تۇركيا اقش-قا كەزەكتى سوققى بەردى
تۇركيا اقش-تىڭ مەملەكەتتىك قارىزىنداعى قارجىلارىنىڭ سانىن كۇرت ازايتىپ, ونىڭ ەكونوميكاسىنا تاعى ءبىر سوققى بەردى.
انكارا وسىلاي امەريكانىڭ قازىناشىلىق قاعازدارىن ۇستاۋشى ءىرى مەملەكەتتەر تىزىمىنەن شىعىپ كەلەدى. ول سوڭعى ايلاردا شتاتتاردىڭ مەملەكەتتىك قارىزىنا قوسقان اقشاسى كولەمىن 28,8 ملرد دوللارعا دەيىن ءتۇسىردى. مامىر ايىندا عانا بۇل مولشەر 32,6 ملرد دوللار بولاتىن.
تۇركيا مۇنداي شەشىمگە وتكەن جىلدىڭ قاراشا ايىندا كەلدى. سول تۇستا قارىز سانى 61,2 ملرد دوللاردى قۇرايتىن. سودان بەرى ونى ۇدايى كەمىتۋ ارقىلى ءبۇگىنگى كۇنگى دەڭگەيگە جەتتى.
اقش-قا قارىز ەلدەر كوشىن قىتاي باستاپ كەلەدى. ونىڭ بەرەشەگى – 1,179 تريلليون دوللار. ەكىنشى ورىنداعى جاپونيانىڭ ۇلەسى – 1,03 تريلليون. ال ءۇشىنشى ورىندا 300,1 ملرد دوللار قارىزى بار برازيليا تۇر.
كاددافيدىڭ جاقتاستارى ولىمگە كەسىلدى
ليۆيانىڭ قىلمىستىق ىستەر سوتى بۇرىنعى پرەزيدەنت مۋاممار كاددافيدىڭ جاقتاسى سانالعان 45 ادامدى ءولىم جازاسىنا كەستى.
ولارعا 2011 جىلعى تامىزدا ەلدىڭ استاناسى – تريپولي قالاسىندا بولعان كوتەرىلىسشىلەردى جاپپاي قىرۋعا قاتىستارى بار دەگەن ايىپ تاعىلىپ وتىر. سوتتىڭ شەشىمى تۇپكىلىكتى, ول قايتا قارالمايدى. وسى ىسكە قاتىستى تاعى 54 ادام ءارتۇرلى مەرزىمگە تۇرمەگە وتىرۋ جازاسىن الدى.
بۇدان 7 جىل بۇرىن ورىن العان وقيعا ەلدىڭ كوپ جىلدار بويعى ليدەرى مۋاممار كاددافيدىڭ بيلىگىنە قارسى شىققان ءارتۇرلى «رەۆوليۋتسيالىق» كۇشتەردىڭ كوتەرىلىسىن باسۋعا ارنالعان ەدى. ولار ۇكىمەتتىڭ اسكەري ءبولىمشەلەرىنە شابۋىل جاساعان. بۇلىكشىلەردىڭ ءبىر توبى استانا تۇبىندە قورشاۋعا الىنىپ, تۇگەل جويىلىپ جىبەرىلگەن بولاتىن. كوتەرىلىس اقپان ايىندا باستالىپ, تامىزعا دەيىن ۇلاستى. وعان قاتىسقاندار كاددافيدىڭ بيلىك باسىنان كەتۋىن تالاپ ەتتى. ال ەكس-پرەزيدەنت ولتىرىلگەننەن بەرى ليۆيا وتە تەرەڭ داعدارىستى باستان كەشىپ كەلەدى.
سارگسيان تەرگەۋگە شاقىرىلدى
ارمەنيانىڭ ەكس-پرەزيدەنتى سەرج سارگسيان رەسپۋبليكا تەرگەۋ قىزمەتىنە جاۋاپ الۋعا شاقىرىلدى.
بۇرىنعى باسشى 2008 جىلعى 1 ناۋرىزدا وتكەن پرەزيدەنت سايلاۋىنان كەيىنگى مەملەكەتتىك توڭكەرىس جاساۋعا ارەكەت ەتۋ وقيعاسىنا بايلانىستى تەرگەلەدى. «ءىس تولىق اشىلعانعا دەيىن وسىعان قاتىسى بار سانالعان تۇلعالاردىڭ ءبارى تەرگەلەدى. سونىڭ ىشىندە وسى سايلاۋدا جەڭىپ شىققان سەرج سارگسياننان دا جاۋاپ الىنادى» دەدى تەرگەۋ قىزمەتىنىڭ باسشىسى ساسۋن حاچاتريان.
ول سونىمەن بىرگە «شەشىمدى تەرگەۋشىلەر قابىلدايتىنىن» ايتتى. ولار تەرگەۋدى جۇرگىزۋ تاكتيكاسىن دا وزدەرى تاڭداۋعا ءتيىس. باستىسى – وسى ىستەن ناتيجە شىعارۋ. ال جاقىن ۋاقىتتاردا ەكس-پرەزيدەنت ەلدەگى تالان-تاراج وقيعالارى مەن جەمقورلىق جايى بويىنشا دا تەرگەۋ الدىندا جاۋاپ بەرەتىن بولادى.
