اقپان ايىنىڭ ورتاسىندا استانا قالاسى اكىمدىگىنىڭ مۋزىكالىق جاس كورەرمەن تەاترى كورنەكتى جازۋشى-دراماتۋرگ, مەملەكەتتىك سىيلىقتىڭ يەگەرى, قازاقستاننىڭ ەڭبەك ەرى دۋلات يسابەكوۆتىڭ شىعارماسى جەلىسىمەن «گاۋھارتاس» مۋزىكالىق دراماسىنىڭ پرەمەراسىن ۇسىنادى.
دۋلات يسابەكوۆ 1967 جىلى ماسكەۋدىڭ تۇبىندە اسكەرگە جۇرگەندە راديودان بيبىگۇل تولەگەنوۆانىڭ ورىنداۋىندا حالىق ءانى «گاۋھارتاستى» ەستىپ, ەلگە دەگەن ساعىنىشتان وسى شىعارمانى جازدى. پوۆەست وسىدان تۋرا 55 جىل بۇرىن جارىق كوردى. ال 1975 جىلى كينورەجيسسەر ءشارىپ بەيسەنباەۆ كوركەم فيلم ءتۇسىردى. بۇل كينوتۋىندىدا كاۋكەن كەنجەتاەۆ, ءامينا ومىرزاقوۆا, بايتەن وماروۆ, كەنەنباي قوجابەكوۆ, دوسحان جولجاقسىنوۆ, تۇيىق تاستان بەينەسىندە ءانۋار بورانباەۆ سىندى بەلگىلى ارتىستەر كەيىپكەرلەردى سومدادى. فيلمدەگى اندەردى ءانشى ءساجيدا احمەتوۆا ورىندادى. سالتانات كەلىننىڭ بەينەسى جاننا قۋانىشەۆانىڭ جۇلدىزىن جاندىردى. قازاق كينو ونەرىنىڭ التىن قورىنا ەنگەن اتالمىش فيلم, مىنە, ەلۋ جىلعا جۋىق ۋاقىت جۇرەكتەردى تەربەپ كەلەدى.
ال پرەمەراسى وتكەلى جاتقان مۋزىكالىق درامانىڭ قويۋشى رەجيسسەرى, ساحنالىق نۇسقانىڭ اۆتورى – قازاقستاننىڭ ەڭبەك سىڭىرگەن قايراتكەرى اسحات ماەميروۆ. كەيىپكەرلەردى اكتەرلەردىڭ بىرنەشە قۇرامى سومدايدى. سونىڭ ىشىندە قايىركەن بەينەسىن بەلگىلى اكتەر, «دارىن» مەملەكەتتىك جاستار سىيلىعىنىڭ يەگەرى اسىلحان تولەپوۆ وينايدى.
