24 ماۋسىم كۇنى استانانىڭ 20 جىلدىعىنا ارنالعان «استانا-دۋاتلون 2018» سايىسى ءوتتى.
بۇقارانىڭ باسىن قوسقان قوسسايىسقا 500-گە تارتا ادام قاتىستى. شارا شارتى بويىنشا شاھاردىڭ شاپشاڭ تۇرعىندارى الدىمەن 5 كم جۇگىرىپ ءوتىپ, سودان سوڭ 20 كم ۆەلوسيپەدپەن جارىسىپ, ارتىنشا بوي سۋىتپاي تاعى 2,5 كم باعىندىرۋى ءتيىس. وسى ۇدەدەن شىققان قاتىسۋشىلاردىڭ الدىڭعى قاتارى جەڭىس تۇعىرىنان كورىندى.
جۇرتتى بىرلىككە باستاعان بۇل دودانىڭ بەلگىلەنگەن قاشىقتىعىن ەڭسەرۋدىڭ ءوزى – جەڭىسپەن پارا-پار. سونداي سالاماتتى ءومىر سالتىن بەرىك ۇستانعان بەلسەندى تۇرعىنداردىڭ ورتاسىنان قر پرەزيدەنتى اكىمشىلىگىنىڭ باسشىسى ادىلبەك جاقسىبەكوۆ, قالالىق مادەنيەت جانە سپورت باسقارماسىنىڭ باسشىسى بولات ماجاعۇلوۆ, فۋتبول فەدەراتسياسىنىڭ باسشىسى ماليك حاسەنوۆ جانە «الاۋ» مۇز ايدىنى سارايىنىڭ ديرەكتورى سانات شاپاشوۆ تابىلدى.
قاتىسۋشىلاردى مارە سىزىعىنان قارسى العان استانا اكىمىنىڭ ورىنباسارى ەرمەك امانشاەۆ جەڭىستەرىمەن قۇتتىقتاپ, جۇلدەگەرلەرگە سىي-سياپات كورسەتتى.
سونىمەن, يگى داستۇرگە اينالعان كەزەكتى دۋاتلوندا ەسىمدەرى ەرەكشەلەنگەن جەڭىمپازدار مىنالار: ارتۋر گاۆريلوۆ پەن دينارا كاپاروۆا (16-29 جاس), ياكوۆ كازلوۆ پەن ەلەنا پونومارەۆا (30-39 جاس), مارات فاراحوۆ پەن يننا ۆيشنياكوۆا (40-49 جاس), الەكساندر بلۋم مەن يرينا مۋستافينا (50-59 جاس) جانە اناتولي گوناگو مەن ليۋبوۆ اسانوۆا (60+ جاس).
ورىنبەك وتەمۇرات
