استانا قالاسىنداعى داعدارىس ورتالىعىندا جاڭا جىلدىق شىرشا كەشى ءوتتى.
استانا قالاسى اكىمدىگىنىڭ «زورلىق-زومبىلىق نەمەسە زورلىق-زومبىلىق قاۋپى سالدارىنان قيىن جاعدايعا تاپ بولعان ادامدارعا ارنالعان داعدارىس ورتالىعى-باسپاناسى» ورتالىعىنىڭ قۇرىلعانىنا ءۇش جىل بولدى. وسى ۋاقىت ارالىعىندا مەكەمە تۇرمىستىق قيىندىققا تاپ بولعان تالاي ايەلگە الەۋمەتتىك, پسيحولوگيالىق جانە مەديتسينالىق كومەك كورسەتىپ, بارىنشا قولداپ كەلەدى. وسى جولى ورتالىق ۇجىمى وزدەرىن پانالاعان جانداردىڭ بالالارىنا ارناپ دۋماندى كەش وتكىزىپ, كوڭىلدەرىن ءبىر كوتەرىپ تاستادى.
اياز اتا مەن اقشاقار جانە «مۇز جۇرەك» ءمۋلتفيلمىنىڭ باستى كەيىپكەرلەرى اننا مەن ەلزا كەلىپ قاتىسقان شارا ورتالىقتاعى 45 بالاعا مەرەكەلىك كوڭىل-كۇي سىيلادى. باس-اياعى ءبىر جارىم ساعاتقا سوزىلعان شىرشا مەرەكەسىندە ءارتۇرلى سىيلىقتار تاپسىرىلىپ, تاتتىگە تولى داستارقان جايىلدى. سونداي-اق, ءتۇرلى ويىندار ويناتىلىپ, سابىن كوپىرشىكتەرى شوۋى كورسەتىلدى.
