مەديتسينالىق ساقتاندىرۋ حالىققا قاجەتتى جۇيە
الداعى جىلدان باستاپ ەلىمىزدە حالىقارالىق تاجىريبەگە نەگىزدەلگەن مەديتسينالىق ساقتاندىرۋ جۇيەسى ەنگىزىلەدى. بۇل رەتتە مەملەكەت ەكونوميكالىق بەلسەندى ەمەس حالىق ءۇشىن سالىمدار جاسايدى.
سوندىقتان جۇمىس بەرۋشىلەر مەن ءوزىن-ءوزى جۇمىسپەن قامتىپ وتىرعان ازاماتتار الەۋمەتتىك مەديتسيالىق ساقتاندىرۋ قورىنا سالىمدى الداعى جىلدىڭ 1 قاڭتارىنان باستاسا, ال مەملەكەت سول جىلدىڭ 1 شىلدەسىنەن باستاپ سالا باستايدى.
مەملەكەتتىڭ ەرەكشە ساناتتاعى ازاماتتارى ءۇشىن مولشەرلەمەسى ورتاشا ايلىق ەڭبەكاقىنىڭ 7 پايىزىن قۇرايدى. بۇل رەتتە مولشەرلەمەنىڭ كولەمى كەزەڭ-كەزەڭمەن جوعارىلايدى. دالىرەك ايتقاندا, 2017 جىلى – 4 پايىز, 2018 جىلى – 5 پايىز, 2023 جىلى – 6 پايىز جانە 2024 جىلدان 7 پايىز بولادى. جۇمىس بەرۋشىلەردىڭ جارنالارىنىڭ جالپى كولەمى كىرىستىڭ 5 پايىزىن قۇرايدى.
ايتا كەتەيىك, مەملەكەت ازاماتتاردى تەگىن مەديتسينالىق كومەكتىڭ كەپىلدەندىرىلگەن كولەمىمەن قامتاماسىز ەتۋ قۇقىعىن وزىندە قالدىرادى. ماسەلەن, الەۋمەتتىك ماڭىزدى اۋرۋلار, كەزەك كۇتتىرمەيتىن جاعدايلار كەزىندە ولارعا مەديتسينالىق كومەك كورسەتىلەدى.
«اتالمىش مەديتسينالىق ساقتاندىرۋ شەڭبەرىندە ازاماتتارعا ءدارىلىك قامتاماسىز ەتۋمەن بىرگە امبۋلاتوريالىق-ەمحانالىق كومەك, ستاتسيونارلىق مەديتسينالىق كومەك, جوعارى تەحنولوگيالىق مەديتسينالىق قىزمەتتەر, ستاتسيوناردى الماستىرۋ تەحنولوگيالارى جانە ۇزاق مەرزىمدى مەيىربيكەلىك كۇتىم كورسەتىلەدى» دەدى قر دەنساۋلىق ساقتاۋ جانە الەۋمەتتىك دامۋ مينيسترلىگىنىڭ مەديتسينالىق قىزمەتكە اقى تولەۋ كوميتەتىنىڭ استانا قالاسى بويىنشا دەپارتامەنتىنىڭ باسشىسى اسحات بەيسەنباەۆ.
سونىمەن بىرگە الەۋمەتتىك مەديتسينالىق ساقتاندىرۋ قورىنا جارنا تولەۋدەن ازاماتتاردىڭ 15 ساناتى بوساتىلادى, ونىڭ ىشىندە 12 ساناتى حالىقتىڭ الەۋمەتتىك ءالسىز توپتارى, سونداي-اق, اسكەري قىزمەتكەرلەر, ارنايى مەملەكەتتىك جانە قۇقىق قورعاۋ ورگاندارىنىڭ قىزمەتكەرلەرى بار.
ازامات ەسەنجول