كيىز ءۇي, سامۇرىقتىڭ ۇياسى, كارلسون, تىكۇشاق, حانزادا كۇيمەسى… جوق-جوق, ءسىز ەرتەگىلەر الەمىنە ءتۇسىپ كەتكەن جوقسىز. بۇقارا بۇلاردىڭ ءبارىن ەلورداداعى وقۋشىلار سارايىندا وتكەن بەسىك اربالار شەرۋى بارىسىندا تاماشالادى.
پرەزيدەنتىمىزدىڭ جارلىعىمەن 2013 جىلدان بەرى ەلىمىزدە وتباسى كۇنى تويلانىپ كەلەدى. قىركۇيەكتىڭ 8 جۇلدىزىنا تۇسپا-تۇس كەلەتىن بۇل مەرەكە بيىل دا ەسكەرۋسىز قالمادى. سونىڭ اياسىندا استانا قالالىق ءبىلىم باسقارماسى تىكەلەي مۇرىندىق بولىپ, جاس وتباسىلار اراسىندا بەسىك اربالار شەرۋىن ۇيىمداستىردى. وعان شاھارداعى 40 بالاباقشانىڭ اتىنان 51 وتباسى قاتىستى.
– وتباسى كۇنى – ەڭ جىلى ءارى ادەمى اتموسفەرانى قالىپتاستىراتىن ەلەۋلى مەيرام. سوندىقتان ونى جۇرتشىلىققا ناسيحاتتاپ, جانۇيا مۇشەلەرىن ودان ءارى جاقىنداستىراتىن وسىنداي شارالاردى مەيلىنشە كوپتەپ وتكىزۋدى داستۇرگە اينالدىرۋ كەرەك. بۇگىندە مەملەكەتىمىز تاراپىنان دا وتباسىلىق قۇندىلىقتاردى ارتتىرۋعا, باسەكەگە ساي ۇرپاق تاربيەلەپ وسىرۋگە باعىتتالعان ءىس-ارەكەتتەر جەتەرلىك. وعان سوڭعى ۋاقىتتارى سالىنىپ جاتقان زاماناۋي ۇلگىدەگى بالاباقشالار مەن مەكتەپتەر, جاڭا ويىن جانە سپورت الاڭقايلارى, سونىمەن قوسا ءبىلىم بەرۋ, دەنساۋلىق ساقتاۋ, ساۋىقتىرۋ جۇيەسىندەگى ءتيىمدى رەفورمالار دالەل, – دەگەن اتالمىش باسقارما باسشىسى ورىنباسارىنىڭ مىندەتىن اتقارۋشى قارلىعاش ساركەنوۆا جيىنعا كەلگەندەردى شىن جۇرەكتەن قۇتتىقتادى.
شەرۋگە قاتىسۋشىلاردىڭ جۇمىستارىن ءبىلىم باسقارماسىنىڭ مەكتەپكە دەيىنگى تاربيە مەن وقىتۋ ءبولىمى باسشىسى انار سماتوۆا, وسى ءبولىمنىڭ ادىسكەرى سۆەتلانا قوجاحمەتوۆا, «ميراس» بالاباقشاسىنىڭ مەڭگەرۋشىسى باقىت كارىموۆا باعالاپ, تورەلىك جاسادى. ءادىل قازىلار جۇمىسىنىڭ قانشالىقتى اۋىر بولعانىن بىلەمىز, ويتكەنى شارادا نەبىر عاجاپ ۇلگىدە بەزەندىرىلگەن بەسىك اربالار بولدى. ماسەلەن, №18 «اياجان» بالاباقشاسىنىڭ دايارلىق توبى تاربيەلەنۋشىسى داستان بەكپانوۆتىڭ وتباسى كەمە بەينەسىندەگى بەسىك-اربانى ازىرلەپتى. بۇيىرىندە «كاسپي» دەگەن جازۋى بار اربانىڭ ىشىندە تەڭىزشىنىڭ كيىمىندە ءبۇلدىرشىننىڭ ءوزى وتىر. سونداي جاراسىمدى! ال №1 «بايتەرەك» بالاباقشاسىنىڭ بوبەگى ەرسۇلتان ءابدىمۇرات اناسىمەن بىرگە «جەدەل جاردەم» كولىگىن جۇرگىزدى. ياعني, بەسىك اربانى كارتون قاعازدىڭ كومەگىمەن مەديتسينالىق ماشينا ءتارىزدى ەتىپ وزگەرتىپتى. ايتپاقشى, ءبىز وليمپيادا چەمپيونى, جەرلەس سپورتشىمىز دانيار ەلەۋسىنوۆتىڭ بالا كەزىنە دە كۋا بولدىق. №8 «دۋمان» بالاباقشاسىنا باراتىن ءۇش جاسار ميراس قالمۇرات مەرەكەگە بوكسشى وبرازىندا كەلگەن. قولىنداعى بىلعارى قولعابى مەن باسىنداعى شلەمى تۇپ-تۋرا وزىنە قۇيىپ قويعانداي. رينگ ءتارىزدى ويلاستىرىلعان بەسىك اربانىڭ ىشىندەگى بولاشاق چەمپيونمەن ەستەلىككە سۋرەتكە تۇسۋشىلەر دە كوپ بولدى.
شارا سوڭىندا بارلىق بالالارعا جۇمساق ويىنشىق سىيعا تارتىلىپ, اتا-انالارعا ءبىلىم باسقارماسىنىڭ العىس حاتى تابىستالدى.
بوتاگوز ماراتقىزى
