنازياسى IB حالىقارالىق باكالاۆريات باعدارلاماسى بويىنشا اۆتوريزاتسيادان ءوتىپ, دۇنيەجۇزىلىك حالىقارالىق مەكتەپ مارتەبەسىن الدى. قالعان 3 مەكتەپ جىبەرىلگەن قۇجاتتاردىڭ ناتيجەسىن كۇتۋدە. اعىمداعى جىلى №81 مەكتەپ-گيمنازياسى DP – جوعارى ءبىلىم بەرۋ (10-11 سىنىپ) باعدارلاماسىمەن جۇمىس جاساۋعا كانديداتتىققا ۇمىتكەر رەتىندە تىركەلدى. باعدارلامانىڭ نەگىزگى ماقساتى – جاھاندىق دەڭگەيدەگى باسەكەگە قابىلەتتى, كرەاتيۆتى جانە جوعارى مادەنيەتتى تۇلعا تاربيەلەۋ. باعدارلاماعا جۇمسالاتىن قاراجات ءبىلىم باسقارماسى بيۋدجەت ەسەبىنەن قارجىلاندىرىلادى. قازىرگى تاڭدا ءىۆ باعدارلاماسى بويىنشا ءبىلىم الۋشىلار سانى – 10 188 جانە 274 پەداگوگ ارنايى كۋرستان ءوتىپ سەرتيفيكاتتالدى.
ايتا كەتۋ كەرەك, 2021-2022 وقۋ جىلى 11 سىنىپتان 50 وقۋشى ايەلتس (IELTS) تەستىن تاپسىرىپ, جوعارى بالل جيناسا, 2022-2023 وقۋ جىلى 11 سىنىپتان 61 وقۋشى ايەلتس (IELTS) تەستىن تاپسىرىپ, جوعارى باللمەن كورىندى. سونىمەن قاتار ايەلتس (IELTS) ەمتيحانىن تاپسىرعان 9 پەداگوگ جاقسى ناتيجەلەر كورسەتتى. باعدارلاما اياسىندا وقۋشىلار حالىقارالىق دەڭگەيدەگى وليمپيادالار مەن بايقاۋلارعا قاتىسىپ, جۇلدەلى ورىندارعا يە بولىپ ءجۇر. سەميناردى وتكىزۋدەگى باستى ماقسات تا سول – وسى حالىقارالىق باعدارلامامەن جۇمىس جاسايتىن مەكتەپتەردىڭ تاجىريبەسىمەن تانىستىرۋ.
بۇگىنگى ەلوردالىق ۇستازدار قازاقستاندىق پەداگوگيكالىق داستۇرلەردى ساقتاي وتىرىپ, زاماناۋي ادىستەردى, يننوۆاتسيالىق ازىرلەنىمدەردى وقىتۋ پروتسەسىنە ۇتىمدى ەنگىزىپ, وزگە ارىپتەستەرگە ۇلگى بولىپ كەلەدى.
جۇيەلى دە ناتيجەلى اتقارىلعان جۇمىستاردىڭ جەمىسى – پەداگوگتاردىڭ كاسىبي بىلىكتىلىگىمەن وقۋشىلاردىڭ ءبىلىم ساپاسى ارقىلى ناقتى كورىنىس بەرۋدە. بۇگىنگى سەمينار سونىڭ ناقتى كورىنىسى بولماق. 2 كۇندىك سەميناردا سىزدەر جوعارىدا اتالعان 4 مەملەكەتتىك مەكتەپتىڭ وقۋشىلار مەن پەداگوگتارىنىڭ IB باعدارلاماسى بويىنشا ساباقتارىنا قاتىسىپ, ازىرلەگەن جوبالارىمەن تانىسىپ ءوز پىكىرلەرىڭىزبەن بولىسەدى دەگەن ويدامىن, –دەدى ق.سەنعازىەۆ ءوز سوزىندە.
حالىقارالىق دەڭگەيدەگى قازاق مەكتەبى
«1200 ورىنعا ارنالعان №81 «Astana English School» مامانداندىرىلعان گيمنازيامىز 2015 جىلى بوي̆ كوتەرىپ, 1 قىركۇيەكتە وقۋشىلارعا ەسىگىن اي̆قارا اشقان ەدى. بۇگىنگى تاڭدا الەمدىك دەڭگەيدە باسەكەگە قابىلەتتى بولا الاتىن زياتكەر ۇرپاق تاربيەلەۋدە قازاق-اعىلشىن تىلىندە ءبىلىم بەرەتىن ءبىلىم ورداسىنا اينالىپ وتىر. العاش اشىلعان جىلى گيمنازيانى 150 وقۋشىمەن اياقتاساق, قازىرگى تاڭدا وقۋشىلاردىڭ سانى 1058-گە جەتىپ وتىر» دەدى №81 حالىقارالىق «Astana English school» مامانداندىرىلعان گيمنازياسىنىڭ ديرەكتورى گۇلنار سادىقوۆا.
2021 جىلدىڭ ماۋسىم ايىندا №81 «Astana English School» گيمنازياسى حالىقارالىق باكالاۆريات باعدارلاماسى بويىنشا اۆتوريزاتسيادان ءوتىپ, MYP – نەگىزگى ورتا ءبىلىم بەرۋ باعدارلاماسى رۇقسات ەتىلگەن دۇنيەجۇزىلىك حالىقارالىق مەكتەپ مارتەبەسىن الدى, ياعني وقۋ وشاعى ەلىمىز بويىنشا تۇڭعىش رەت حالىقارالىق دەڭگەيدەگى تۇڭعىش مەملەكەتتىك مەكەمە سانالادى.
«بۇگىنگى كۇنى گيمنازيادا قىزمەت ەتىپ جاتقان كاسىبي شەبەرلىگى قالىپتاسقان, تاجىريبەسى مول, بىلىكتى پەداگوگتاردىڭ جالپى سانى – 112, ونىڭ ىشىندە 13-ءى – شەتەل مامانى. جىل سايىن اكادەميالىق دارەجەگە يە پەداگوگتار سانى ۇلعايۋدا. مەكتەپ اشىلعاننان بەرگى كەزەڭمەن سالىستىرعاندا, عىلىم كانديداتتارىنىڭ سانى 1 ادامعا, Phd دوكتورلاردىڭ سانى 2 ادامعا جانە ماگيسترلەردىڭ سانى 30 ادامعا ۇلعايدى. جالپى شەتەلدىك كادرلاردى تارتۋ جۇمىسى جالعاستىرىلۋدا. شەتەلدىك مۇعالىمدەر جەرگىلىكتى ارىپتەستەرىمەن بىرلەسە جۇمىس ىستەي وتىرىپ, ولارعا پاندەردى اعىلشىن تىلىندە وقىتۋعا قولداۋ كورسەتەدى, ساباق پەن تاجىريبەنى بىرىگىپ زەرتتەيدى.
ءبىلىمدى بالالار – ەل بولاشاعى
بولاشاقتا ەلىمىزگە ءبىلىمدى ۇرپاق كەرەك ەكەنىن ەسكەرسەك, ال سول ءبىلىم كىلتى – بارلىق ناقتى عىلىمداردىڭ نەگىزىن مەڭگەرۋدە جاتىر. مەكتەبىمىزدىڭ ءاربىر شاكىرتى ۇستازدارىنىڭ سەنىمىن اقتاپ كەلەدى. ءبىلىم ورداسىنىڭ جىل سايىنعى جەتىستىكتەرى – سونىڭ ايعاعى. گيمنازيامىزدىڭ 437 وقۋشىسى حالىقارالىق جانە رەسپۋبليكالىق وليمپيادالار مەن عىلىمي جوبا جارىستارىندا, ءتۇرلى ونەر بايقاۋلارى مەن سپورت جارىستارىندا جۇلدەگەر اتانىپ, تۇلەكتەردىڭ 100%-ى ەلىمىزدىڭ جانە شەتەلدىڭ ۇزدىك جوعارى وقۋ ورىندارىنا ءتۇستى. گيمنازيا امەريكانىڭ ەڭ تانىمال وقۋ ورنى ۆاشينگتون اكادەمياسىمەن سەرىكتەس جانە ونىڭ رەسمي وكىلى بولىپ تانىلدى. حالىقارالىق ۇي̆ىمدارمەن ەكى ارادا «Global Scholars» جوباسىنىڭ ۇي̆لەستىرۋشىسى رەتىندە, سونداي̆-اق يۋنەسكو-مەن قولاي̆لى ءبىلىم بەرۋ ورتاسى ماسەلەلەرى بوي̆ىنشا ارىپتەستىك ىنتىماقتاستىق باي̆لانىس ورناتىپ وتىر. گيمنازيانىڭ باستى ەرەكشەلىگى – جاراتىلىستانۋ باعىتىنداعى پاندەردىڭ اعىلشىن تىلىندە وقىتىلاتىندىعى. ءبىلىم ۇيامىز مامانداندىرىلعان گيمنازيا بولىپ اشىلىپ, 2021 جىلى قازاقستان بويىنشا ەڭ العاشقى مەملەكەتتىك قازاق مەكتەبى حالىقارالىق باكالاۆريات مارتەبەسىن الدى, 2022 جىلى ءساۋىر ايىندا مەكتەپ اتاۋى №81 حالىقارالىق «Astana English school» مامانداندىرىلعان گيمنازياسى بولىپ وزگەرتىلدى.
«حالىقارالىق باكالاۆرياتتىڭ نەگىزگى ميسسياسىنا ساي گيمنازيامىزدىڭ ءوز ميسسياسىن جاساپ شىعاردىق. وسى ميسسيا بويىنشا مەكتەپتىڭ بارلىق قاتىسۋشىلارى مادەنيەتارالىق تۇسىنىستىك, ۇزدىكسىز ءبىلىم الۋعا جانە جوعارى ادامگەرشىلىك قۇندىلىقتاردى دامىتۋعا باعىتتالعان زياتكەرلىك قوعامدى تاربيەلەۋگە ۇمتىلادى. بۇل سەميناردا ارىپتەستەرىمىز مەكتەپ ۇستازدارىنىڭ اشىق ساباقتارى مەن شەبەر-سىنىپتارىنا قاتىسىپ, تاجىريبە الماسىپ, پەداگوگتار وزدەرىنە تىڭ يدەيالار الادى دەگەن ويدامىن» دەدى گيمنازيا ديرەكتورى. استانا قالاسىنىڭ ۇستازدارى – ەلىمىزدەگى بارلىق ۇستازدار قاۋىمىنا مەكتەپ قانداي بولۋى كەرەك, ۇستاز قانداي بولۋى كەرەك, وقۋشى قانداي بولۋى كەرەك دەگەندە ۇلگى تۇتار, الدىڭعى قاتارلى, ۇزدىكتەر ەكەنىن ماقتانىشپەن ايتۋىمىز قاجەت, بۇگىنگى سەمينار – سونىڭ ايعاعى!
