ءبىز وتكەن جولى الەم چەمپيوناتىنىڭ اشىلۋ سالتاناتى مەن سودان كەيىن ىلە-شالا وينالعان رەسەي – ساۋد ارابياسى قۇرامالارى ماتچى تۋرالى رەپورتاج بەرگەن ەدىك. سودان كەيىن بۇرناعى كۇننىڭ تۇنىنە دەيىن تاعى 11 ويىن وينالدى. بۇل كۇندەر سەنساتسيالار مەن پەنالتيلەرگە تولى كەزەڭ بولدى.
«سەنساتسيا» دەگەندە ءبىزدىڭ ءتىلىمىزدىڭ ۇشىنا ەڭ الدىمەن الەم چەمپيونى – گەرمانيا ۇلتتىق كومانداسىنىڭ كۇتپەگەن جەردەن مەكسيكادان 0:1 بولىپ ۇتىلىپ قالعانى ورالادى. بۇدان بولەك, ماماندار ارگەنتينا – يسلانديا, برازيليا – شۆەيتساريا ارالارىنداعى كەزدەسۋلەردىڭ 1:1 ەسەبىمەن تەڭ اياقتالۋى دا سونداي كۇتپەگەن ناتيجەلەر قاتارىنا جاتقىزىپ جاتىر.
ءمادريدتىڭ «رەالىندا» دا تالاي كەزدەسۋدىڭ تاعدىرىن جەكە-دارا شەشىپ بەرىپ جۇرگەن بۇل فورۆاردتىڭ پورتۋگاليا قۇراماسى ساپىنداعى الاتىن ورنى ءتىپتى بولەك-ءتىن. ول مۇنى 16 ماۋسىم كۇنى سوچيدە وينالعان پورتۋگاليا – يسپانيا ماتچىندا جاساعان حەت-تريگى ارقىلى تابلوداعى ەسەپتىڭ 3:3 بولىپ توقتاۋىن قامتاماسىز ەتىپ, تاعى ءبىر مارتە دالەلدەپ بەردى. ازىرگە چەمپيوناتتاعى بارىنشا تارتىستى دا قىزىقتى ويىن وسى بولدى. جان بەرىپ, جان الىساتىنداي بۇل كەزدەسۋگە كانىگى قارسىلاستار ساقاداي ساي دايار كەلدى. سوندىقتان ول ءبىر تۇبەكتەگى ەجەلدەن باسەكەلەس ەكى ەل قۇرامالارى اراسىنداعى ينتريگانىڭ شىن كەسكىن-كەلبەتىن كورسەتىپ بەردى. بۇعان چەمپيونات باستالار الدىندا عانا يسپانيا قۇراماسىنىڭ باس جاتتىقتىرۋشىسى حۋلەن لوپەتەگيدىڭ «رەال» (مادريد) كومانداسىنا كەتىپ قالۋى مەن ونىڭ ورنىن فەرناندو يەررونىڭ شۇعىل باسۋى بۇل شيەلەنىستىڭ ءتۇيىنىن كۇشەيتە تۇسپەسە, استە ازايتقان جوق. كەزدەسۋ ەكى ءتۇرلى ويىن جۇيەسىن تايتالاسقا تۇسىرۋگە ءتيىستى ەدى. ولاي بولاتىنى, قۇرامىندا سايدىڭ تاسىنداي سايىپقىراندارى مول يسپانيا قاشاندا ءبىرىنشى نومىرمەن ويناپ ۇيرەنسە, پورتۋگالدار, كەرىسىنشە, قارس ىلاسىنىڭ مانەرىنە قاراي قيمىلد اۋعا بەيىم-ءتىن. الايدا رونالدۋ مەن ونىڭ كومانداسى «قىزىل فۋريانىڭ» پسيحولوگيالىق جاعىنان ولقى-تولقى بولىپ تۇرعانىن تەز اڭعاردى دا, بۇرىنعى سالتتى بۇزىپ, تورەش ءىنىڭ ىسقىرىعى ەستىلگەن ساتتەن قۇيىنداي قۇيعىتىپ, شابۋىلعا شىقتى. ەۋروپا چەمپيوندارى سول پاتىمەن 4-مينۋتتا كريشتيانۋ شالىپ قۇلاتىلدى دەگەن جەلەۋمەن يسپاندار قاقپاسىنا تۋرنيردەگى ءبىرىنشى پەنالتي بەلگىل ەنىپ, ونى رونالدۋدىڭ ءوزى سوققانعا دەيىن دامىل تاپقان جوق.
تايمنىڭ ورتا تۇسىنا كەلگەندە, يسپاندار وزدەرىن بايىرعى كەزدەردەگىدەي تىم ەركىن سەزىنىپ, شابۋىل ۇستىنە شابۋىلدى ۇدەتە ءتۇستى. مۇنداي ءسات جاۋاپ گولدىڭ سوعىلۋ ءساتىن دە تىم كەشەۋىلدەتە قويمادى. ويىننىڭ 24-مينۋتىندا مۇنى ديەگو كوستا جۇزەگە اسىردى. ازەلدە پورتۋگالدار باستاعان قارسى شابۋىل جارتى جولدا ءۇزىلدى دە, يسپاندار العا قاراي انداعايلاپ ۇمتىلدى. كەنەت الىستان جىبەرىلگەن دوپتى ورتالىق شابۋىلشى قاعىپ الدى دا, قارسىلاستاردىڭ ءۇش قورعاۋشىسى جانىنان سىتىلىپ شىعىپ, قاقپاعا قاراي زۋ ەتكىزدى. گول!
بۇدان كەيىن پورتۋگالداردىڭ ابىرجىعان سىڭايلارى بايقالدى. ەندى كورشىلەرى بۇرىنعىدان دا سەنىمدى ويناۋعا كىرىستى. بۇل كەزدە ولاردىڭ, اسىرەسە, سول قاناتى ەرەكشە بەلسەندى كورىندى. سول قاپتالداعى حوردي البا العا قاراي ءجيى وزىپ, اندرەس ينەستامەن ۇيلەسىمدى قيمىل جاساسا باستادى. 26-مينۋتتا «رەالدىڭ» جارتىلاي قورعاۋشىسى الىستان دوپ جونەلتىپ, ماڭدايشانى تەڭسەلتىپ ءوتتى. ودان تومەن قۇلديلاعان دوپ ورتاداعى سىزىقتىڭ ارعى تۋرا ۇستىنەن كەرى سەرپىلدى. باقساق, بۇل ساتسىزدىك بۇدان كەيىن يسپاندار قاقپاشىسى داۆيد دە حەانىڭ باستان كەشكەنىنىڭ جانىندا تۇك بولماي قالادى ەكەن. تايم تۇگەسىلۋگە ءبىر مينۋت قالعاندا, ول رونالدۋدىڭ تۋرالاي تەپكەن دوبىنىڭ وزىنە توسقاۋىل بولا الماي, توردىڭ اۋماعىنا گۇمپ ەتە قالۋىنا جول بەرىپ قويدى. وسىلايشا پورتۋگالدار كۇتپەگەن جەردەن 2:1 ەسەبىمەن العا شىعىپ كەتتى.
كەزدەسۋدىڭ كەلەسى قىزۋ شاقتارى ەكىنشى تايمنىڭ ۇلەسىنە ءتيدى. يسپاندار 55-مينۋتتا كەرەمەت كومبيناتسيا ۇيىمداستىرا ءبىلدى. ەكى رەت بەرىلگەن ءدال پاستان كەيىن دوپ قارسىلاستاردىڭ قاقپ ا الاڭىنا جەتكىزىلدى. سول جەردە شالتتىق كورسەتكەن كوستا دوپتى ەكى باعاننىڭ ورتاسىنا قاراي باعىتتاي سالدى. ال بۇدان كەيىن اراعا 3 مينۋت سالىپ, ناچو تۇسىرگەن ءۇشىنشى دوپ بۇدان دا كەرەمەت بولىپ شىقتى. بۇل كەزدەسۋدە يسپاندار ءبىرىنشى رەت العا شىقتى – 3:2!
مىنە, وسىدان كەيىن «قىزىل فۋريا» ەندى قايتىپ قارسىلاستارىنا بوي بەرە قويمايتىنداي بولىپ كورىنگەن. الايدا مۋنديال باستالار الدىندا ونداعى ەڭ مىقتى گولكيپەرلەردىڭ ءبىرى بولادى دەگەن ءۇمىت ارتىلعان «ليۆەرپۋلدىڭ» داربازاشىسى دە حەا ماتچ بىتۋگە 2 مينۋت قالعاندا مۇنىڭ دا كۇلىن كوككە ۇشىردى. ويىننىڭ 87-مينۋتىندا قارسىلاستاردىڭ الاڭى الدىندا ايىپ دوبى بەلگىلەنۋىنە قول جەتكىزگەن رونالدۋ ونى 20 مەتر جەردەن قاقپاعا ءدال ءتۇسىرىپ, كەزدەسۋدىڭ اقىرعى ناتيجەسىن بەلگىلەپ بەردى. دوپتى يسپاندار «قورعانىنىڭ» ۇستىنەن اينالدىرا ۇشىرعان كريشتيانۋ ونى «توعىزدىققا» توپ ەتكىزىپ ءتۇسىردى.
البەتتە, بۇل ماتچتىڭ ۇزدىك ويىنشىسى اتاعى دا وسى رونالدۋگە بەرىلدى. ءسويتىپ, ەڭىستەن سالسا, توسكە وزاتىن شابۋىلشى ءوز كومانداسىنىڭ قورجىنىنا چەمپيوناتتىڭ العاشقى ۇپايىن سالدى.
ۇلكەن فۋتبولدا كەيدە ءبىر ويىنشىنىڭ ءبىر كوماندا جۇگىن كوتەرىپ كەتىپ, ماتچتىڭ قورىتىندى ەسەبىنە تىكەلەي اسەر ەتەتىن كەزدەرى كەزدەسەدى. بىراق ونداي فۋتبولشىلار قاي زاماندا دا تىم كوپ بولماعان. سول سيرەكتىڭ ءبىرى پورتۋگاليا قۇراماسىنىڭ ويىنشىسى كريشتيانۋ رونالدۋ ەدى
تۋردىڭ ەسەپ-قيسابى
* ماۋسىمنىڭ 18-ءى كۇنى كەشكە دەيىن چەمپيوناتتا 12 ماتچ وينالدى.
* بۇل ويىنداردا ەڭ كوپ كەزدەسكەن ەسەپ – 1:0. ول 6 رەت تىركەلدى.
* 12 ماتچتا 26 گول سوعىلدى. بۇل ءار ماتچتا ورتا ەسەپپەن 2,16 دوپتىڭ قاقپاعا تۇسكەنىن كورسەتەدى.
* وسى ارالىقتا 35 فۋتبولشى ەسكەرتۋ الدى.
* 12 ماتچتى 579099 ادام تاماشالادى. بۇل – ءار كەزدەسۋدە ورتا ەسەپپەن 48282 كورەرمەن بولدى دەگەن ءسوز.
* جانكۇيەرلەر «لۋجنيكيدە» وتكەن رەسەي – ساۋد ارابياسى, گەرمانيا – مەكسيكا اراسىنداعى ويىندارعا ەڭ كوپ جينالدى. ولارعا 78011 ادام كەلدى.
* ەڭ از كورەرمەن كالينينگرادتا حورۆاتيا – نيگەريا اراسىنداعى كەزدەسۋدە تىركەلدى. بۇل ويىنعا 31136 بيلەت ساتىلدى.
* وسى كەزگە دەيىن 7 پەنالتي بەلگىلەنىپ, ولاردىڭ 5-ءى قاقپاعا ءتۇستى.
* تۋردا 1 حەت-تريك, 2 دۋبل جاسالدى, 3 اۆتوگول سوعىلدى.
* مەرگەندەر كوشىن 3 دوپپەن پورتۋگاليا قۇراماسىنىڭ شابۋىلشىسى كريشتيانۋ رونالدۋ باستادى.
تۋرنير تابلوسى
14 ماۋسىم ماسكەۋ. «لۋجنيكي». رەسەي – ساۋد ارابياسى 5:0
گولدار: يۋري گازينسكي (12), دميتري چەرىشەۆ (43, 90+1), ارتەم دزيۋبا (71), الەكساندر گولوۆين (90+4) ەسكەرتۋلەر: الەكساندر گولوۆين (88) – تايسير ءال-دجاسسيم (90+3)
15 ماۋسىم ەكاتەرينبۋرگ. ەگيپەت – ۋرۋگۆاي 0:1
گول: حوسە ماريا حيمەنەس (90) ەسكەرتۋلەر: ترەزەگە (ە, 90+6), احمەد حەگازي (ە, 90+6)
سانكت-پەتەربۋرگ. ماروككو – يران 0:1
گول: ازيز بۋحاددۋز (90+5, اۆتوگول) ەسكەرتۋلەر: كاريم ءال-احمادي (34) – ماسۋد شودجاي (10), اليرەزا جاحانباحش (47), كاريم انساريفارد (90+3)
16 ماۋسىم سوچي. پورتۋگاليا – يسپانيا 3:3
گولدار: كريشتيانۋ رونالدۋ (4, پەنالتي, 44, 88) – ديەگو كوستا (24, 55), ناچو (58) ەسكەرتۋلەر: برۋنۋ فەرناندەش (28) – سەرحيو بۋسكەتس (17)
قازان. فرانتسيا – اۆستراليا 2:1
گولدار: انتۋان گريزمانن (58, پەنالتي), ءازيز بەحيناچ (81, اۆتوگول) – ميلە ەديناك (62, پەنالتي) ەسكەرتۋلەر: كورەنتەن توليسسو (76) – مەتتيۋ لەكي (13), دجوشۋا ريسدون (57), ءازيز بەحيچ (87)
ماسكەۋ. «سپارتاك». ارگەنتينا – يسلانديا 1:1
گولدار: سەرحيو اگۋەرو (19) – الفرەد فيننبوگاسون (23) سوعىلماعان پەنالتي: ليونەل مەسسي (ا, 64, قاقپاشى)
سارانسك. پەرۋ – دانيا 0:1
گول: يۋسسۋف پوۋلسەن (59) سوعىلماعان پەنالتي: كريستيان كۋەۆا (45+1, قاقپادان جوعارى) ەسكەرتۋلەر: رەناتو تاپيا (38) – توماس ديلەيني (86), يۋسسۋف پوۋلسەن (90+3)
17 ماۋسىم كالينينگراد. حورۆاتيا – نيگەريا 2:0
گولدار: وگەنەكارو ەتەبو (32, اۆتوگول), لۋكا مودريچ (71, پەنالتي) ەسكەرتۋلەر: يۆان راكيتيچ (30), مارتسەلو بروزوۆيچ (89) – ۋيليام ەكونگ (70)
سامارا. كوستا-ريكا – سەربيا 0:1
گول: الەكساندار كولاروۆ (56) ەسكەرتۋلەر: فرانسيسكو كالۆو (22), داۆيد گۋسمان (56) – برانيسلاۆ يۆانوۆيچ (59), الەكساندار پريوۆيچ (90+8)
ماسكەۋ. «لۋجنيكي». گەرمانيا – مەكسيكا 0:1
گول: يرۆينگ لوسانو (35) ەسكەرتۋلەر: توماس ميۋللەر (83), ماتس حۋممەلس (84) – ەكتور مورەنو (40), ەكتور ەررەرا (90)
دونداعى روستوۆ. برازيليا – شۆەيتساريا 1:1
گولدار: فيليپپە كوۋتينو (20) – ستيۆەن تسۋبەر (50) ەسكەرتۋلەر: كازەميرو (47) – شتەفان ليحتشتاينەر (31), فابيان شەر (65), ۆالون بەحرامي (68)
نيجني نوۆگورود. شۆەتسيا – كورەيا 1:0
گول: اندرەاس گرانكۆيست (65, پەنالتي) ەسكەرتۋلەر: ۆيكتور كلاسسون (61) – كيم سون ۋك (12), حۆان حي چحول (55)
سەرىك ءپىرنازار
