استانا قالاسىنىڭ 20 جىلدىعىن مەرەكەلەۋ قارساڭىندا ءدىن ىستەرى كوميتەتىنىڭ توراعاسى ەركىن وڭعارباەۆتىڭ توراعالىعىمەن ءدىني بىرلەستىكتەر وكىلدەرى «استانا – بەيبىتشىلىك پەن كەلىسىمنىڭ رۋحاني ورتالىعى» تاقىرىبىندا كەزدەسۋ ءوتكىزدى. ءىس-شاراعا ەلىمىزدەگى ءدىني بىرلەستىكتەردىڭ جەتەكشىلەرى, ۇلتتىق مۇراعات پەن مادەنيەتتەر مەن دىندەردىڭ حالىقارالىق ورتالىعىنىڭ وكىلدەرى قاتىستى.
«بيىل استانانىڭ ەلوردا مارتەبەسىن العانىنا 20 جىل تولىپ وتىر. بۇل مەرەكە الەۋمەتتىك-ساياسي ماڭىزعا يە جانە شىن مانىندە قازاقستان حالقى ءۇشىن جالپىحالىقتىق بولىپ تابىلادى. استانا – مەملەكەتىمىزدىڭ ۇلتتىق زامانۋي برەندىنە اينالدى» دەي كەلە كوميتەت توراعاسى ەلوردانىڭ جەتىستىكتەرىن باياندادى.
ال «نۇر استانا» ورتالىق مەشىتىنىڭ باس يمامى اسقار مۇقانوۆ ءوز سوزىندە «قازاقستانداعى بەيبىتشىلىك پەن كەلىسىمدى قامتاماسىز ەتۋ تاجىريبەسى, سونداي-اق ءبىزدىڭ ەلىمىزدىڭ جانە ونىڭ پرەزيدەنتىنىڭ حالىقارالىق بەدەلى استانادا مادەنيەتتەر مەن الەمدىك دىندەر ديالوگىن ۇيىمداستىرۋعا مۇمكىندىك بەردى. استانا – بەيبىتشىلىك پەن كەلىسىمنىڭ توعىسقان جەرى جانە بەيبىت كەلىسسوزدەر مەن الەمدىك دىندەر ديالوگى الاڭى» ەكەنىن ايتتى.
ءدىني بىرلەستىك وكىلدەرى دە ەلوردا تۋرالى جىلى لەبىز ءبىلدىرۋدى ۇمىتپادى. استانا كيەلى وكرۋگىنىڭ وكىلى دميتري بايدەك قازاقستان حالقىن قۇتتىقتاي وتىرىپ, بيىل كۇزدە الەمدىك جانە ءداستۇرلى دىندەر جەتەكشىلەرى استانانىڭ رۋحاني سامميتىندە التىنشى رەت كەزدەسەتىنىن مالىمدەدى. كەزدەسۋ قورىتىندىسى بويىنشا ءدىني بىرلەستىك وكىلدەرى قازاقستان حالقىن استانا كۇنىمەن قۇتتىقتاپ, ىستىق ىقىلاستارىن ءبىلدىردى.
«ءبىزدىڭ ءبارىمىزدى ورتاق ءۇيىمىز – قازاقستانعا دەگەن ورتاق سۇيىسپەنشىلىك, مەملەكەتىمىزدىڭ, جانە ونىڭ ازاماتتارىنىڭ بۇگىنى مەن كەمەل كەلەشەگىنە دەگەن سەنىم بىرىكتىرەدى. استانا قالاسىنىڭ 20 جىلدىعىن مەرەكەلەۋ قارساڭىندا, ءبىز – قازاقستان رەسپۋبليكاسىنىڭ ءدىني بىرلەستىكتەرىنىڭ وكىلدەرى, كوپۇلتتى جانە كوپكونفەسسيالى مەملەكەتىمىزدىڭ حالقىنا ەل-جۇرتىمىز امان, دەنىمىز ساۋ, باقىتىمىز باياندى بولسىن دەگەن ىزگى تىلەكتەرىمىزدى ىقىلاسپەن جولدايمىز!» دەلىنگەن قۇتتىقتاۋدا.
