بۇگىن استانا قالاسىندا قازاقستاندىق مانەرلەپ سىرعاناۋشى دەنيس تەنگە ارنالعان D10 WORLD (دي تەن ۋورلد) كورمەسى ءوز جۇمىسىن باستادى.
كورمەنىڭ اشىلۋىنا دەنيس تەننىڭ وتباسى مۇشەلەرى, ونىڭ دوستارى, ارىپتەستەرى, بەلگىلى قازاقستاندىق سپورتشىلار قاتىستى.
كورمە ورنالاسقان «MEGA Silk Way ساۋدا, ويىن-ساۋىق ورتالىعىنىڭ ەكىنشى قاباتىنداعى, جالپى اۋدانى 400 شارشى مەتردەن اساتىن اۋماقتا اۆتورلىق فوتوجۇمىستار, دەنيستىڭ مۋزىكاسى جانە وليمپيادا چەمپيونىنا تيەسىلى زاتتاردان قۇرالعان «مۇز ايدىنى الەمى» قارسى الادى. سونىمەن قاتار كورمەدە سپورتشىنى اتاۋلى ءىس-شارالاردا تۇسىرگەن ءتۇرلى اۆتورلاردىڭ سۋرەتتەرى جانە ارىپتەستەرى مەن دوستارىنىڭ بەينە جوباسى ۇسىنىلعان».
بۇل شارا سپورتشىنىڭ جاقىندارى مەن تۋىستارى قۇرعان «دەنيس تەن قورى» باستاماسى بويىنشا ۇيىمداستىرىلدى.
ونىڭ ماقساتى – دەنيس تەن اتىنداعى سپورتتىق-ءبىلىم بەرۋ باعدارلاماسىن ۇيىمداستىرا وتىرىپ, قازاقستاننىڭ مانەرلەپ سىرعاناۋ ونەرىنىڭ, اسىرەسە, بالالار مەن جاستاردىڭ اراسىندا دامۋىنا ۇلكەن ۇلەس قوسۋ بولىپ تابىلادى.
سونىمەن قاتار قوردىڭ جۇمىسى دارىندى جاستاردى قولداۋعا, مادەني, ءبىلىم بەرۋ, سپورتتىق جانە الەۋمەتتىك جوبالاردى دامىتۋعا باعىتتالاتىن بولادى.
