قازاقستان پرەمەر-ليگاسى 15-تۋرىنىڭ باستى ويىنى الماتىنىڭ ورتالىق ستاديونىندا «قايرات» پەن «استانا» كوماندالارىنىڭ اراسىندا ءوتتى.
«استانادان» كوش كەيىن قالىپ بارا جاتقان الماتىلىقتاردىڭ وسى جولى اراقاشىقتىقتى قىسقارتۋعا مۇمكىندىگى بولدى. بىراق «قايراتتىڭ» وعان قاۋقارى جەتپەي, ءبىر قايناۋى كەم شىقتى.
ەلوردالىقتار ويىندى باستى سۇرمەرگەنى پاتريك تۆۋماسيسىز باستادى. ونسىز «استانانىڭ» العى شەبى اقساپ قالدى دەپ ايتۋعا كەلمەس. قوس كوماندا دا ءا دەگەننەن العا ۇمتىلىپ, شابۋىلدارىن ۇدەتە ءتۇستى. الدىمەن ەسەپتى «قايرات» اشتى. 32-مينۋتتا يسلامبەك قۋات الىستان شىرەنە تارتىپ, نەناد ەريچ كۇزەتكەن قاقپانىڭ توعىزدىعىن توپ ەتكىزدى. بۇدان كەيىن باقتيەر زاينۋتدينوۆ تا كوزگە تۇسەتىندەي تاماشا ءسات تۋىپ ەدى, ونىسىن گولعا اينالدىرا المادى. دەگەنمەن, كوپ ۇزاماي ءبىرىنشى تايمدا-اق تارازى باسى تەڭەستى.
كلياينحايسلەر لاسلونىڭ اۋەلەتكەن دوبىن دجوردجە دەسپوتوۆيچ ءدوپ ءتۇسىردى. ەكىنشى تايمدا قوناقتاردىڭ ەكپىنى كۇشەيىپ, ويىن تىزگىنىن ۇستادى. ال الاڭ يەلەرى قارسى شابۋىلعا يەك ارتتى. ناتيجەسىندە 88-مينۋتتا قۋاتتىڭ گولىنا ناعىز جاۋاپ رەتىندە رومان مۇرتازاەۆ قاقپاعا قاشىق جەردەن كەرەمەت گول سوقتى. ءسويتىپ 2:1 ەسەبىمەن «استانا» تاعى دا «قايراتتان» اسىپ ءتۇستى.
«استانا» تۋرنير كەستەسىندەگى ۇپايىن 43-كە ارتتىرىپ, «قايراتتى» 35 ۇپايمەن قالدىردى.
تۋردىڭ قالعان كەزدەسۋلەرىندە «ورداباسى» «اقجايىقتى» 2:1, «جەتىسۋ» «قىزىلجاردى» 2:1, «شاحتەر» «اتىراۋدى» 3:0 ەسەبىمەن جەڭدى. ال «ەرتىس» «قايسارعا» 0:1, «توبىل» «اقتوبەگە» 2:3 ەسەبىمەن ەسە جىبەردى.
ورىنبەك وتەمۇرات
