جىل باسىنان بەرى باتىس افريكانى شۋلاتقان ەبولا ۆيرۋسى بۇگىندە كۇللى الەمدى الاڭداتىپ وتىر. بۇگىنگە دەيىن دۇنيەجۇزىندە بەزگەكتى جۇقتىرۋدىڭ 8 مىڭنان استام دەرەگى تىركەلىپ, ونىڭ 4 مىڭنان استامى قايعىلى جاعدايمەن اياقتالعان.
ەۋروپا مەن امەريكاعا جەتىپ ۇلگەرگەن ۆيرۋستىڭ بىزگە دە كەلۋى مۇمكىن ەكەنى ەلدى الاڭداتىپ وتىر. بىراق قر ۇلتتىق ەكونوميكا مينيسترلىگى تۇتىنۋشىلار قۇقىعىن قورعاۋ كوميتەتىنىڭ توراعاسى الياقپار ماتىشەۆ ەلىمىزدە ەبولا قىزباسىنىڭ ەپيدەميالىق تارالۋىنا ەشقانداي دا جاعداي جوق دەگەن مالىمدەمە جاسادى. ەگەر قانداي دا ءبىر قاۋىپ تونە قالسا, قازاق مەديتسيناسى ۆيرۋستى جۇقتىرعان ادامدى دەرەۋ انىقتاپ, ونى وقشاۋلاپ, ەمدەۋگە ساقاداي ساي كورىنەدى.
بەزگەكتىڭ ەڭ اۋەلى ترانزيتتىك اۋە قاتىناستارى ارقىلى بىزگە جەتۋى ابدەن مۇمكىن. سوندىقتان ەلىمىزگە كەلىپ قونعان ۇشاقتارداعى جولاۋشىلاردى تەكسەرۋ كۇشەيتىلىپ وتىر. قازىرگى كۇنى جولاۋشىلاردىڭ دەنە قىزۋىن قالىڭ كوپشىلىكتىڭ اراسىنان-اق 3 مەتر قاشىقتىقتان انىقتايتىن ارنايى قوندىرعى ورناتىلىپ وتىر. ەگەر ەلىمىزگە ساپارلاپ كەلگەن قانداي دا ءبىر ازاماتتىڭ دەنە قىزۋى 37 گرادۋستى كورسەتسە, ول ادام بىردەن وقشاۋلانىپ, جوسپارلى مەديتسينالىق تەكسەرىستەن وتەدى.
جىل باسىنان بەرى مەملەكەتتىك شەكارانىڭ وتكىزۋ بەكەتتەرىندە 2 ميلليوننان استام ادام تەكسەرىلسە, ولاردىڭ ەشقايسىسىنان ينفەكتسيالىق اۋرۋلار انىقتالماپتى.
