دامەجان سادۋاقاسوۆا, ەڭبەك, الەۋمەتتىك قورعاۋ جانە كوشى-قون كوميتەتى استانا قالاسى بويىنشا دەپارتامەنتىنىڭ باسشىسى: بازالىق زەينەتاقى تولەمدى ەكى ەسەلەندىرەدى
جيىرما جىل بۇرىن بىرىككەن ۇلتتار ۇيىمى باس اسسامبلەياسىنىڭ شەشىمىمەن 1 قازان – قارتتار كۇنى بولىپ بەلگىلەنگەنى ەسىمىزدە. ءبىزدىڭ مەملەكەتىمىزدە قوعامنىڭ بارلىق مۇشەلەرىن قۇرمەتتەپ, قارت كىسىلەردىڭ ەڭبەگىنىڭ ماڭىزدىلىعى ەسكەرىلىپ, بۇل مەرەكە كوپشىلىكتىڭ قولداۋىمەن ەرەكشە مارتەبەگە يە بولعان. مەرەكە قارساڭىندا گازەت ءتىلشىسى ەڭبەك, الەۋمەتتىك قورعاۋ جانە كوشى-قون كوميتەتى استانا قالاسى بويىنشا دەپارتامەنتىنىڭ باسشىسى دامەجان سادۋاقاسوۆامەن تىلدەسىپ قايتتى.
الەۋمەتتى مەملەكەت قولدايدى
– دامەجان تولەۋبايقىزى, الدىمەن استانادا تۇراتىن قارتتار مەن مۇمكىندىگى شەكتەۋلى جاندارعا كورسەتىلەتىن قامقورلىق پەن جاردەماقى جونىندە اڭگىمەلەپ بەرسەڭىز.
– قازاقستان رەسپۋبليكاسى دا باسقا ەلدەر سياقتى ءوز ازاماتتارىنىڭ زەينەتاقىسى مەن الەۋمەتتىك قامسىزداندىرىلۋىن مەملەكەتتىڭ جاۋاپكەرشىلىگىنە العان. بۇگىنگى كۇنى باس قالادا 72036 ادام جاسىنا بايلانىستى زەينەتاقى تولەمدەرىن الادى. مۇگەدەكتىككە بايلانىستى – 16852 ازامات, اسىراۋشىسىنان ايرىلۋىنا بايلانىستى – 4763 ازامات جانە جاسىنا بايلانىستى 223 ادام مەملەكەتتىك الەۋمەتتىك جاردەماقىمەن قامتىلعان. سونىمەن بىرگە, 1998 جىلدان باستاپ بىزدە ارنايى مەملەكەتتىك جاردەماقىلار ەنگىزىلدى, ونىڭ مولشەرى ايلىق ەسەپتىك كورسەتكىش شاماسىنا تاۋەلدى. اعىمداعى جىلدىڭ قىركۇيەگىندەگى ستاتيستيكاعا جۇگىنسەك, اتالعان كومەكتى ءمۇگەدەكتىگى بويىنشا 19604 ادام, ۇلى وتان سوعىسىنا قاتىسۋشىلار رەتىندە 117 ادام, «التىن القا», «كۇمىس القامەن» ماراپاتتالعان 11200 كوپبالالى انا, ءتورت نەمەسە ودان دا كوپ بالاسى بار وتباسى جانە تىلداعى ەڭبەگى ءۇشىن 3759 ادام يەلەنەدى.
ايتا كەتەتىن ماسەلە, زەينەتاقى جانە مەملەكەتتىك جاردەماقىلاردىڭ مولشەرى جىل سايىن ارتىپ كەلەدى. سوڭعى 17 جىلدا ەڭ تومەڭگى زەينەتاقى مولشەرى 9 ەسەگە جوعارىلاپ, 3000 تەڭگەدەن 25824 تەڭگەگە دەيىن ءوستى, ال ورتاشا العانداعى زەينەتاقى مولشەرى بازالىق زەينەتاقىسىز ەسەپتەگەندە 10 ەسە ءوسىپ, 4179 تەڭگەدەن 42791 تەڭگەنى قۇرادى.
– ازاماتتار زەينەتكەرلىك جاسقا جەتكەن كەزدە, مەملەكەت قانداي زەينەتاقى كەپىلدەرىمەن قامتاماسىز ەتەدى؟
– بۇگىنگى كۇنى زەينەتاقى جۇيەسى مىناداي قۇرامداس بولىكتەردەن تۇرادى: ءبىرىنشى, بازالىق زەينەتاقى تولەمى. مۇندا بارلىق زەينەتكەرلەرگە ەڭبەك ءوتىلى مەن تابىسىنا قاراماي, رەسپۋبليكالىق بيۋدجەت قاراجاتىنان تاعايىندالادى. ەكىنشى, ەڭبەك زەينەتاقىسى. ازاماتتىڭ 1998 جىلدىڭ 1 قاڭتارىنا دەيىنگى ەڭبەك ءوتىلى جانە زەينەت الدىنداعى تابىسىنا بايلانىستى ەسەپتەلىپ, رەسپۋبليكالىق بيۋدجەت قاراجاتىنان تاعايىندالادى. ءۇشىنشى, مىندەتتى 10 پايىزدىق زەينەتاقى جارنالارى ەسەبىنەن قالىپتاستىرىلعان بىرىڭعاي جيناقتاۋشى زەينەتاقى قورىنان تولەمدەر. ءتورتىنشى, ەرىكتى زەينەتاقى جارنالارىنىڭ بولۋىنا بايلانىستى تولەنەتىن ەرىكتى زەينەتاقى تولەمدەرى.
– كوپشىلىكتىڭ ىشىندە ءبىلمەيتىندەر بار, قازاقستاندا زەينەتكە قاي جاستا شىعۋعا بولادى؟
– بۇگىندە ەرلەر زەينەتكە 63 جاسىندا شىقسا, ايەلدەر 58 جاسىندا شىعا الادى. الايدا 2018 جىلدىڭ 1 قاڭتارىنان باستاپ ايەلدەردىڭ زەينەتكەرلىك جاسى جىل سايىن 6 ايعا ءوسىپ وتىراتىن بولدى. سوندا ايەلدەردىڭ زەينەتكە شىعاتىن جاسى 2027 جىلى 63-كە جەتىپ, ەر كىسىلەرمەن تەڭەسەدى. ايەلدەر ءۇشىن زەينەتكەرلىك جاستىڭ ارتۋىنا جىل سايىن ەڭبەك زەينەتاقى مولشەرىنىڭ ازايۋى سەبەپ بولعانىن ايتۋ قاجەت.
انالارعا قامقورلىق ايرىقشا
– دامەجان تولەۋبايقىزى, ازاماتتاردىڭ زەينەتكە ەرتە نەمەسە جەڭىلدىك شارتتارىمەن شىعا الاتىن قانداي ساناتتارى بار؟
– ءجون ساۋال, ەڭ الدىمەن, بەس جانە ودان دا كوپ بالا تۋعان (اسىراپ العان) نەمەسە ولاردى سەگىز جاسقا دەيىن تاربيەلەگەن ايەلدەر 53 جاسقا تولعاندا, زەينەتاقى تولەمدەرىن الۋعا قۇقىلى. ەكىنشى, سەمەي يادرولىق سىناق پوليگونىنىڭ توتەنشە جانە رادياتسيا قاۋپى ەڭ جوعارى ايماعىندا 1949 جىلدىڭ 29 تامىزىنان, 1963 جىلدىڭ 5 ءشىلدەسى ارالىعىندا كەمىندە بەس جىل تۇرعان ازاماتتار. بۇل ساناتتاعى ەر كىسىلەر 50 جاسقا تولعاندا, ايەلدەر 45 جاسقا تولعاندا زەينەتاقى تولەمدەرىن تاعايىنداتۋعا قۇقى بار. زەينەتكە ەرتە شىعۋعا مۇمكىندىك بەرەتىن كەلەسى جاعداي – زەينەتاقى اننۋيتەتi شارتىن جاساۋ. ول دەگەنىمىز, زەينەتاقى جيناقتارى جەتكىلىكتى بولعان كەزدە, زەينەتاقى اننۋيتەتى شارتىن جاساۋ مۇمكىندىگى ەرلەرگە 55 جاستان كەيىن, ايەلدەرگە 50 جاستان كەيىن تۋادى. بۇل رەتتە ساقتاندىرۋ ۇيىمىنان تولەنەتiن ايلىق ساقتاندىرۋ تولەمiنىڭ مولشەرى زەينەتاقى اننۋيتەتi شارتى جاسالعان كۇنى قولدانىستا بولاتىن ەڭ تومەن زەينەتاقى مولشەرىنەن تومەن بولماۋعا ءتيىس.
– تۇسىنىكتى, ال زەينەتكەرلىككە شىققان كەزدە ەڭبەك ءوتىلى جانە زەينەتاقىنىڭ ءمولشەرى قالاي ەسەپتەلەدى؟
– جاسىنا بايلانىستى ەڭبەك زەينەتاقى مولشەرىن ەسەپتەۋ كەزىندە 1998 جىلدىڭ 1 قاڭتارىنا دەيىنگى ءوتىلى ەسەپكە الىنادى, سەبەبى ەلىمىزدە سول كەزدەن باستاپ جيناقتاۋشى زەينەتاقى جۇيەسى ەنگىزىلدى. 1998 جىلعى 1 قاڭتارعا دەيىن ەڭبەك ءوتىلى ەرلەردە 25 جىل, ايەلدەردە 20 جىل بولعان جاعدايدا, تولىق كولەمدە زەينەتاقى تاعايىندالادى.
ننەگىزگى مولشەر – ەڭبەك ءوتىلى مەن تابىس
– دامەجان تولەۋبايقىزى, بولاشاق زەينەتاقى مولشەرى قىزمەتكەردىڭ كىرىسىنە دە بايلانىستى بولدى عوي سوندا, ءيا؟
– زەينەتاقىنىڭ مولشەرىن ەسەپتەۋ كەزىندە ەكى قۇرامداس ەسكەرىلەدى, ول – ەڭبەك ءوتىلى جانە تابىس. زەينەتاقىنىڭ مولشەرىن ەسەپتەۋ ءۇشىن 1995 جىلعى 1 قاڭتاردان باستاپ زەينەتاقى جاسىنا جەتكەن كەزگە دەيىن جۇمىستاعى ۇزىلىستەرگە قاراماستان, قاتارىنان كەز كەلگەن ءۇش جىلدىڭ تابىسى ۇسىنىلادى. 1998 جىلعى 1 قاڭتاردان باستالعان كەزەڭ ءۇشىن ورتاشا ايلىق تابىستىڭ ءمولشەرى جيناقتاۋشى زەينەتاقى قورلارىنا نەمەسە بىرىڭعاي جيناقتاۋشى زەينەتاقى قورىنا مىندەتتى زەينەتاقى جارنالارى جۇزەگە اسىرىلعان تابىسقا سايكەس بەلگىلەنەدى. بۇل رەتتە, زەينەتاقى ەسەپتەۋ ءۇشىن تابىس رەسپۋبليكالىق بيۋدجەت تۋرالى زاڭدا ءتيىستى قارجى جىلىنا بەلگىلەنگەن ايلىق ەسەپتىك كورسەتكىشتىڭ 41 ەسەلەنگەن ءمولشەرىنەن اسپاۋعا ءتيىس, ياعني 2016 جىلعا زەينەتاقى ەسەپتەۋ ءۇشىن ەڭ جوعارى تابىس 86961 تەڭگەنى قۇرايدى.
اتاپ وتەتىن ءبىر جايت, دەپارتامەنت زەينەتاقى تولەمدەرىن تاعايىنداۋداعى ۋاكىلەتتى ورگان رەتىندە, زەينەتاقى تاعايىنداۋ ءۇشىن ۇسىنىلعان قۇجاتتاردى دۇرىس رەسىمدەۋگە قايتارۋعا جانە تەكسەرۋگە قۇقىلى. ءماسەلەن, ءبىز سالىق ورگاندارى, مۇراعاتتىق مەكەمەلەر جانە ادىلەت ورگاندارىمەن ءوزارا تىعىز بايلانىستامىز.
– زەينەتاقى مەن جاردەماقى تاعايىنداۋ ءۇشىن جالعان نەمەسە راستالماعان قۇجاتتار ۇسىنىلعان جاعدايلار بولدى ما؟
– ءيا, ونداي جاعدايلار بولىپ تۇرادى. مەملەكەتتىك ورگانداردان جۇمىس فاكتىسى نەمەسە ۇسىنىلعان تابىستىڭ راستالماعانى تۋرالى جاۋاپ العان كەزدە, وسى راستالماعان جۇمىس كەزەڭدەرى ەڭبەك وتىلىنە ەسەپتەلمەيدى, ال سالىق ورگاندارى ارقىلى ۇسىنىلعان تابىس راستالماسا, زەينەتاقى تولەمدەرى مولشەرىن ەسەپتەۋ كەزىندە ول تابىس ەسەپكە الىنبايدى.
– بۇگىنگى تاڭدا زەينەتكەرلەردىڭ اراسىندا 1998 جىلعا دەيىن دە جانە ودان كەيىن دە ەڭبەك ءوتىلى ۇلكەن, بىراق زەينەتاقىلارى ەڭ تومەنگى ءمولشەردەن اسپايتىن كىسىلەر بار. سول ازاماتتاردىڭ قۇقىن قورعاۋ ماسەلەسى قالاي شەشىلۋدە؟
– دۇرىس ايتاسىز, زەينەتكەرلەردىڭ اراسىندا ەڭبەك ءوتىلى كوپ بولعانىمەن, زەينەتاقى مولشەرى ەڭ تومەن, ياعني 2016 جىلعى رەسپۋبليكالىق بيۋدجەتپەن بەلگىلەنگەن 25824 تەڭگە الاتىن ازاماتتار كوپ. سوندىقتان وسىنداي ساناتتاعى ازاماتتاردىڭ زەينەتاقى مولشەرىن ارتتىرۋ ماقساتىندا 2018 جىلدىڭ 1 شىلدەسىنەن باستاپ بازالىق زەينەتاقى تولەمىن تاعايىنداۋ شارتتارى وزگەرەدى. بازالىق زەينەتاقى تولەمى تەك قانا جالپى بەلگىلەنگەن زەينەتاقى جاسىنا جەتكەن كەزدە تاعايىندالاتىنىن اتاپ ءوتۋ كەرەك. 2018 جىلعى 1 شىلدەدەن باستاپ مەملەكەتتىك بازالىق زەينەتاقى تولەمى زەينەتاقى جۇيەسىنە قاتىسۋ ءوتىلى 10 جىل جانە ودان از بولعان نە بولماعان كەزدە ءتيىستى قارجى جىلىنا ارنالعان رەسپۋبليكالىق بيۋدجەت تۋرالى زاڭدا بەلگىلەنگەن ەڭ تومەن كۇنكورىس دەڭگەيى شاماسىنىڭ 50 پايىزى مولشەرىندە, زەينەتاقى جۇيەسىندە قاتىسۋ ءوتىلى 10 جىلدان ارتىق ءاربىر تولىق جىل ءۇشىن ونىڭ مولشەرى 2 پايىزعا ارتتىرىلا وتىرىپ, ءوتىلى 35 جىل جانە ودان ارتىق بولعاندا, ەڭ تومەن كۇنكورىس دەڭگەيى شاماسىنىڭ 100 پايىزىنا تەڭەستىرىلەدى.
مەملەكەتتىك بازالىق زەينەتاقى تولەمىن ەسەپتەۋ كەزىندە 1998 جىلعى 1 قاڭتارعا دەيىنگى كەزەڭدە ىستەگەن ەڭبەك ءوتىلى; جۇمىس ىستەمەيتىن انانىڭ نەمەسە جۇمىس ىستەمەيتىن اكەنىڭ (باعىپ-كۇتۋدى ول ناقتى جۇزەگە اسىرعان كەزدە) جاس بالالاردى باعىپ-كۇتكەن, بىراق ءاربىر بالا 3 جاسقا تولعانعا دەيىن جالپى جيىنتىعى 12 جىل شەگىنەن اسپايتىن ۋاقىت; 16 جاسقا دەيىنگى مۇگەدەك بالانى باعىپ-كۇتكەن ۋاقىت; مىندەتتى زەينەتاقى جارنالارى جانە جۇمىس بەرۋشىنىڭ مىندەتتى زەينەتاقى جارنالارى جۇزەگە اسىرىلعان كەزەڭ; اسكەري قىزمەت, ارناۋلى مەملەكەتتىك جانە قۇقىق قورعاۋ ورگاندارىنداعى قىزمەت كەزەڭى; قر ديپلوماتيالىق قىزمەتتەرى مەن حالىقارالىق ۇيىمدار قىزمەتكەرلەرى جۇبايىنىڭ (زايىبىنىڭ) شەتەلدە تۇرعان, بىراق جالپى جيىنتىعى 10 جىلدان اسپايتىن كەزەڭى; اسكەري قىزمەتشىلەردىڭ (مەرزىمدى قىزمەتتەگى اسكەري قىزمەتشىلەردەن باسقا), ارناۋلى مەملەكەتتتىك ورگاندار قىزمەتكەرلەرى جۇبايلارىنىڭ ماماندىعى بويىنشا جۇمىسقا ورنالاسۋ مۇمكىندىگى بولماعان جەرلەردە جۇبايلارىمەن بىرگە تۇرعان, بىراق جالپى جيىنتىعى 10 جىلدان اسپايتىن كەزەڭ زەينەتاقى جۇيەسىنە قاتىسۋ وتىلىنە ەسەپكە جاتقىزىلادى.
سولاي, 2018 جىلدىڭ 1 ءشىلدەسىنەن باستاپ وسى نورمانى ىسكە اسىرۋ ماقساتىندا قازىرگى زەينەتكەرلەرگە زەينەتكەرلىك قۇجاتتاردا بار مالىمەتتەر نەگىزىندە بازالىق زەينەتاقىنى قايتا ەسەپتەۋ وتكىزىلىپ, بازالىق زەينەتاقى تولەمىن ەكى ەسە ارتتىرۋعا مۇمكىندىك بەرەدى.