چەمپيونات ءوزىنىڭ شەشۋشى كەزەڭىنە قادام باستى. دوپ دوداسى مارەگە تۋرا تارتاتىن ءدۇربى جولعا ءتۇستى. ءبىزدىڭ ەسەپتى كەزەڭىمىزدە ماۋسىمنىڭ 27-ءسى كۇنى كەشتە باستالىپ, 29-ىنا قاراعان ءتۇنى اياقتالعان 3-تۋر ويىندارىمەن بىرگە ىرىكتەۋ كەزەڭى دە سوڭىنا جەتتى. ەسەپتى كەزەڭدە 8 ويىن وتكىزىلىپ, ولاردا 17 گول سوعىلدى. بۇلاردىڭ 3-ءى اۆتوگول بولدى. وسى ارالىقتا 2 پەنالتي بەلگىلەنىپ, بىرەۋى عانا قاقپاعا دارىدى.
مۇنداعى ەڭ ۇلكەن سەنساتسيا ءىس ۇستىندەگى الەم چەمپيونى – گەرمانيا قۇراماسىنىڭ كورەيادان جەڭىلۋى عانا ەمەس, ونىڭ 1932 جىلدان بەرى ءبىرىنشى رەت توپتىق تۋرنيردەن كەلەسى كەزەڭگە شىعا الماي قالعانى بولدى. جالپى, سونىڭ الدىنداعى چەمپيونات التىن جۇلدەگەرىنىڭ كەلەسى مۋنديالدا پلەي-وفف كەزەڭىنە وتە الماۋى سوڭعى ءۇش جاھاندىق جارىستىڭ داستۇرىنە اينالدى.
بۇگىن چەمپيوناتتا – ءۇزىلىس. ەرتەڭ 1/8 فينالدىق ويىندار باستالادى. بۇل كۇنى فرانتسيا – ارگەنتينا, ۋرۋگۆاي – پورتۋگاليا ءوزارا كۇش سىناسادى. شىلدەنىڭ 1-ىندە يسپانيا – رەسەي, حورۆاتيا – دانيا, 2-سىندە برازيليا – مەكسيكا, بەلگيا – جاپونيا, 3-ىندە شۆەتسيا – شۆەيتساريا, كولۋمبيا – انگليا كىمنىڭ شيرەك فينالعا شىعاتىنىن انىقتايدى.
گەرمانيا الەم چەمپيوناتىنىڭ 3-تۋرىندا كورەيادان 0:2 بولىپ ۇتىلۋ ارقىلى ونىڭ پلەي-وفف كەزەڭىنە قادام باسۋ قۇقىعىنان ايىرىلىپ قالدى. بۇل ولاردىڭ الەم چەمپيوندىعى وكىلەتتىگىن قوسا تاپسىرۋىنا سەبەپ بولدى.
«نەمىس ماشيناسى» چەمپيوناتتىڭ 1- تۋرىندا مەكسيكادان 0:1 ەسەبىمەن ۇتىلىپ قالعاندا, كوبىمىز ونىڭ ءجۇرىس-تۇرىسىندا ءبىر اقاۋ بار ەكەنىن بايقاپ قالساق تا, جۇيرىكتىڭ قىزا كەلە وزاتىنىن العا تارتىپ, بىرتە-بىرتە قارقىنعا قارقىن قوساتىنىنا ءۇمىت ارتتىق. ال ەكىنشى كەزدەسۋدىڭ قوسىمشا ۋاقىتىندا شۆەدتەردەن جەڭىستى تارتىپ اكەتكەنىندە, ونى فانتاستيكالىق جەڭىسكە سانادىق. بىراق نەمىستەردىڭ بۇل ۇتىستى نەگىزگى ۋاقىتتا قامتاماسىز ەتە الماۋىنىڭ ءوزى دابىلدى جايت ەدى. سول دابىل بەكەر بولماي شىقتى.
وسىندايدا ەسكە تۇسەدى, مۇنىڭ الدىنداعى مۋنديالدا بۋندەستيم قولىنان كەلىپ تۇرعاندا قونىشىنان باسقان بولاتىن. ول وڭتۇستىك امەريكا اۋماعىندا الەم چەمپيونى اتاعىن جەڭىپ العان ءبىرىنشى ەۋروپالىق تەرمە جاماعات اتاندى. سونىڭ سىرالعىسىندا تۋرنير يەلەرى – برازيليالىقتاردى ءوز ۇيلەرىنىڭ تورىندە تالقانداپ تاستادى. الايدا, يواحيم لەۆتىڭ شاكىرتتەرىن رەسەي جەرىندە وزگەشە سىناق پەن سوققى كۇتىپ تۇر ەكەن. نەمىستەر ونشالىقتى كۇشتى ەمەس توپتىڭ وزىنەن شىعا الماعانى بىلاي تۇرسىن, وندا سوڭعى 4-ورىندا قالىپ قويدى.
ماۋسىمنىڭ 27-ءسى كۇنى كەشكە كورەيا قۇراماسىمەن كۇش سىناسقان الماندار ويىننىڭ نەگىزگى ۋاقىتىندا قاقپا قۇلپىن بۇزاتىن قانشاما مۇمكىندىكتى بوسقا جىبەرىپ العاننان كەيىن, اربيتر بەلگىلەگەن 7 مينۋتتىق قوسىمشا ۋاقىت ىشىندە قارسىلاستارىنان 2 گول وتكىزىپ الىپ, تازا تاقىرعا وتىردى. ءسويتىپ, قانشاما جۇلدىزداردان قۇرالعان بۋندەستيم چەمپيوناتتىڭ اقىرىنا دەيىن جەتە الماي, جارتى جولدا تابان تايدىردى. شاماسى, بۇعان قۇراما ساپىندا قانشا تالانتتى ويىنشىلار بولعانىمەن, ولاردىڭ اراسىنان ناعىز ليدەردىڭ تابىلماۋى وسىعان اپارىپ سوقتىرسا كەرەك. نەمىستەردىڭ قاپتاعان مۇمكىندىكتەردى وسىنشالىق بەي-بەرەكەت جۇمساعان ءساتتەرىن دە ءبىرىنشى رەت كورىپ وتىرعان سياقتىمىز. بۇل جولى الدىڭعى شەپتە ميروسلاۆ كلوزە ءتارىزدى ويىن كورىگىن قىزدىراتىن فورۆارد بولعان جوق. ونىڭ قاباتىندا شاۋىپ جۇرەتىن لۋكاس پودولسكي دە تابىلمادى. تەك ارا-تۇرا تيمو ۆەرنەردىڭ ەرەكشە بەلسەندىلىگىن بايقالدى. ول نەگىزىنەن الىستان دوپ ۇرۋدى قولاي كوردى. ال قاقپا الدىنداعى قاربالاس ساتتەردە تۇيىقتان جول تاۋىپ كەتەتىن ويىنشىلار بولا قويمادى.
مۇنىڭ ۇستىنە, نەمىستەر بارلىق ۋاقىتتا دەرلىك باياۋ ويىن جۇرگىزدى. سوسىن ولاردىڭ ويىندارىن وقىپ قويۋ دا بۇل جولى كوپ قيىندىق تۋعىزا قويمادى. سونداي سۇرەڭسىز شابۋىلداردىڭ باسىندا نيكلاس زيۋلە العا قاراي دوپ اسىردى. ونى قاعىپ العان يوزۋا كيمميح كىدىرتپەي لەون گورەتسكاعا جونەلتتى. ال حاۆبەكتىڭ باسپەن قاقپا بۇرىشىنا قاراي باعىتتاعان دوبىن كورەي گولكيپەرى چو حيون ۋ عالامات سەكىرىسپەن قايتارىپ ۇلگەردى. بۇدان كەيىن ۆەرنەر قاقپا الاڭىندا جۇرگەن مەسۋت وزيلگە كەرەمەت پاس شىعاردى. بىراق ونىڭ «توعىزدىقتى» كوزدەپ ۇرعان دوبى قيسىق ۇشتى. مۇنىڭ ارتىنان كورەي شابۋىلشىسى سون حىن مين تىم العا شىعىپ كەتكەن قاقپاشى مانۋەل نويەردى قاپى قالدىرماق بولىپ, الىستان دوپ جونەلتىپ ەدى, ونىسى قاقپادان دا ارىعا كەتتى.
ماتچتىڭ اياعىنا قاراي نەمىستەر قارقىندارىن باسەڭدەتىپ الدى. ال كورەيلەر قايتقان جوق. وسى تۇستا شۆەدتەرمەن ويىندا قاھارمان اتانعان توني كروسس دوپتى سون حىن مينگە بەرىپ قويدى. گول! ءسويتىپ, ەسەپ اشىلدى. نەمىستەردىڭ ەكىنشى گولدى جىبەرىپ الۋىنا نويەردىڭ قارسى جاققا شابۋىلعا شىعىپ كەتۋى سەبەپ بولدى. سول زاماتتا قارسى شابۋىلعا كوتەرىلگەن كورەيلەر اشىق قاقپاعا دوپتى سۇڭگىتە سالدى.
تاعى ءبىر سەنساتسيا وسىلاي دۇنيەگە كەلدى.
قىسقا-نۇسقا
* ماۋسىمنىڭ 29-ىنا دەيىن چەمپيوناتتا 48 ماتچ وينالدى.
* بۇل ويىنداردا ەڭ كوپ كەزدەسكەن ەسەپ – 1:0. ول 13 رەت قايتالاندى.
* 48 ماتچتا 122 گول سوعىلدى. ءار ويىنعا ورتا ەسەپپەن – 2,54 دوپتان.
* وسى ارالىقتا 3 فۋتبولشى الاڭنان قۋىلىپ, 159 رەت ەسكەرتۋ بەرىلدى.
* يۋسسۋف پولۋسەن (دانيا), الەكساندار ميتروۆيچ (سەربيا), شتەفان ليحتشاتاينەر (شۆەيتساريا), فەرجاني ساسسي (تۋنيس) ەكى ەسكەرتۋدەن الدى.
* 48 ماتچتى 2 112 089 ادام كوردى. بۇل – ءار كەزدەسۋدە ورتا ەسەپپەن 44 018 كورەرمەن بولدى دەگەن ءسوز.
* وسى كەزگە دەيىن قاقپاعا 24 پەنالتي بەلگىلەنىپ, ولاردىڭ 18-ءسى گولعا اينالدى. ءۇش دوپتى قاقپاشى قاعىپ الدى, ءبىر دوپ ماڭدايشادان قايتتى, ەكى فۋتبولشى قاقپادان بيىك جىبەردى.
* چەمپيوناتتا 2 حەت-تريك, 8 دۋبل جاسالدى, 9 اۆتوگول سوعىلدى.
تۋرنير تابلوسى
3-تۋر
قازان.
كورەيا – گەرمانيا 2:0
گولدار: كيم يون گۆون (94), سون حىن مين (96).
ەكاتەرينبۋرگ.
مەكسيكا – شۆەتسيا 3:0
گولدار: ليۋدۆيگ اۋگۋستينسسون (50), اندرەاس گرانكۆيست (62, پەنالتي), ەدسون الۆارەس (74, اۆتوگول)
28 ماۋسىم
ماسكەۋ, «سپارتاك».
سەربيا – برازيليا 0:2
گولدار: پاۋلينو (36), تياگو سيلۆا (68)
نيجني نوۆگورود. شۆەيتساريا – كوستا-ريكا 2:2
گولدار: بلەريم دجەمايل (31), يوسيپ درميچ (88) – كەندالل ۋوستون (56), يانن زوممەر (90+3, اۆتوگول)
سالىنباعان پەنالتي: برايان رۋيس (90+3, ماڭدايشا)
ۆولگوگراد.
جاپونيا – پولشا 0:1
گول: يان بەدنارەك (59)
سامارا.
سەنەگال – كولۋمبيا 0:1
گول: ەرري مينا (74)
29 ماۋسىم
كالينينگراد.
انگليا – بەلگيا 0:1
گول: ادنان يانۋزاي (51)
سارانسك. پاناما – تۋنيس 1:2
گولدار: ياسسين مەريا (33, اۆتوگول) – فاحرەددين بەن يۋسسەف (51), ۆاحبي حازري (66)
مەرگەندەر كوشى
گارري كەين
(انگليا)
كريشتيانۋ رونالدۋ
(پورتۋگاليا)
رومەلۋ لۋكاكۋ
(بەلگيا)
دەنيس چەرىشەۆ
(رەسەي)
ديەگو كوستا
(يسپانيا)
ميلە ەديناك
(اۆستراليا)
ارتيوم دزيۋبا (رەسەي)
لۋكا مودريچ (حورۆاتيا)
فيليپپە كوۋتينو (برازيليا)
احمەد مۋسا (نيگەريا)
ەدەن ازار (بەلگيا)
دجون ستوۋنس (انگليا)
لۋيس سۋارەس (ۋرۋگۆاي)
موحاممەد سالاح (ەگيپەت)
سون حىن مين (كورەيا)
اندرەاس گرانكۆيست (شۆەتسيا)
ەرري مينا (سەنەگال)
ۆاحبي حازري (تۋنيس)
بۇدان بولەك, 68 ويىنشى ءبىر-ءبىر گولدان سوقتى.
